Ioane 8:3-27

³Tauuriuri eo Parisea, sine esau i abiabitawatawa se woeaiama ia arinai; sine wa se hebawabigabiga boeadi eai.

⁴Isi ia se heriba, si ene, “Tanuagamai e, ina sine ta se lobai i abiabitawatawa, se italapai.

⁵Mose ena laugagaeo eai i lauhesomda, i ene, teina doha se lauwe’ui: oa u ene edoha?”

⁶Se riba nei doha ia bena se nohoi, bena abo se hegiru. Na Iesu ie duru nimagigina eai tano eai i uriuri.

⁷Isi se hesihesio daoi abo i tamaisima, eo i ribalau isi aridi eai, i ene, “Esau arimiu eai nige ena baaea wa ia we’u i tu baguna.”

⁸Abo i duruuio, tano eai i uriuri.

⁹Isi nei riba ne se ataiei abo nuadi se buibuiuioidi, esa, esa se torohai se lau, tau‐baguna i baguna i lau e tau‐murita: Iesu iabom ie bawa, sine wa i totoro matana eai.

¹⁰Iesu abo i tamaisima, nige tau esau i ita, sine wa iabom mo, ie ribalau ia arinai, i ene, “Sine e, wau tauhegirum wa haedi? Nige tau esau i hegirum wa?”

¹¹I ene, “Guiau e, nige tau esau.” Iesu i heriba i ene, “Eau hinage taba nige ea ribahematem: u lau, tabu u baaeauio.”

¹²Iesu abo i ribauio isi aridi eai i ene, “Eau tanoubu marana ede: ena esau i hemuriwataiguma taba nige masigiri eai i laulau, na mauri marana abo i abi.”

¹³Arinai Parisea ia se heriba si ene, “Oabom u ribatausaem, em riba me nige riba mamohoina ede.”

¹⁴Iesu i ribalau isi aridi eai i ene, “Eau ea ribahemasarahauioigu, hinage egu riba riba mamohoina mo: egu aba laoma ea nuatuiyao eo egu aba lau hinage ea nuatuiyao; egu aba laoma nige au nuatui, eo egu aba lau hinage nige au nuatui.

¹⁵Omi buluma eai au lauhegiru; eau nige tau esau ea hegiru.

¹⁶Taba esau ea hegiru, hinage egu lauhegiru i dudurai ariri; paana ede nige eaubom, Tamana maegu, ia i hetamariguma.

¹⁷Hinage omi emi laugagaeo eai se uri ede ina doha, si ene, ‘Taba tatao labui edi riba esega mo, riba wa i dudurai ede.’

¹⁸Eau eaubom ea ribahemasarahagu, eo Tamana tauhetamariguma, i ribahemasarahagu hinage.”

¹⁹Isi se ribalau ia arinai si ene, “Tamana ede haedi?” Iesu i heribadi, i ene, “Omi nige au nuatulobaigu, eo Tamagu hinage nige au nuatulobai: taba au nuatulobaigu, Tamagu hinage abo au nuatulobai.”

²⁰Teina riba ta Iesu i ribaei moni abapeiauri eai, numa uura alona eai i lauheatadi: nige tau esau nimana eai i abilau ia arinai, paana huiana sora nige i lagema.

²¹Iesu abo i heribauioidi i ene, “Ea lau egu dobila, omi abo au eooigu, baaeamiu eai abo sora au mate: egu aba lau nige emi aba laoma.”

²²Iudea tataodi abo si ene, “Ia abo i unuuioi? paana ede i ene, ‘Egu aba lau eai nige emi aba laoma.’”

²³Ie ribalau isi aridi eai i ene, “Omi ubu eai au saema; eau ewa eai ea dobima: eo omi tanoubu tataomiu: eau nige tanoubu tauna.

²⁴Arinai ea heribamiu ta ea ’ne, omi baaeamiu eai abo sora au mate: ena taba nige au nuatuwatawataigu eau ede ia, omi baaeamiu eai sora abo au mate.”

²⁵Isi abo se ribalau ia arinai si ene, “Oa eai?” Iesu i heribadi i ene, “Eau ia ede, doha lahinae ea heribabagubagunaemiu wa.

²⁶Riba gamagaridi bena ea heribamiu eo bena ea heduduraimiu, na tauhetamariguma ia mamohoina ede: eo ginauri ia arinai ea ataiedi tanoubu abo ea heribadi hinage.”

²⁷Isi nige se nuatui riba wa i heribadi ede Tamana ribana.