Ioanes 3:8-33

⁸Ang kin pein ipip sili, o koe kin rong ngil a, a koe sasa, wasa a tapi sang ia o wasa a ko ong ia; iduen amen amen, me ipwiki Ngen.

⁹Nikodemus sapeng indai ong i: Iaduen mepukat kak wiaui?

¹⁰Iesus kotin sapeng masani ong i: Saunpadak en Israel amen koe, a koe sasa duen mepukat?

¹¹Melel, melel I indai ong uk, me se asadar, iei me se kin indada, o me se kilanger, iei me se katitiki, a komail sota kin kamelele at kadede.

¹²Ma I katitiki ong komail men pa, a komail ap sota kamelele, a iaduen, komail pan kamelele, ma I katitiki ong komail men nanlang?

¹³Sota meamen, me kodala nanlang, i eta, me kodido sang nanlang, Nain aramas, me kin mimieta nanlang.

¹⁴Duen Moses me kauadar serpent amen nan sap tan, iduen Nain aramas pan kakauda.

¹⁵Pwe meamen posonla i, sota pan lokidokila, a en aneki maur soutuk.

¹⁶Pwe iet duen Kot kotin kupura sappa, me a kotikidoki sapwilim a Ieros, pwe karos, me posonla i, ender salongala, a en aneki maur soutuk.

¹⁷Pwe Kot me kotin porone dong sappa sapwilim a Ol, kaidin en kadeikada sappa, a pwe sappa en kamauri kila i.

¹⁸Me poson i, sota pan pakadeikada, a me so poson i, iei pakadeikadar, pweki a sota poson mar en sapwilim en Kot ieros.

¹⁹A iet kadeik o, marain pwara dong sappa, a aramas pok ong rotorot mon marain, pweki ar wiawia kan me sued.

²⁰Pwe amen amen, me wiawia sued, kin kailongki marain, o sota kin pwara dong marain, pwe a wiawia kan de sansaleda.

²¹A me wiawia melel, kin ko dong marain, pwe a wiawia kan en sansaleda, me re tapi sang ren Kot.

²²Murin mepukat Iesus o sapwilim a tounpadak kan kotilang sap en Iudäa ap kotikot ia wia paptais.

²³A Ioanes pil wia paptais Enon koren iong Salim, aki pil toto mi wasa o, irail ari koieila paptaisela.

²⁴Pwe Ioanes saikenta lokidokilar nan imateng.

²⁵En Ioanes a tounpadak kan o ol en Sus amen ap akamaiki pena duen kamakelekel.

²⁶Irail ari ko dong ren Ioanes indang i: Rapi, me kot re omui palilan Iordan, me komui kin kadede, masani, a kin wia paptais o karos kin pwarala re a.

²⁷Ioanes sapeng masani: Aramas amen sota kak aneki meakot, ma a so aneki sang nanlang.

²⁸Komail pein kadede kin ia, me i indada: Kaidin Kristus ngai, pwe ngai me pakatarador mo a.

²⁹Me li amen kisin nin ong, iei ol kamod. A kompoke pan ol kamod kin u rongerong perenki ngil en ol kamod; ari, iei ai peren unsokala.

³⁰I en kakairida, a ngai en kakairidi.

³¹Me kotido sang poa, i me poedi karos, a me kisan sappa, iei men sappa, o a kin kasokasoia duen sappa. A me kotido sang nanlang, me poedi karos,

³²O me a kilangada o rongada, iei me a kin kadedeki, a sota me kamelele a kadede.

³³A me kamelele a kadede, kin kadede, me Kot me melel.