IOANE 8:5-11

⁵Muige kerbi Gelarge, Mosede kerbi kelarkelar detagerda ki koskir bakiru eudem natimedlare nade wi able lu waikelare. Nako mako detautli mokakalam ge Mosede detauter?”

⁶Wi able miru abi ikelare laglag abi kesrem udimaridarda ya waiakai wi abi miru waikereda a abim tag waimarkeda. Ege Iesu no etkobeida taba tagpimu war sebge ditarer.

⁷Nawerge wi mena abi itmerlare, ege etilu barkak emrilu yabi daratagerda, “Nete wabialam nole witkak dali ege kikem able koskir bakiru wairbor.”

⁸Ege ko etkobeida a war sebge ditarer.

⁹Nade ge wi able mir asorda wige netatnetat abialam adem bauser aulelam ditimeda mena bakedida wi gair puipikem adem bakiauda. No Iesu ga dawer tebteb a able koskir ga mena ikweireder abi opem.

¹⁰E etilu barkak emrilu able koskir itmeri, “Wi nade uridli? Nako, le nole abkorep dali mari bakiru natimdi?”

¹¹Ege abi koskiride ikaida, “Nole lelut kari bakiru natimdi, ople.” Iesu ge akaida abi detagri, “Kako umerkak mari bakiru natimde. Ma no bakiamu mage nole ko wit ikerwa.”