Ioanes 20:1-28

¹Na hatelanga pokopoko na mugana parava na vik, i tabana ni rodo a hini, e Maria Magdala i lakea na babe turana ranga ngatavine, ri masia a kedo ni kule tala na matana babe.

²Lakea i nunu hamule i vakalongo e Simon Petrus turana murimuri tara, ra i ngaru hatekea e Isu. Lakea i taki rua, i ta maea, “Ni bole tala pali na babe a podane Bakovi Dagi, pali ngane i uka ma mete lohoka vona ni ru vai!”

³Lakea e Petrus turana murimuri iea ru nunu lakea na babe.

⁴A murimuri tara i redea e Petrus, i bele muga na babe.

⁵I tuku dili i matai a maka lavalava i tabuli, ra ni bunu e Isu vona. Pali i uka ma i dili.

⁶Muri e Simon Petrus, ra i nunu muri vona, i bele, i dili liu na babe, i matai a lavalava i tabuli vonga,

⁷turana lavalava ni bunu a gina vona. Ra lavalava ni bunu a gine Isu vona ni pilu kamumu, ni ru here.

⁸Muri a murimuri, ra i bele muga, i dili. I matai a maki nga, lakea i luhoi tora.

⁹Pali i uka ma i matakilaka vona ma a ngava ni here puru na Hinere i taki e Isu ge mahuri mule na matenga.

¹⁰Muri ru hamule lakea na tanga ne rua.

¹¹Pali e Maria i pesi polovavo na babe i tangi. Na tahuna i tangi, i tuku dili na babe.

¹²I matai a agelo ala rua, ru rodo a varakia keakea, ru made vona a hini ni ru a podane Isu vona. I made na murina gina tara, i made na murina vahana tara.

¹³Lakea ru nanea, “Ngatavine, i navai o tangi?” Lakea i koli, i ta maea, “I ranga e huriki ri bolea a podane Bakovi Dagi nau, pali i uka ma a lohoka vona i vai a hini ri rua vona.”

¹⁴I ta lobo, lakea i ngala kapulo i masia e Isu i pesi, pali i uka ma i matakilalea.

¹⁵Lakea e Isu i nanea, “Ngatavine, i navai o tangi? E rei a viri o mata­kanea?” A ngatavine i luhoi ta ia a matakari na hania, lakea i takia, “Bakovi, ge ioe a viri o bolea, o taki iau vona a hini o rua vona, ga vano ga bolea.”

¹⁶Lakea e Isu i galea a rana, i ta maea, “Maria.” Lakea e Maria i matanonoa, i gale tala na nita Aram, i ta maea, “Raboni!” I manga a “Mari ni tovo.”

¹⁷Lakea e Isu i takia, i ta maea, “Naha ni nugu iau, a vuhuna i uka ma a hamule lakea ma ne Tata. Pali ngane o hamule lakea ne huriki a turagu, o taki ria, ‘Iau ga hamule lakea ne Tata ne Tamane mua, na Vure nau a Vure ne mua.’”

¹⁸Lakea e Maria Magdala i hamule lakea ne huriki a murimuri i vakalongo ria, i ta maea, “Iau a masia a Bakovi Dagi.” Muri i vakalongo ria vona a ngava e Isu i taki ia vona.

¹⁹Na malunga na parava iea, a mugana parava na vik, e huriki a murimuri ri made vapopo pololilo, ri tukari a logo a vuhuna ri mangenge ne huriki a Iuda. E Isu i bele, i pesi na kurukurune ria, i ta maea, “Mu made na nivalemu!”

²⁰I taki lobo a ngava nga, lakea i vakasiri ria vona a limana i rua, a kamagana. Na tahuna ri masia e Bakovi Dagi, ri pitei hateka vona.

²¹Lakea e Isu i taki tabu ria, i ta maea, “Mu made na nivalemu. Iau a rudu mua i manga e Tata i rudu iau.”

²²I ta mavonga lobo, lakea i bango taho ria, i ta maea, “Mu bolea a Hanu Kiripiripi.

²³Na tahuna mu puga vuroki a naro hale ne huriki, a naro hale ne ria ni puga. Pali na tahuna i uka ma mu puga a naro hale ne ria, a naro hale ne ria i uka ma ni gi puga.”

²⁴Na tahuna e Isu i bele taho e huriki a murimuri, a turane ria tara i uka ma ia vonga. Ra bakovi iea e Tomas, a rana tara e Boge.

²⁵E huriki a murimuri ranga ri takia, ri ta maea, “Mi masia pali e Bakovi Dagi!” Lakea e Tomas i taki ria, i ta maea, “Iau bara matai a harena nil na limana, bara nugu a harena nil na kukulimagu, bara ru dili a limagu na kamagana, bara luhoia a ngavane mua i muholi.”

²⁶A parava i polorua i lobo, e huriki a murimuri ri vapopo tabu na ruma. E Tomas i turane ria ngane. A maka logo ni tukari lobo, pali e Isu i valai, i pesi na kurukurune ria, i ta maea, “Mu made na nivalemu!”

²⁷Muri i takia e Tomas, i ta maea, “O matai a limagu, o rua koea a kuku limamu. O toto vilia a limamu, o ru dilia na harena maheto na kamagagu. Naha ni loho rua, o luhoi tora.”

²⁸Lakea e Tomas i koli, i ta maea, “Bakovi Dagi nau, Vure nau!”