Ioanej 20:5-30

⁵A lao itiokidi, ap kilanada likau linen wonon, ap jota pedelon on lole.

⁶Jimon Petruj ap kokodo idauen i, ap pedelon on nan joujou o, diarada likau linen ko wonon.

⁷O lim en pudo me pira a kadokenmai, me jota ian likau linen ko; a lim pena waja toror.

⁸A tounpadak teio me tion don joujou o, ap pil ko on lole; i ari diarada o pojonla.

⁹Pwe ira kaikenta weweki kijin likau, me a en iajada jan a matala,

¹⁰Tounpadak ko ap pur oner nan deu ’ra.

¹¹A Maria u liki jal on joujou o janejan. O ni a janejan a poridi, kilanlon on nan joujou o,

¹²Kilanada tounlan riamen momod ia, kapwateki likau pwetepwet, amen liman kadokenmai a amen liman aluwilu a kan, waja kalep en Iejuj kotikot iaer,

¹³Ira ari majani on i: Li, da me koe janejanki? A indai on ira: Aki irail wa janer ai Kaun, a i jaja, waja re kidi on ia i.

¹⁴A lao indada met, ap joupei wei kilaner Iejuj kotia u o jaja, me i Iejuj.

¹⁵Iejuj kotin majani on i: Li, da me koe janejanki? Ij me koe kin raparapaki? A kiki on, me i me jaumat o, ap indan i: Main, ma komui wa janer i, indai on ia, waja komui kidi on ia i, i ap pan wala jan i.

¹⁶Iejuj ap kotin majani on i: Maria! I ari joupei on, potoan on i: Rapuni! Iet wewe: Jaunpadak.

¹⁷Iejuj kotin majani on i: Der jair ia, pwe I kaikenta pwarala ren Jam ai, a kola ren ri ai kan, kaire kin irail, I kokodala ren Jam ai o Jam omail, ren ai Kot o omail Kot,

¹⁸Maria men Makdala kodo kaireki tounpadak kan, me a kilanadar Kaun o, o me a kotin majani on i mepukat.

¹⁹Lao nin jautik en ran ota, ni ran kaieu en wik, ni wanim ko me ritidier, waja tounpadak kan pokon pena ia, pweki ar majak Juj oko, Iejuj ap kotido u nan pun arail, majani on irail: Komail popol!

²⁰A lao majaniada met, ap kajale on irail lim a kan o panepan a. Tounpadak kan ap perenda ni ar kilanada Kaun o.

²¹Iejuj ap pil kotin majani on irail: Komail popol! Duen Jam o kadar ia do, iduen I kadar komail la.

²²A lao majanier met, ap nidi on irail majani: Komail ale Nen jaraui!

²³Me komail pan lapwada dip ar akan, re lapwadar; o me komail katenedie dip ar akan, pan tenedier.

²⁴A Tomaj amen ekriamen, me adaneki Didimoj, jota ian irail, ni Iejuj kotin pwarador.

²⁵Tounpadak teio ap indai on i: Je kilaner Kaun o. A i me indai on irail: Ma i jota pan kilan lip en mata nan lim a kan, o kilon on nan lip en mata jondi en pa i, o kilon on pa ni panepan a, i jota pan pojon.

²⁶Murin ran walu japwilim a tounpadak kan pil pokon pena, o Tomaj ian irail. Wanim ko lao ritidier, Iejuj ap kotido, u nan pun arail majani: Komail popol!

²⁷Ap kotin majani on Tomaj: Kido jondin pa om o kilan pa i kat, o kido pa om, kilon on nan panepan ai, o der jopojon, a pojon ta!

²⁸A Tomaj japen indan i: Ai Kaun o ai Kot!

²⁹Iejuj kotin majani on i: Pweki om kilan ia er, koe pojon kilar, a meid pai, me kaikenta kilan ap pojon.

³⁰Kilel toto me jo intinidier nan puk wet, me Iejuj kotin wiadar nan pun en japwilim a tounpadak kan.