Ioanes 5:35-47

³⁵Ia ra lamp i birabirao ma i pupua, ma ava ga ongo ba avat a gugu papa ta ra kapana.

³⁶A varvai ure iau go kari i ngala ta dir ma nina kai Ioanes; tago nam ra lavur papalum Tama i ga tul tar ia tagu, ba ina pait ot pa diat, nam diat muka iau papait diat, dia varvarveai tagu, ba Tama i ga tulue iau Uti.

³⁷Ma Tama i ga tulue iau uti i tar varvai bula ure iau. Pa ava ga valongore boko ra nilaina, ma pa ava gire boko ra pal a pakana.

³⁸Ma kana tinata pa i kiki ta vavat; tago nina ba i ga tulue uti pa ava nurnur tana.

³⁹Ava lukluk ra Buk Tabu, tago ava nuk ia ba kavava nilaun tukum tana; ma go muka i varvarveai ure iau;

⁴⁰ma pa avat a vana tadav iau, upi avat a vatur vake ra nilaun.

⁴¹A pite varpa tai ra tarai pa iau vatur vake.

⁴²Ma iau nunure avat, ba ra varmari kai God pa i ki ta vavat.

⁴³Iau vana rikai ma ra iang i Tamagu, ma pa ava kapupi iau; ba ta ra tikai i vana rikai ma ra iangina iat, avat a kapupi ia.

⁴⁴Avat, ava ruru vargiliane avat, ma pa ava nuk upi nam ra variru kai ra kopono God, avat a nurnur dave?

⁴⁵Koko ava nuk ia ba iau ina takun avat tai Tama; ta ra tikai i takun avat, Moses, nina ava nurnur tana.

⁴⁶Tago gala ava tar nurnur tai Moses, gala avat a nurnur tagu bula, tago i ga tutumu ure iau.

⁴⁷Ona pa ava nurnur ta kana lavur tutumu, avat a nurnur dave ta kaugu lavur tinata?