Ioanes 8:18-37

¹⁸Iau a taki tala mule a ngava nau ne mua, pali a viri i tuhori iau na ngava e Tata, ra viri i rudu iau a valai.”

¹⁹Muri ri nanea, “I vai e tamamu?” E Isu i koli, i ta maea, “I uka ma mu lohoka nau o ne Tata. Mua bara mu lohoka nau, e Tata tara bara mu lohoka vona.”

²⁰I taki e huriki na ngava nga na tahuna i vara na tabeke na roho na Vure, tabukoi na hini ni ru a nihabi vona. Pali i uka tara viri ge lakavua, a vuhuna a parava vona i uka ma i valai ma.

²¹E Isu i taki tabu ria, i ta maea, “Iau popote ga vano, lakea bara mu matakana iau. A naro hale ne mua bara i tabuli, mu mate turana. A hini ga lakea vona, bara mu keri ni valai vona.”

²²Lakea e huriki a Iuda ri vanana, ri ta maea, “Ra bakovi iea, i taki a hini ge lakea vona bara si keri ni bele vona, ma ge tomo.”

²³Pali e Isu i ta lokovonga liu, i ta maea, “Mua e huriki a bakovi na malala kunana. Pali iau a bakovi na hunu. Iau i uka ma a bakovi na malala.

²⁴A taki mua pali, bara mu mate turana naro hale ne mua. Pali mua i uka mu gu luhoi ge iau ra iau kunana, muholi hateka bara mu mate turana naro hale ne mua.”

²⁵Ri nanea, “Pali ioe e rei ke?” E Isu i koli, i ta maea, “Iau ra viri a taki mua vona pali.

²⁶Iau a tahoka a ngava i kupo na tahuna bara pelekado mua. Pali a viri i rudu iau a valai i ta muholi hateka. A ngava a longo vona, a taki polo ne huriki lobo.”

²⁷A viri i taki ria vona e Tamana, pali i uka ma ri longokilala a hini i taki.

²⁸Lakea e Isu i ta maea, “Na tahuna mu bole rikea a Tuna Bakovi, bara mu matakilaka vona iau kunana ra viri a takikia. Bara mu matakilala iau i uka ma a ratea tara maki na ningaru nau kunana. A taki polo kunana a maki e Tata i tovo iau vona.

²⁹A viri i rudu iau a valai i made turagu, i uka ma i pe iau, a vuhuna a rata vakaroro a maki ge vivi vona.”

³⁰Na tahuna e huriki ri longo a ngava i taki, i kupo ri luhoi torea.

³¹E Isu i taki e huriki a Iuda ri luhoi torea, i ta maea, “Na tahuna mu longo­­toto a vinara nau, bara i mua a murimuri muholi nau.

³²Lakea bara mu lohoka vona a ngava muholi. Muri a ngava muholi bara i rata mua, mu matuka­paga.”

³³Ri koli ri ta maea, “Mia e huriki a hamone Abraham. Pali paru hosi i valai mona, i uka ma mia a vorakato na viri tara. Pali i navai a hini o taki mavonga mia, ta mi gi matukapaga?”

³⁴E Isu i koli, i ta maea, “A taki muholi mua, a viri i rata a naro hale ia a vora­kato na naro hale, i made polotano na tuhakanga na rabu hale.

³⁵A vorakato, i uka murina na kabu na matakari vona. Pali a tuna bakovi i tahoka a murina na kabu vona. A murina i tabuli vakaroro.

³⁶I mavonga kunana, a Tuna Bakovi ge rata mua mu matukapaga, bara mu matukapaga muholi.

³⁷A lohoka vona ngi, mua a hamone Abraham. Pali ngane mu ngaru ni rabalaki iau, a vuhuna a nitagu i uka ma i dili na hatene mua.