IOANE 9:2-28

²Bena ena hahediba ese e nanadaia, eto, Rabi e, daika ena kara dika dainai ina tau matana kepuludia ai e vara, ia eiava tamana sinana?

³Iesu eto, Lasi, dia iena kara dika dainai, bona dia tamana sinana edia kara dika daidiai, to Dirava ena siahu iena amo baine hedinarai helaoreana.

⁴Lau e siaigu Diravana ena kara dina ai baita kara; hanua baine boi, ta basine ḡaukara diba.

⁵Tanobada ai na nohomu negana ai lau na tanobada diarina.

⁶Unu hereva e gwaurai doko, bena tano ai e kanudi, kanudina ai kopukopu e manea, bena mata-kepulu tauna matana ruaosi e dahulai.

⁷Bena e hamaoroa, eto, Aola, Siloam gohuna ai ba ha huri. (“Siloam” anina be “siaia”). Taunabunai ia na ela, eha huri, bena e lou ema, matana vada e papa.

⁸Bena dekena taudia bona vaevae e noi hegameva ai e itaiava taudia e henanadai, eto, Ina na vanegai e helaiva, e noi hegameva, tauna eiava?

⁹Haida eto, Ḡauna bunai. Ma haida eto, Lasi, ina na ia ida-idana. Ia sibona eto, Lau binai.

¹⁰Bena idia ese e nanadaia, eto, Matamu ede e papa toma?

¹¹Ia e haere, eto, Tau ta, ladana Iesu, ese kopukopu e manea, matagu ruaosi e dahulai, bena e hamaorogu, eto “Aola, Siloam ai ba ha huri”. Nala, na ha huri, bena matagu vada e papa.

¹²Bena idia ese ma e nanadaia, eto, Ia be edeseni ai? Ia eto, Asi dibagu.

¹³Idia ese hari matana e papa tauna na Farisea taudia dekedia e hakaua lao.

¹⁴Iesu ese kopukopu e manea bona una tau matana e hapapa dinana be Dina Helaḡa.

¹⁵Taunabunai, Farisea taudia ese e nanadaia, matana ede e papa toma. Ia eto, Ia ese matagu ruaosi kopukopu amo e dahu, na ha huri, bena matagu vada e papa.

¹⁶Bena Farisea taudia haida eto, Una tau na Dirava ena amo sema, badina be Dina Helaḡa se badinaiamu. A haida eto, Kara dika tauna ese toa unuhetomadia ede bema kara toma? Unu amo edia hegogo vada e haheparara.

¹⁷Bena idia ese mata-kepulu tauna ma e nanadaia lou, eto, Oi matanlu luaosi na ina tau ese e hapapa. Oi be ede o gwauraia tomamu? Mani a hereva. Ia e haere, eto, Ia na peroveta tauna.

¹⁸Iuda taudia ese hari tau matana vada e kepulu guna gabeai e papa helevana asie abia dae, ela bona idia ese ia tamana bona sinana e boiridia.

¹⁹Bena e nanadaidia, eto, Ina umui natumui a? Matana ruaosi kepuludia ai e vara o tomu a? O harihari matana be ede e papa toma?

²⁰Bena tamana sunana eto, Ai na dibamai ai natumai binai, matana kepuludia ai e vara;

²¹to harihari matana ede e papa toma ai na asi dibamai, matana e hapapa tauna danu asi dibamai. Ia ba nanadaia; ia na bada, sibona baine hereva.

²²Hari tamana bona sinana unu e gwau toma badina be Iuda taudia garidia e gariva. Badina be Iuda taudia na vada e henega bou, tau ta Iesu bema gwauraia Keriso, ia na dubu amo bae doria lasi eto.

²³Una dainai tamana sinana eto “Ia na bada, ba nanadaia”.

²⁴Bena idia ese mata-kepulu tauna e boiria lou, eto, Dirava ba heatolaia; ai na vada dibamai una tau na kara dika tauna.

²⁵Ia e haere, eto, Ia na kara dika tauna eiava lasi lau asi dibagu; ḡau tamona mo dibagu, vanegai matagu ruaosi e kepulu, harihari eme papa.

²⁶Bena idia ese ma e nanadaia lou, eto, Ia ese oiemu ai dahaka e karaia? Matamu be ede e hapapa toma?

²⁷Ia e haere, eto, Be: vada na hamaoromui vaitani, to asio kamonai henigumu. Dahaka dainai unlui na o uramu ma ba-kamonai lou'  Umui danu iena hahediba ai baola o tomamu a?

²⁸Bena idia ese e gwau dika henia, eto, Oi hari iena hahediba; ai be Mose ena hahediba.