Ioanej 6:2-26

²A pokon kalaimun me idedauen i pweki ar kilaner kilel akan, me a kotin wiai on me jomau kan.

³Iejuj ap kotidala pon dol o, kaipokedi waja o ren japwilim a tounpadak kan.

⁴A paja o, ran lapalap en Juj oko me korendor.

⁵Iejuj lao kotin majanda majani pokon kalaimun koko don i, ap kotin majani on Pilipuj: Ia waja, jen neti jan ia kijin mana, pwe mepukat en mana?

⁶A kotin majani mepukat, pwen kajonejon i. Pwe pein i mani, me a pan wiada.

⁷Pilipuj potoan on i: Prot me denar riepuki jota pan itar on irail, pwe amen amen en tunole ekij.

⁸Andreaj, japwilim a tounpadak amen, ri en Jimon Petruj potoan on i:

⁹Kijin putak amen mia, me a lopon en prot limau o mam riamen, a jota katepa ren me toto.

¹⁰Iejuj kotin majani: Kamod on irail edi! Ari, waja o me reen. Impan ol limekid ap mondi.

¹¹Iejuj ap kotikida lopon ko, a lao laolaoki, ap kotin nek on irail me mondier, pil dueta mam oko, irail lao metilar.

¹²Irail lao metier, a kotin majani on japwilim a tounpadak kan: Ki pena me lua, pwe ekij der lokidokila!

¹³Irail ap ki pena kopou eijokriau kijan lopon ko, me luadi murin arail mana.

¹⁴Aramaj akan lao kilaner kilel o, me Iejuj kotin wiadar, re ap indada: Melel i Jaukop o, me pan pwara don jappa.

¹⁵Iejuj lao kotin mani, me re pan poto don i, pwen kajapwiladan i Nanmarki, ap pil kotidalan nin dol o, kotin kelepala.

¹⁶A lao jautik pena, japwilim a tounpadak kan ap kotilan ni oror,

¹⁷Kereda pon jop pot, kotela kokolan Kapernaum. A lao waja ponier, Iejuj jaikenta ian irail.

¹⁸A jed me iluken, pwe an me ma.

¹⁹Irail jeijei kila mail eijoklimau de rieijok, rap kilanada Iejuj a kotikotido pon jed koren ion jop, irail ap majapwekadar.

²⁰A kotin majani on irail: Nai i komail der majak!

²¹lrail ap men kajamo i pon jop o, a jop o madan milar ni jap o, me re ko on ia.

²²A mandan ran o pokon o, me mi palilan le, lao kilaner, me jota apot jop mi waja o, pwe i eta, me japwilim a tounpadak kan keredan poa, o me Iejuj jota ian japwilim a tounpadak kan kotidan pon jop o, pwe a tounpadak kan kola kelep.

²³A pil akai kijin jop me pwarado jan Tiperiaj, tana don waja o, me re manamana ia, murin Kaun o kotin laolao.

²⁴Aramaj akan lao kilaner, me Iejuj jolar kotikot ia, o japwilim a tounpadak kan pil jo, rap dake jop pot kolan Kapernaum, raparapaki Iejuj.

²⁵Irail lao diaradar i palilan le, ap potoan on: Rapi iad me re kotido?

²⁶Iejuj kotin japen irail majani: Melel, melel I indai on komail, komail kin rapakin ia kaidin pweki kilel akan, me komail kilan, a pweki komail kanala kijin prot ap metier.