Ioanes 5:31-44

³¹Si man nau napo amalmalangasai tatag, au kag amalmalangasai kapo palau.

³²Sikei kapo togon a mang sikei kapo amalmalangasai ta nau napo tutuman, na napo nas ta sa kapo posong ia kapo tutuman.

³³Mita asok vap ane si Ioanes na kanla amalangasai animi ta tutuman.

³⁴Tutuman, parik napa lomon alava na amalmalangasai le kuli vunep, sikei napo posong ia animi, ani mi sapang.

³⁵Katapo bil val alimang, kata mangai amalangas animi, na mila uruk tusopo palau si malangas ina.

³⁶Sikei nau napo atogon a akuskus kapo laba soliu a anu ang si Ioanes. Using a abis ang mamai katala alis iau tatana asi kag abis apunuk ania, na kana nalapo teng ia, nambang kapo mengen amalangas ta mamai kata asok iau.

³⁷Na mamai voiang kata asok iau, nia akorong katala amalmalangasai tatag. Nami, parik luai mitapa longong a kalingana vo arai ani nona,

³⁸na kana mengen parik kapa sinong nei vingami, using parik mipa lomlomon ta igenen ang God kata asok ia.

³⁹Mipo uli tataot aro palau ani keve mengen i nei salsalik, using mipo lomon ia ta singina palau mi togon to asikei. Keve mengen i nei salsalik ang nang kipo amalmalangasai palau tatag,

⁴⁰sikei mipo misag ani me serei singig ani mime luk a to.

⁴¹Parik napa ainak ani urmaus le si ri vap,

⁴²sikei napo nas imi. Napo nas ta kana lau i vinga ro na God kapo kovek singimi.

⁴³Nata serei si asan i mamai, na parik mipa ainak suak anig, sikei man a sikei ka serei ta asan ina akorong, au mila ainak ania.

⁴⁴Mipo uli buk alatun angpokpokai pok animi, sikei parik mipa buk kana alatun a ring sikei a God ke. Au man asukang, mi tav angkoai si lomlomon.