Ioanes 19:8-42

Click on verse(s) to share them!

⁸Na tahuna e Pilato i longoa a ngava iea i mangenge hateka,

⁹lakea i hamule dili na ruma, i nanea e Isu, “I vai a hini o valai vona?” Pali e Isu i uka ma i koli.

¹⁰Lakea e Pilato i ta maea, “I navai o longo vulai? Ioe o uka ma o lohoka nau? Iau a tahoka a nitora ni kori ioe bara o pagitala, o ni paditata ioe na kai tavalavala na ningaru nau.”

¹¹E Isu i koli, i ta maea, “A Vure a viri i habi a nitora vomu. Ia i uka ma ge habia vomu a nitora iea, i uka ma go tahoka a nitora ni rabalaki iau. Pali a viri i habi iau na limamu, a naro hale vona i dagi hateka na naro hale vomu.”

¹²Na tahuna e Pilato i longoa a ngava iea i toni ni taparakia e Isu ge vano. Pali e huriki a Iuda ri gale dagi, ri ta maea, “Ioe bara o taparakia a bakovi iea ge vano, i uka ma ioe a turane Kaiser tabu. A viri i takia ta ia a hariki, ia a pile ne Kaiser.”

¹³Na tahuna e Pilato i longoa a ngava iea, i tuli talea e Isu, i made puru na gula na mari na nipelekado na tabeke tara ni gale e Kedo Kei, na nita Aram ni gale e Gabata.

¹⁴Ra parava iea a parava ni kisi puru a maki ni kani na Habu na Nipagepolo. Ngane a kuru haro. Lakea e Pilato i taki e huriki a Iuda, i ta maea, “Mu masia a hariki ne mua.”

¹⁵Pali ri gale tala ria, ri ta maea, “O rabalakia! O rabalakia! O paditatea na kai tavalavala!” Lakea e Pilato i nana ria, “Mu ngaru ga paditatea na kai tavalavala a hariki ne mua?” E huriki a prister dagi ri koli mule, ri ta maea, “Mi uka a hariki. A hariki ne mia e Kaiser kunana, ra hariki o Rom.”

¹⁶Ngane e Pilato i longo, i habia ne ria e Isu, ri gi paditatea na kai tavalavala. E huriki a nugumaheto ri tuli poloa e Isu.

¹⁷E Isu i kalohoa a kai tavalavala vona, i lakea mai a Tanga na Tuhana Gigi, na nita Aram ni gale e Golgota.

¹⁸Na tahuna ri bele vonga ri paditatea na kai tavalavala turana bakovi ala rua. A bakovi tara i tavore na maurine Isu. A bakovi tara i tavore na kanena.

¹⁹Muri e Pilato i herea a nita vakalohoka, i habia na bakovi tara, i topia na kai tavalavala. A nita ni here i maea, “E Isu o Nasaret, a Hariki ne Huriki a Iuda.”

²⁰E huriki a Iuda ri ala kupo ri gia a nita vakalohoka iea, a vuhuna a tanga ni paditata e Isu vona i tabukoi o Ierusalem. A nita vakalohoka ni here na nita Aram, na nita Latin, na nita Grik.

²¹E huriki a prister dagi ne huriki a Iuda ri koi, ri takia e Pilato ri ta maea, “Naha ni here mavongea, ‘A hariki ne huriki a Iuda.’ O here maea, ‘I taki ta ia a hariki ne huriki a Iuda.’”

²²Pali e Pilato i koli, i ta maea, “A ngava a here pali, i uka ma ga puloa.”

²³Na tahuna e huriki a nugumaheto ri paditata loboa e Isu, ri bole a varakia vona, ri vaveru na tabekena i va. Pali a padirodo vona pololilo ni rahi bolabola,

²⁴lakea ri ta maea, “Nahea si gi rapea. Si varangi vona na rihiva na satu. A viri ge maragisi, bara i bolea.” Na tahuna ri ta maea, a ngava ni here puru hosi na Hinere i bele muholi. A ngava iea i maea, “Ri vaveru vona a varakia nau. Ri varangi vona a padirodo nau na rihiva na satu.” Lakea e huriki a nugumaheto ri rata mavonga kunana.

