Ioanej 6:46-68

⁴⁶Ari, kaidin pweki meamen kilan Jam; i eta, me kodo jan ren Kot, i me kilaner Jam.

⁴⁷Melel, melel I indai on komail, me pojon ia, iei me aneki maur joutuk.

⁴⁸Prot en maur nai.

⁴⁹Jam omail oko, me kanala mana nan jap tan o, ir ari melar.

⁵⁰Met prot, me kodido jan nanlan, meamen kin kan jan i, jota pan mela.

⁵¹Nai prot maur, me kodido jan nanlan, meamen kan jan prot wet, pan memaur kokolata. Prot, me I pan kida, iei uduk ai, me i pan kida en kamaur kida jappa.

⁵²Juj oko ari akamaiki pena indada: Iaduen men et pan kak ki on kit uduk a jen kan?

⁵³Iejuj ap kotin majani on irail: Melel, melel I indai on komail, ma komail jota pan kan uduk en Nain aramaj o nim nta, jota maur omail.

⁵⁴Me kin kan uduk ai o nim nt’ ai, iei me aneki maur joutuk, a I pan kamaureda i ni ran nik o.

⁵⁵Pwe mana melel uduk ai, o pil melel nt’ ai.

⁵⁶Me kin kan uduk ai o nim nt’ ai, iei me podidi on ia o nai podidi on i.

⁵⁷Duen Jam ieiaj kadar ia do, o nai memaureki Jam, iduen me kan uduk o nt’ ai, pan meaureki nai.

⁵⁸Iet prot, me kodido jan nanlan, kaidin duen jam omail akan, me kanala mana ap mela, a meamen kin kan prot wet, pan memaur kokolata.

⁵⁹Mepukat a kotin majani wei nan jinakoke, ni a kotin kawewe nan Kapernaum.

⁶⁰Ari, me toto ren japwilim a tounpadak kan, me ronadar mepukat indada: Padak pot et meid apwal! Ij me kak ron?

⁶¹Iejuj lao kotin ani nan kupur a, me japwilim a tounpadak kan lipanedeki mepukat, ap kotin majani on irail: Komail makaraki mepukat?

⁶²A ma komail pan kilan Nain aramaj kodala waja, me a kaujon ia maj o?

⁶³Nen me kin kamaureda, a uduk jota katepa. Padak kan, me I kin padapadaki on komail, iei Nen o maur.

⁶⁴A akai mi re omail, me jo pojon. Pwe Iejuj kotin mani, me jo pojon o me pan panala i.

⁶⁵A kotin majani: I me I indaki on komail, jota me kak ko don ia, ma Jam jota kainonido.

⁶⁶Jan ni anjau o japwilim a tounpadak kan toto mueiwei jan o jolar idauen i.

⁶⁷Iejuj ap kotin kainoma ren ekriamen oko: Komail pil pan kola?

⁶⁸A Jimon Petruj ap japen i: Main, ij me je en ko on? Pwe ar majan akan iei maur joutuk.