Ioanej 6:27-55

²⁷Komail der dokki mana, me kin ola, a dokki mana me kin mimieta on maur joutuk, me Nain aramaj pan ki on komail, pwe i me Kot Jam kileledier.

²⁸Irail ap potoan on i: Da me jen wiada, pwen kapwaiada en Kot a dodok kan?

²⁹Iejuj kotin japen majani on irail: Iet en Kot a dodok: Komail en pojon i, me a kadarado.

³⁰Irail ari potoan on i: Kilel da, me re kotikida, pwe jen kilan o pojon ir? Da me re kotin wiada?

³¹Jam at akan me kanala mana nan jap tan o, duen a intinidier: A kotiki on irail prot jan nanlan, en kanala.

³²Iejuj ap kotin majani on irail: Melel, melel I indai on komail, kaidin Mojej, me ki on komail prot jan nanlan, a Jam ai kin ki on komail prot melel jan nanlan.

³³Pwe me kodido jan nanlan, o ki on jappa maur, iei prot en Kot.

³⁴Irail ap indan i: Main, kotiki don kit prot wet kaukaule!

³⁵Iejuj kotin majani on irail: Prot en kamaur nai, me ko don ia jolar pan men manadar, o me pojon ia, jolar men nim piladar.

³⁶A I indai on komail er, komail kilan ia er, ap jo pojon la.

³⁷Karoj me Jam ki on ia, pan ko don ia, a me ko don ia, I jota pan kajela.

³⁸Pwe nai kodido jan nanlan, kaidin pwen wiada injen ai, pwe kupur en i, me kadar ia do.

³⁹Pwe iet kupur en me kadar ia do, karoj me a ki on ia er, I ender kajela amen, pwe I en kamaureda ni ran nik o.

⁴⁰A iet kupur en Jam ai, amen amen, me kin kilan Na o pojon i, en aneki maur joutuk, a I pan kamaureda i ni ran nik o.

⁴¹Juj oko ap lipanedeki i, pweki a kotin majani: Nai prot, me kodi jan nanlan.

⁴²Irail indada: Kaidin i Iejuj nain Iojep? A jam a o in a je aja. Ari, daduen a indada: I kodido jan nanlan?

⁴³Iejuj kotin japen majani on irail: Komail der lipaned nan pun omail!

⁴⁴Jota me pan kak ko don ia, ma Jam, me kadar ia dor, jota kainonido i. A I pan kamaureda i ni ran nik o.

⁴⁵A intinidier nan jaukop akan: Irail karoj pan ale padak jan ren Kot. Amen amen me ronadar o padakki ren Jam, kin ko don ia.

⁴⁶Ari, kaidin pweki meamen kilan Jam; i eta, me kodo jan ren Kot, i me kilaner Jam.

⁴⁷Melel, melel I indai on komail, me pojon ia, iei me aneki maur joutuk.

⁴⁸Prot en maur nai.

⁴⁹Jam omail oko, me kanala mana nan jap tan o, ir ari melar.

⁵⁰Met prot, me kodido jan nanlan, meamen kin kan jan i, jota pan mela.

⁵¹Nai prot maur, me kodido jan nanlan, meamen kan jan prot wet, pan memaur kokolata. Prot, me I pan kida, iei uduk ai, me i pan kida en kamaur kida jappa.

⁵²Juj oko ari akamaiki pena indada: Iaduen men et pan kak ki on kit uduk a jen kan?

⁵³Iejuj ap kotin majani on irail: Melel, melel I indai on komail, ma komail jota pan kan uduk en Nain aramaj o nim nta, jota maur omail.

⁵⁴Me kin kan uduk ai o nim nt’ ai, iei me aneki maur joutuk, a I pan kamaureda i ni ran nik o.

⁵⁵Pwe mana melel uduk ai, o pil melel nt’ ai.