IOANES 8:34-53

³⁴Mái Iesu a parai si di ngoromin, “A támin muswan ngo ái koner a longoi sápkin, ái a toptop sár káián sápkin.

³⁵Aratámán kápte di lu wás páptai kándi toptop ngo a kes tili di muswan. Mái sár nat diar, ái a kes tili di áklis á aratámán er kabin a nat diar sang.

³⁶Má ngo ái Natun na pálás pala gam, ki erár gama sengsegeng muswan!

³⁷Iau mák ilam gam ngo gam rang kopkom i Abaram, mái sár kápgamte longra pasi kak worwor, má ngorer gam ser sál suri up iau.

³⁸Á iau iau inngasi tan táit iau mákái imi narsán ái Kakang, mái sár á gam gam mur i tatalen a lu longoi ái kák gam.”

³⁹Di longrai ngorer má ding kosoi ngo, “Ái Abaram á kák gim!” Mái Iesu a parai si di ngoromin, “Ngo gam rang natun ái Abaram muswan, ngorer gama han longoi matngan tatalen ái sang a lu longoi.

⁴⁰Á iau á kálámul iakte arbin narsá gam mai muswan sár er iau longrai si Káláu. Má kápte gam nem suri longrai, gam tu nem sár ngo gama up iau. Ái Abaram kápate lu longoi á ngorer!

⁴¹Kápgamte mur i tatalen si Abaram. Gam lu longoi ngorer a longoi ái kák gam!” Má di kos Iesu ngo, “Auh, wa tukes sár á kák gim, ái Káláu sang. Gim aratámán no mam Káláu, má gim á rang natun muswan!”

⁴²Mái Iesu a parai si di ngoromin, “Má ngo ái Káláu kák gam muswan sang, ki ngorer gama mámna iau kabin iau hut sosih tilami si Káláu má onin iau minái i narsá gam. Káp iau te hut kaiak sár, ái Kakang sang a dos pala iau.

⁴³Suri dáh kápgamte mánán pasi kak pinpidan? A kabin ngo gam ngákngák suri longra pasi sálán sang.

⁴⁴Á gam, gam rang natun i kák gam, ái Satan sang, má gam nem suri mur i nemnem káián ái kák gam. Til tungu i tangkabin a tám up bing kálámul, má a tám angagur mat, káp a tini para muswan i tekesi táit. I pákánbung a worwor, a angagur sár kabin a tu longoi ngorer sang i ninsin. Ái a tám angagur má a kákán angagur mul.

⁴⁵Má iau iau lu parai támin. Má pasi á ngorer, kápgamte ruruna i táit iau parai.

⁴⁶Kol tekes alatung a arwat suri para apos iau ngo iau longoi sápkin? Má ngo kápte, ki ngorer táit iau parai a támin. Má suri dáh kápgamte ruruna on?

⁴⁷Ái koner a káián ái Káláu, ái a longra pasi worwor si Káláu. Má gam, kápgamte tili Káláu. Má pasi á ngorer, kápgamte alongra singin.”

⁴⁸Má tan Iudáiá erei di parai si Iesu ngo, “Na, wa gim parai támin sang ngo kam aratintin kápate muswan má a mon á sápkin tanián i iáu!”

⁴⁹Mái Iesu a kos di ngo, “Kápate mon i sápkin tanián i iau! Iau lu tari rumrum si Kakang, mái sár á gam gam lu arumrum iau.

⁵⁰Káp iau te hut suri ina bana te kálámul suri dák rumrum i iau. Mái sár kes er a kis a nem i di ngo da para agas iau, má ái kán nagogon a nokwan.

⁵¹A támin muswan sang ngo ái sinih a taram pasi kak pinpidan, ái kápnate mat.”

⁵²Má ngo tan Iudáiá di longrai ngorer, ki dik parai singin ngoromin, “Má inár gim mánán muswan i iáu ngo a mon á sápkin tanián i iáu! Ái Abaram má tan tám worwor tus no dikte mat. Má iáu u parai ngo ái sinih na taram pasi kam pinpidan, ái kápnate mat.

⁵³Kámpup gim ái Abaram ákte mat. Kol á iáu u pakta sorliu Abaram, be? Má tan tám worwor tus mul dikte mat. Má iáu sinih er u parai ngorer?”