Ioanej 4:11-32

¹¹Li o indan i: Main, jota japwilim omui men idip pil, a parer me lol, a ia waja, kom pan idip jan ia pil memaur?

¹²De komui lapa jan jam at Iakop, me kotiki on kit er parer en, o pein nima jan, o na kan, o na man akan?

¹³Iejuj kotin japen majani on i: Karoj, me nima jan pil wet, pan pur on men nim pilada.

¹⁴A meamen, me nima jan pil, me I ki on i, pan jolar men nim pilada kokolata, pwe pil, me I kin ki on, pan pot loli kujukujudan maur joutuk.

¹⁵Li o ap indai on i: Main, kom kotiki on ia kijan pil o, pwe i en jolar men nim pil, o jolar kodo o idipa jan met!

¹⁶Iejuj kotin majani on i: Kowei ukedo om paud!

¹⁷Li o japen indada: Jota ai paud. Iejuj kotin majani on i: Melel om lokaia: Jota ai paud.

¹⁸Pwe om paud me limen maj kokodo, a kaidik om paud, me koe paudeki met; iei melel, me koe indada.

¹⁹Li o indan i: Main, i ap ajaer, me jaukop amen komui.

²⁰Jam at akan kaukaudok pon nana wet, a komail kin inda dene Ierujalem eta waja me aramaj en kaudok ia.

²¹Iejuj kotin majani on i: Li, kamelele ia, a korendor anjaun omail pan jolar kaukaudok on Jam pon nana wet, pil jota Ierujalem.

²²Komail kin jaja, me komail kin kaukaudok on. A kit aja, me je kaukaudok on, pwe kamaur pwarado jan ren men Juj akan.

²³A anjau korendor, ari a leler, me toun kaudok melel akan pan kaudok on Jam ni Nen o melel, pwe iei ta jon en toun kaudok kan, me Jam pil kotin kupura.

²⁴Nen eu Kot, a me kaudok on i, ren kaudokki Nen o melel.

²⁵Li indai on i: I aja, me Mejiaj pan kotido, me maraneki Krijtuj. I lao kotido, a pan katiti on kit meakaroj.

²⁶Iejuj kotin majani on i: Nai i, me lokelokaia on uk.

²⁷A japwilim a tounpadak kan ap purodo, puriamui a majan on li amen. Ari jo, jota me indada: Da me re kotin kainoma, de da me re kotin mamajani on i?

²⁸Li o ap pwilikidi potel en pil o, ap koieilan kanim o kajoi on aramaj akan:

²⁹Kodo, kilan aramaj amen, me kajale on ia karoj, me i wiadar, ma i kaidin Krijtuj?

³⁰Rap koieila jan nan kanim o potodo re a.

³¹Ni anjau ota japwilim a tounpadak kan poeki re a, potoan on: Rapi, re kotin konot!

³²A kotin majani on irail: Kan ai kijin mana mia, me komail jaja.