Ioanes 5:2-45

²Len pil eu mi Ierusalem impan im en sip, me ad a Petesda ni lokaia en Ipru; im limau mi impa,

³Me somau toto mi lole: Me maskun, o me dangidang, o me motor mia, auiaui lao pil o pan mokimokid.

⁴Pwe akai ansau tounlang amen kin koti dong le o kamokideda pil o, a meamen me madang tiong mas nan pil o ni a mokimokid, iei me kin maureda sang a somau kan karos, me mi re a.

⁵A aramas amen mia, me somauki par sileisokwalu.

⁶Iesus lao kotin masani men et a wonon, ap kotin mangi, me a wonon ansau warai, ap kotin masani ong i: Koe so men kelailada?

⁷Ol somau potoan ong i: Maing, sota nai aramas, me pan wa ia di wong ni pil o ansaun a mokideda. Pwe ni ai kokodi, amen kin madang mo i.

⁸Iesus ap kotin masani ong i: Uda, ale ki om, kokowei!

⁹Aramas o ap madang kelailadar, kida ki e, alu wei, a ran o ran en sapat.

¹⁰Sus oko ap indai ong me kelailadar: Ran wet ran en sapat. A sota pung koe en wewa sili ki om.

¹¹A sapeng irail: Me kakela ia da, masani ong ia: Ale ki om koko wei!

¹²Irail ap kalelapok re a: Is aramas o me indai ong uk: Ale ki om kokowei?

¹³A me kelailadar sasa i, pwe Iesus kotila sanger, pwe pokon mi wasa o.

¹⁴Kadekadeo Iesus kotin diaradar i nan im en kaudok o ap kotin masani ong i: Kilang, koe kelailadar, koe der pil wia dip, pwe me sued kot sang mas de ko dong uk!

¹⁵Aramas o ap koieila, kaireki Sus oko, me Iesus kakeladar i.

¹⁶I me Sus oko ap raparapaki Iesus, o masamasan, pwen kamela i, pweki a kotin wiadar meakan ni ran en sapat.

¹⁷Iesus kotin sapeng irail: Sam ai kin dodok kokodo, a ngai pil iang dodok.

¹⁸I me Sus oko ap masamasan melel, en kamatala i, pweki a kotin kawela ran en sapat o pil masani, me dene Kot Sam a, o a kaparoki ong pein i Kot.

¹⁹Iesus ap kotin sapeng masani ong irail: Melel melel I indai ong komail, a sota kak, Na en pein wia meakot, pwe i eta, me a kilang ren Sam, me a wiada. Pwe me a kin wiada, iei me Na pil kin wiada.

²⁰Pwe sam pok ong Na o kasansale ong i karos, me pein i kin wiada. O a pan kasale ong i wiawia kan, me lapa sang met akan, pwe komail en puriamui kila.

²¹Pwe duen Sam kin kapikapirida me melar akan, kamaur ir ada, iduen Na pil kamaureda me a mauki.

²²Pwe sota me Sam kin kadeikada, pwe a kotiki ong Na kadeik o.

²³Pwe karos en wauneki Na, dueta ar wauneki Sam. Me sota wauneki Na, sota kin wauneki Sam, me kadar i dor.

²⁴Melel, melel I indai ong komail, meamen rong ai padak o poson, me kadar ia do, a aneki maur soutuk. A a sota pan pangalang kadeik o, pwe a sapale sang mela sapal ong maur.

²⁵Melel, melel I indai ong komail, ansau kokodo, iei a leler, me melar akan pan rongada ngil en Nain Kot, a me rongadar pan maureda.

²⁶Pwe duen Sam a udan maur, iduen a ki ong Na, en pil udan maur.

²⁷O a kotiki ong i manaman, en kaunda kadeik o, pweki Nain aramas i.

²⁸Der puriamuiki met, pwe ansau kokodo me irail, me mi nan sousou kan, pan rong ngil a.

²⁹Irail ap pan pwarada: Me wiadar me mau, en maureda, pwen memaur, a me wiadar mesued, en maureda, pwen pangalang kadeik o.

³⁰Sota me I kak wiada sang pein ngai, duen me I kin rong, iduen I kin kadeikada, o ai kadeik me pung, pwe I sota kin rapaki insen ai, pwe kupur en i, me kadar ia do.

³¹Ma I kadede pein ngai, ai kadede sota melel.

³²Amen me kadede ia, a I asa melel, me a kadede ia me melel.

³³Komail me ilakilang Ioanes, i ari me kadede melel.

³⁴A I sota kin ale kadede ren aramas, a iet me I indawei, pwe komail en dorola.

³⁵I me ser umpul o marain eu, a komail men perenki a marain ansau kis.

³⁶A ai kadede me lapa sang en Ioanes. Pwe dodok kan, me Sam o kotiki ong ia, I en kapwaiada, iei dodok kan, me I kin wiawia, me kadede ia, me Sam kadar ia dor.

³⁷A Sam, me kadar ia dor, pein i kadede ia. Komail sota rongadar ngil a, o sota kilang mom a.

³⁸O a masan sota kin kot re omail, pwe komail sota poson, me a kadarador.

³⁹Komail kin kalelapok nan kisin likau kan, pwe komail lamelame, me maur soutuk mi lole. Ari, iei irail, me kin kadede ia.

⁴⁰A komail kang ko dong ia, pwe komail en aneki maur.

⁴¹I sota kin mauki ale wau ren aramas akan.

⁴²I asa komail, limpok en Kot sota kin mi re omail.

⁴³I kodo ni mar en Sam ai, a komail sota kin kasamo ia. A ma amen pan kokido pein ad a, komail pan kasamo i.

⁴⁴Pala komail kak poson ni omail ngongongki wau ren aramas, ap sota rapaki wau sang ren Kot.

⁴⁵Der kiki ong, me I pan mpäkin komail ren Sam, amen me kin mpäkin komail: Moses, me komail kin kaporoporeki.