Ioanes 6:21-62

²¹Muri ri vivi vona, ri vakarikea na posi. Ri turutu kunana ri bele pali na lavu na hini ri lakea mai.

²²Na hatelanga e huriki ri tabana na tabeke tara na darilomu ri lohoka vona a posi i taku kunana i pasi vonga ravi, pali e Isu i uka ma i rike turane huriki a murimuri vona na tahuna ri vano.

²³Muri a posi ranga na tanga e Tiberius ri dili tabukoi na hini e Bakovi Dagi i kavurike a Vure vona a bret, i vakani e huriki vona ravi.

²⁴Ngane ri matakilaka vona e Isu turane huriki a murimuri vona i uka ma ri made tabu vonga. Lakea ri rike na maka aga o Tiberius, ri lakea o Kapernaum ri gi matakanea e Isu.

²⁵Na tahuna ri bele o Kapernaum ri matavisia e Isu, ri nanea, “Mari ni tovo, garika o bele koea?”

²⁶E Isu i koli, i ta maea, “A taki muholi mua, i uka ma mu ngaru iau na hini a rata a nivakasiri. Mu ngaru iau a vuhuna a habi tavula a bret ne mua, mu kani, mu maru.

²⁷Naha ni leho ni bole a maki ni kani na malala. Bara i bera. Mu leho ni bole a maki ni kani na hunu, ra i tabuli vakaroro, i habi a nimahuri vakaroro. Iau, a Tuna Bakovi, ga habia mua a maki ni kani na hunu, a vuhuna a Vure e Tata i ru a kilakila nau. Ra kilakila iea, i vakasiri manga i vivi nau.”

²⁸Muri ri nanea, “A ra leho a Vure i ngaru mia mi gi ratea?”

²⁹E Isu i koli, i ta maea, “A leho na Vure i maea, mu luhoi torea a viri a Vure i rudua i valai.”

³⁰Ri longoa a ngava iea, lakea ri nana tabua, “A ra nivakasiri go ratea, mi gi masia, muri mi gi luhoi torea a viri a Vure i rudua i valai? A ra go ratea?

³¹Hosi, e huriki e tubune mia ri kani a mana na tahuna ri laho viliha na tabeke i ngeki, i manga a ngava ni here puru hosi i ta maea, ‘I habia ne ria a bret na hunu ri gi kania.’”

³²Muri e Isu i taki ria, i ta maea, “A taki muholi mua, e Moses i uka ma a viri i habia ne mua ra bret na hunu, e Tata kunana a viri i habi ne mua a bret muholi na hunu,

³³a vuhuna a bret na Vure, ra viri i pe a hunu i puru valai, i habi a nimahuri ne huriki na malala.”

³⁴Lakea ri ta maea, “Bakovi dagi, o habi vakaroroa ne mia ra bret iea.”

³⁵Muri e Isu i vakalongo ria, i ta maea, “Iau a Bret na nimahuri. E huriki ri valai nau i uka ma ri gi vitolo tabu. E huriki ri luhoi tora iau i uka ma ri gi marohu tabu.

³⁶I manga a hini a taki muga mua vona, mu matai iau, pali i uka ma mu luhoi tora iau ma.

³⁷E huriki a bakovi a ngatavine e Tata i habi nau, bara ri valai nau. E huriki ri valai nau, i uka ma ga tono mule ria,

³⁸a vuhuna iau a pe a hunu a puru valai. Iau i uka ma a muri mai a ningaru nau. A muri mai a ningaru na viri i rudu iau a valai.

³⁹A ningaru vona i maea: e huriki a bakovi a ngatavine a Vure i habi nau, i uka tara viri ne ria ge velu. Ga vakamahuri mule ria lobo na nilobona parava,

⁴⁰a vuhuna e Tata i ngaru e huriki lobo ri matai iau, e Tuna, lakea ri luhoi tora iau, ri gi bole a nimahuri vakaroro. Muri na nilobona parava, bara vakamahuri mule ria na matenga.”

⁴¹Lakea e huriki a Iuda ri ta bara­ngungu, a vuhuna e Isu i ta maea, “Iau a bret a valai na hunu.”

⁴²Pali ri ta maea, “Ra bakovi iea, i luhoi ge ia e rei? Ra bakovi iea e Isu, e tune Iosep. Si lohoka ne tamana rua e kinana. Pali i navai i takia ta i valai na hunu?”

⁴³E Isu i koli, i ta maea, “Naha ni vata barangungu.

⁴⁴I uka tara viri ge valai nau na ningaru vona kunana. E Tata i rudu iau a valai, lakea bara i tuli e huriki i ngaru, ri gi valai mai iau. Muri na nilobona parava bara vakamahuri mule ria.

⁴⁵Hosi e huriki a propet ri here puru a ngava i maea, ‘A Vure bara i tovo e huriki lobo.’ E rei a viri i longo maia e Tata, i bole a lohokanga vona, bara i valai nau.

⁴⁶I uka tara viri ge masia e Tata. A viri i valai na Vure, ia kunana i masia e Tata.

⁴⁷A taki muholi mua, a viri i luhoi tora ia bara i bole a nimahuri vakaroro.

⁴⁸Iau a bret na nimahuri.

⁴⁹E huriki e tubune mua ri kani a mana na tahuna ri laho viliha na robo i ngeki. Pali ri mate pali.

⁵⁰Pali i tahoka a bret i valai na hunu. E huriki ri kani a bret iea i uka ma ri gi mate.

⁵¹Iau a bret na nimahuri a valai na hunu. E huriki ri kania a bret iea bara ri mahuri vakaroro. Ra bret iea a bobogu, ga habia ne huriki na malala ri gi bole a nimahuri.”

⁵²Muri e huriki a Iuda ri vahehe, ri ta maea, “Ra bakovi iea ge habi navia ne hita a bobona si gi kania?”

⁵³Lakea e Isu i taki ria, i ta maea, “A taki muholi mua, e rei a viri i uka ma i kani a bobona Tuna Bakovi, i uka ma i ninu a darana, i uka ma ge bole a nimahuri.

⁵⁴A viri i kani a bobogu, i ninu a daragu bara i bole a nimahuri vakaroro, muri na nilobona parava bara vakamahuri mulea na matenga.

⁵⁵A bobogu a kinani muholi, a daragu a naru muholi.

⁵⁶E huriki ri kani a bobogu ri ninu a daragu, bara ri made turagu. Iau tara bara made turane ria.

⁵⁷E Tata ia a Vure mahuri, i rudu iau a valai. Iau a bole a nimahuri na nitora ne Tata. I mavonga kunana a viri bara i kani iau, bara i mahuri na nitora nau.

⁵⁸Iau kunana ra bret a valai na hunu. E huriki e tubune mua ri kani a mana, ri mate pali. Pali e rei a viri i kania a bret iea i uka ma ge mate, bara i mahuri vakaroro.”

⁵⁹E Isu i taki a ngava nga na tahuna i vara na roho na vaponga o Kapernaum.

⁶⁰Na tahuna e huriki a murimuri vona ri longo a ngavana, i kupo ne ria ri ta maea, “Ra ngava iea i mava hateka. E rei a viri ge longoa?”

⁶¹E Isu i lohoka vona e huriki a murimuri vona ri ta kutukutu, lakea i nana ria, “Ra ngava a takia, mu marikoi vona?

⁶²Pali mu gu luhoi navai na tahuna mu gu masia a Tuna Bakovi ge sike tabu na murina i made muga vona?