IOANE 9:28-40

²⁸Bena idia ese e gwau dika henia, eto, Oi hari iena hahediba; ai be Mose ena hahediba.

²⁹Ai na dibamai Dirava ese Mose e hereva henia; a una tau be ede amo ema asi dibamai.

³⁰Matana e papa tauna eto, la, lau na name hoa, badina be umui na asi dibamui ia na ede amo ema, a ia ese lau matagu e hapapa.

³¹Dibada Dirava ese kara dika taudia eredia se kamonaimu, a e matauraiamu bona ena ura karadia e karamu tauna hari erena e kamonaimu.

³²Tanobada matamana amo ta ese matana ruaosi kepuludia ai e vara tauna ta matana e hapapa sivaraina asita kamonai.

³³Hari tau be Dirava ena amo basinema mai, ia ese ḡau ta basinema karaia diba.

³⁴Idia ese e gwau henia, eto, Oi na kara dika ai o vara; matona ai o hadibamaimu a? Bena idia ese dubu amo e doria lasi.

³⁵Iesu na e kamonai idia ese vada e doria lasi, bena e davaria, e nanadaia, eto, Dirava Natuna o abiabiraiamu a?

³⁶Ia na e haere, eto, Lohiabada e, ia be daika? A hamaorogu, bena baina abiabiraia.

³⁷Iesu eto, Vada o itaia; ia na ina harihari e hereva henimumu.

³⁸Bena ia eto, Lohiabada e, vada name kamonai. Bena ia ese e toma henia diho.

³⁹Bena Iesu eto, Hahemaoro totona ina tanobada nama; taunabunai mata-kepulu taudia na matadia bae papa, bona mata-papa taudia na matadia bae kepulu.

⁴⁰Farisea taudia haida na ia dekenai e nohova; bena idia ese una hereva e kamonai. Bena idia ese e nanadaia, eto, Ai danu matamai kekepulu a?