Ioanes 7:22-52

²²Moses i ga tul tar ra pokakikil ta vavat (vakir kai Moses, kai ra tarai lualua iat); ma ava poko kikil ra tutana ta ra Bung Sabat.

²³Ba di poko kikil ta tutana ta ra Bung Sabat, upi koko da piam ra varkurai kai Moses, dave ava kankan tagu, tago iau ga valagar vakakit pa ra tutana ta ra Bung Sabat?

²⁴Koko avat a varkurai ta ra ginigira ka, avat a varkurai ma ra varkurai i takodo.

²⁵Ta ra umana ta diat maro Ierusalem dia biti: Go vang nina dia mainge upi diat a doka?

²⁶Ma go i tata kapa, ma pa dia tatike ta magit i tana. Kan a umana tena varkurai dia tar motote pa ia, ba go ra Kristo tuna.

²⁷Ma da nunure ra gunan kai go ra tutana; ba ra Kristo na pot, pa ta na nunure ba mamave.

²⁸Ma Iesu i oraoro ta ra pal na vartabar, i vartovo, i biti: Ava nunure iau ma kaugu gunan bula; pa iau vut vakuku, ma nam i ga tulue iau uti i dovot, ma pa ava nunure.

²⁹Iau nunure, tago iau ga vana rikai tana, ma i ga tulue iau Uti.

³⁰Dia mainge diat a kinim pa ia, ma pa ta i vatur ia, tago kana bung pa i ga ti vut boko.

³¹Ma mangoro ta ra kor na tarai dia nurnur tana, ma dia biti: Ba ra Kristo i tar pot na pait laka mangoro na vakilang ta ni diat go ra tutana i tar pait ia?

³²A umana Parisaio dia valongore ra tarai dia varmaianao ma go ra lavur magit ure; ma ra umana tena tinabar ngalangala ma ra umana Parisaio dia tulue ra umana luluai na vinarubu ba diat a kinim pa ia.

³³Iesu i biti: Iau, pa ina ki vavuan pire vavat, ma ina vana tadav nam ba i ga tulue iau Uti.

³⁴Avat a tikan boko upi iau, ma pa avat a tikan tadav iau; a gunan ba ina ki tana, i dekdek upi avat a vana tana.

³⁵A Iudaia dia tir vargiliane diat ba: Go ra tutana na vana uve, upi koko dat a tikan tadav ia? Na vana bar tadav diat, dia ki pire ra Elenas ma na tovo ra Elenas?

³⁶Ava go ra tinata i tar tatike ba: Avat a tikan boko upi iau, ma pa avat a tikan tadav iau; ma nam ra gunan ina ki tana, pa avat a vana tana?

³⁷Ta ra mutuai ra bung na lukara, nina ra ngala na bung ta ra lukara, Iesu i tur, ma i oraoro dari: Ba tikai i mar, boina ba na tadav iau ma na momo.

³⁸Nina i nurnur tagu, da ra Buk Tabu i biti: A umana tava alir a launa, diat a lalalongo kan ra balana.

³⁹I tatike go ra tinata ure ra Tulungen, ba da tul tar ia ta diat dia nurnur tana; tago pa di ga tul tar boko ra Tulungen; tago Iesu pa i vana boko ta kana minamar.

⁴⁰Ta umana ta ra kor na tarai, ba dia valongore go ra tinata, dia biti: A dovotina go ia ra propet.

⁴¹Ta ra umana bula dia biti: Dave ra Kristo na vut marama Galilaia?

⁴²A Buk Tabu pa i biti laka ba ra Kristo na vana rikai ta ra vuna tarai kai David, ma maro Beteleem, ra gunan ba David i ga ki tana?

⁴³Ma ra nuknuk i ra tarai i enana varbaiai ure.

⁴⁴Ma ta ra umana dia mainge ba diat a kinim ia; ma pa ta i vatut ia.

⁴⁵A umana luluai na vinarubu dia talil tadav ra umana tena tinabar ngalangala ma ra umana Parisaio, ma dia biti ta diat: Dave pa ava kinim pa ia Uti?

⁴⁶Ma ra umana luluai na vinarubu dia biti: Pa ta tutana boko i ga tatata da go.

⁴⁷A umana Parisaio dia tir diat: Ma di ga varara avat bula?

⁴⁸Dave ta ra umana tena varkurai, ba ta ra umana Parisaio vang dia tar nurnur tana?

⁴⁹Go ka ra kor na tarai pa dia nunure ra tinata na varkurai, a umana kaina ta.

⁵⁰Nikodemo (tikai ta diat, nina amana i ga vana pirana) i biti ta diat:

⁵¹Dave, kada tinata na varkurai i kure ta tikai vang ona pa di ga valongore boko kana tinata ma dia matoto ure nam i tar pait ia?

⁵²Dia bali ia dari: Ma u bula ra te Galilaia? Una tikatikan ma una matoto, ba pa ta propet i ga vana rikai marama Galilaia.