Text copied!
CopyCompare
Buka Helaga - IOANE - IOANE 9

IOANE 9:9-37

Help us?
Click on verse(s) to share them!
9Haida idia gwau, “Tauna unai.” Ma haida idia gwau, “Lasi, inai be ia hegeregerena.” Ia sibona ia gwau, “Lau inai.”
10Vadaeni idia ese idia nanadaia, idia gwau, “Oiemu matana be edena bamona idia kehoa?”
11Ia haere, ia gwau, “Tau ta, iena ladana be Iesu, ia ese kopukopu ia karaia, egu matana ruaosi dekenai ia dahua, vadaeni ia hamaoroa lau dekenai, ia gwau, ‘Oi lao, Siloama dekenai do oi lao, emu matana huria.’ Lau lao, lau huria, vadaeni egu matana idia kehoa.”
12Vadaeni idia ese ma idia henanadaia, idia gwau, “Inai tau be edeseni?” Ia gwau, “Lau diba lasi.”
13Idia ese iena matana idia kehoa tauna be Farisea taudia dekenai idia hakaua lao.
14Iesu ese kopukopu ia karaia, bona unai tau ena matana ia kehoa dinana be Sabati.
15Unai dainai, Farisea taudia danu idia nanadaia, “Oiemu matana be edena bamona idia kehoa?” Ia gwau, “Ia ese egu matana ruaosi kopukopu dekena amo ia dahua, lau lao huria, vadaeni egu matana idia kehoa.”
16Vadaeni Farisea taudia haida idia gwau, “Unai tau be Dirava dekena amo ia mai lasi, badina be Sabati Dina ia badinaia lasi.” To haida idia gwau, “Kara dika tauna ese toa unai bamodia be edena bamona do ia karaia?” Unai dekena amo idia edia hebou ia parara vadaeni.
17Vadaeni idia ese matakepulu tauna ma idia nanadaia lou, idia gwau, “Inai tau ese oiemu matana ruaosi ia kehoa, oi be edena bamona oi gwauraia?” Ia haere, ia gwau, “Ia be peroveta tauna.”
18Iuda taudia ese inai tau ena matana guna idia kepulu to gabeai ma idia kehoa herevana be idia abia dae lasi. Unai dainai idia ese iena tamana bona iena sinana idia boiria.
19Idia nanadaia idia dekenai, idia gwau, “Inai be umui emui natuna, a? Iena matana ruaosi mai kepulu danu ia vara umui gwau, a? To harihari iena matana be edena bamona idia kehoa?”
20Vadaeni iena tamana bona sinana idia gwau, “Ai diba inai be aiemai natuna, mai matakepulu danu ia vara,
21to harihari iena matana edena bamona idia kehoa be ai diba lasi, iena matana ia kehoa tauna danu be ai diba lasi. To aiemai natuna do umui nanadaia, ia be tau badana vadaeni, ia sibona do ia hereva.”
22Iena tamana bona sinana unai bamona idia hereva, badina be Iuda taudia dekenai idia gari. Badina Iuda taudia be idia hereva hebou vadaeni, tau ta bema Iesu do ia gwauraia ia be Keriso, ia be dubu dekena amo do idia lulua murimuri dekenai.
23Unai dainai iena tamana bona sinana idia gwau, “Ia be tau badana vadaeni, do umui nanadaia.”
24Vadaeni idia ese matakepulu tauna ma idia boiria lou, idia gwau, “Dirava do oi hanamoa, badina ai be ai diba vadaeni unai tau be kara dika tauna.”
25Ia ese ia haere, ia gwau, “Ia be kara dika tauna o lasi lau diba lasi, gau tamona sibona lau diba, guna egu matana ruaosi idia kepulu, to harihari be lau itaia noho.”
26Vadaeni idia nanadaia lou, idia gwau, “Ia ese oi dekenai be dahaka ia karaia? Oiemu matana be edena bamona ia kehoa?”
27Ia haere, ia gwau, “Be! Umui lau hamaoroa momokani vadaeni, to umui be kamonai lasi lau dekenai. Dahaka dainai umui ura be do umui kamonai lou? Umui danu iena diba tahua taudia do umui lao gwauraia?”
28Vadaeni idia hereva dika henia, idia gwau, “Oi be iena diba tahua tauna, ai be Mose ena diba tahua taudia.
29Ai be ai diba Dirava ese Mose dekenai ia hereva henia, to unai tau be edeseni dekena amo ia mai, ai be ai diba lasi.”
30Matana idia kehoa tauna ia gwau, “Ia! Lau be lau hoa, badina be umui diba lasi ia be edeseni dekena amo ia mai, to ia ese lauegu matana ia kehoa.
31Ita diba Dirava ese kara dika taudia edia hereva ia kamonai henia lasi, to Dirava ese ia dekenai ia matauraia, bona iena ura ia karaia tauna ena hereva be ia kamonai henia.
32Tanobada ia hamatamaia dekena amo, tau ta ese mai matakepulu danu ia vara tauna ta ena matana ia kehoa ena sivarai, be ta ita do kamonaia lasi.
33Inai tau be Dirava dekena amo bema ia mai lasi, be ia ese gau ta do ia karaia diba lasi.”
34Idia haere henia, idia gwau, “Oi be kara dika lalonai oi vara, to edena bamona ai dekenai oi hadibaia, a?” Vadaeni idia ese idia lulua murimuri dekenai.
35Iesu be ia kamonai idia ese murimuri dekenai idia lulua, vadaeni ia davaria, ia nanadaia, ia gwau, “Taunimanima ena Natuna dekenai oi abidadama henia, a?”
36Ia be ia haere, ia gwau, “Lohiabada e, ia be daika? Mani oi hamaoroa lau dekenai, vadaeni ia dekenai do lau abidadama henia.”
37Iesu ia gwau, “Tauna oi itaia vadaeni, ia be inai harihari ia hereva henia oi dekenai.”

Read IOANE 9IOANE 9
Compare IOANE 9:9-37IOANE 9:9-37