²⁵E Maria kinane Isu, e tarine kinana, e Maria girihine Klopas, e Maria Magdala to pesi tabukoi na kai tavalavala ne Isu, to matanono.

²⁶Na tahuna e Isu i matai e kinana turana murimuri i ngaru hatekea ru pesi tabukoi, lakea i takia e kinana, “Nana, ra bakovi iea e tumu.”

²⁷Muri i takia a murimuri, i ta maea, “Ra ngatavine iea e kinamu.” I vakatubu na parava iea ngane, a murimuri iea i matakaria e Maria.

²⁸Ngane e Isu i lohoka vona a leho vona i lobo pali, lakea i ta maea, “Iau a marohu.” I ta maea ge bele muholi a ngava ni here puru hosi na Hinere.

²⁹A ulo i vona a vain vagole i tabuli tabukoi, lakea e huriki a nugumaheto ri bolea a niduvi, ri lutua na vain nami hurari, ri kolotatea na rahana kai a hisop, ri toto rikea, ri vakadame e Isu vona.

³⁰E Isu i dame loboa a vain, lakea i ta maea, “I lobo.” I taki loboa a ngava iea, i marave puru a lohona, i mate.

³¹Muri e huriki a Iuda ri nanea e Pilato ri gi ubi putu a vahane Isu turana bakovi ala rua nga, ni gi paru tala tou na kai tavalavala. Ri nana mavongea a vuhuna kuduvi a Parava Nimalo. Ra Parava Nimalo iea a parava dagi hateka, lakea e huriki a Iuda ri koi vona a podane tou ge tavore na kai tavalavala.

³²Lakea e huriki a nugumaheto ri vano ri ubi putu a vahana bakovi ala rua, ra ni paditata turane Isu.

³³Pali na tahuna ri bele ne Isu, ri masia i mate pali, lakea i uka ma ri ubi putu a vahana.

³⁴Pali a nugumaheto tara i padia na maheto a kamagane Isu, i maguru tala malaviriri a dara a naru.

³⁵Ra bakovi i matai a dara a naru i maguru tala, i vakalongo e huriki. A ngavana i muholi. I lohoka vona a hini i taki i muholi, i vakalongo mua, lakea mua ranga mu gu luhoi tora.

³⁶Ra maka naro nga i bele ge ramai a ngava ni here puru na Hinere i ta maea, “I uka tara tuhana ge maputu.”

³⁷A ngava tara ni here puru na Hinere i ta maea, “Ri gi matanonoa a viri ni padi.”

³⁸Muri e Iosep o Arimatea i vano i nanea e Pilato ge bolea a podane Isu. E Iosep a murimuri ne Isu, pali i uka ma i vakasiri kavakava ia, a vuhuna i mangenge ne huriki a Iuda. E Pilato i longo vona ge bolea a podane Isu, lakea e Iosep i vano i bolea.

³⁹E Nikodemus, ra bakovi i valai ne Isu na rodo, ia tara i turana. E Nikodemus i bole vilia a mangisipa ni vuli na totona kai a mir, a kai a aloe, a nimavana i 30 kilo.

⁴⁰Ru vano, ru bole purua a podane Isu, ru biria na mangisipa, ru bolea a lavalava karaba, ru bunua a podana. Ru muri mai a naro hosi ne huriki a Iuda na viri i mate.

⁴¹Na tabeke ni paditata e Isu vona na kai tavalavala, i tahoka tara hania. Pololilo na hania iea i tahoka tara babe ni keli puru karaba. I uka ma ni tanu a viri vona ma.

⁴²Ru vakatabulia vonga a podane Isu, a vuhuna i popote ge rolo a haro, pali a parava iea, a parava ni kisi puru a maki ni kani na Habu na Nipagepolo, ra habu ne huriki a Iuda.