Ioane 9:2-28

²Ena heaheatayao ia se oimurini si ene, “Tanuagamai e, eai i baaea, wau tau wa, e tamana, sinana, ia se labasiama ma matagibugibuna?”

³Iesu i heuioidi i ene, “Ina tau ta nige i baaea, eo tamana sinana hinage nige se baaea: Eaubada ana paisoa ia arinai mo bena se hemasaraha.

⁴Tauhetamariguma ana paisoa asubena eai taba ta paisoaei: e, maiona abo i laoma, nige tau esau abo i paisoa.

⁵Tanoubu eai ea miamia ta, eau tanoubu marana.”

⁶Riba wa i ribalautom, abo i gariso tano eai, garisona eai tano i helamo, tano wa i saulaei tau matagibugibu matana eai.

⁷Eo i heriba i ene, “U lau Siloama goilana eai u deuri” (Siloama wa heaheasonina ede, Hetamari). Tau wa abo ie lau i deuri, e, i uioma matana se nega.

⁸Helena taumia, eo headi hinage nabada wa se ita ia matana se gibu, si ene, “Tau ta ia ede lahinae i babawa i awaawanori wa, e nige’e?”

⁹Headi si ene, “Iaede:” eo headi hinage si ene. “Ana ao doha ede:” na ia mo i ene, “Eau ede.”

¹⁰Arinai ia abo se heriba si ene, “Matam edoha edi lalala?”

¹¹I heuioidi i ene, “Tau esau esana Iesu, tano i helamo, i sauleama matagu eai, eo i heribagu i ene, ‘U lau Siloama goilana eai, u deuri;’ to ea lalau ea deuri, matagu abo se nega ta.”

¹²Ia se heriba, si ene, “Ia ede haedi?” I ene, “Ibai, nige ea nuatui.”

¹³Tau wa lahinae matana se gibu wa abo se woeai Parisea tataodi aridi eai.

¹⁴Asubena Sabati eai, Iesu tano i helamo tau matana i helaladi.

¹⁵Parisea hinage ia se oimuriuioi saha arinai matana se helaladi. Abo i heribadi i ene, “Tano i sauleama matagu eai, eo ea deuri, to ea itaita.”

¹⁶Parisea headi si ene, “Ina tau ta nige Eaubada arinai i laoma paana ede asubena Sabati nige i nuatui.” Headi si ene, “Ia taba tau baaea, heiheinoi gigiboridi edoha ena ginaginauridi?” arinai nuadi se labulabui.

¹⁷Isi abo taumatagibugibuna wa se heribauioi, si ene, “Oa u ene edoha, mamohoi wa, paana u ene ia matam i helaladi?” I ene, “Ia peroveta.”

¹⁸Iudea tataodi nige se nuatui ia matana nabada wa se gibu eo se helaladi i lau e abo tau wa matana se helala wa tamana sinana se eogaidi.

¹⁹Se oimuriedi, si ene, “Ina ta natumiu wa, au ene ia au labasiama ma matagibugibuna wa? Matana edoha edi lalala?”

²⁰Tamana sinana arinadi se heuio, si ene, “Ai nuatuiyao ina ta natumai, eo ai labasiama ma matagibugibuna.

²¹Na ia matana edoha edi lalala ai nige ai nuatui: eai hinage matana i helaladi ai nige ai nuatui: i lailaio au oimuri ia arinai, iabom abo enamiu i riba.”

²²Tamana sinana se riba ina doha, paana ede Iudea tataodi se matausiedi: Iudea tataodi se oiribanonohaiyao, taba tau esau i ene, ia Keriso, abo sunago eai ia se aiduiei.

²³Arinai tamana sinana si ene, “I lailaio, au oimuri ia arinai.”

²⁴Taumatagibugibuna abo se eogauioi, se ribalau ia arinai si ene, “Eaubada u hedebasaei: ai itayao ina tau ta tau baaea.”

²⁵I heuioidi i ene, “Ibai nige ea nuatui, ia tau baaea e nige’e: ginauri esega mo ea nuatui ede, lahinae wa matagu se gibu, abo ina ta matagu se lala.”

²⁶Abo se ribauio ia arinai, si ene, “Ia edoha ena abiabim? Matam edoha ena helahelaladi?”

²⁷I heuioidi, i ene, “Ea heribamiuo, na nige au ataiei: abo au ataataiuioi mo, omi hinage abo ena heaheata eai au lau?”

²⁸To ia se manabaaeaei, si ene, “Oa ena heaheata, na ai ina Mose ena heaheatayao.