Ioane 8:28-59

²⁸Iesu abo i ribalau isi aridi eai i ene, “Sora abo Tau Natuna au abiisinisaei, abo au nuatulobai eau ede ia, eo eaubom nige ginauri esau ea ginauri, doha ede Tamagu i heatagu ina riba ta ea ribaedi ta.

²⁹Tauhetamariguma ia hinage maidagu; Tamana nige i laugabaegu; paana ede huia gamagamagari egu paisoa eai ia nuana ea helolo.”

³⁰Ina riba ta i ribaedi moutuana ia se sunumaei.

³¹Iesu i ribalau Iudea tataodi aridi eai, isi tausunuma wa, i ene, “Taba egu riba au sogohididini, omi mamohoi egu heaheatayao ede.

³²Riba mamohoina hinage abo au ita, mamohoina wa abo i eairigabaemiu.”

³³Isi ia se heuio si ene, “Ai Aberahama tumanayao, nige tau esau i aumai: ue saha u ribaei u ene, ‘Abo se eairigabaemiu?’”

³⁴Iesu i heuioidi i ene, “Mamohoi, mamohoi ea heribamiu ta, eai to eai baaea i abi, ia abo baaea ena heaheari eai i lau.

³⁵Heaheari tauna nige i miatahitahi numa eai: Natuna mo ie miahai nige nosina.

³⁶Taba Natuna i eairihaimiu abo i eairihaimamohoiemiu.

³⁷Ea nuatuiyao omi Aberahama tumanayao; au eoo bena au unuigu, paana ede egu riba nige ena aba ota nuamiu eai.

³⁸Ginauri wa ea itadio Tamana maidagu, iaede ea ribaedi, omi hinage ma tamamiu ginauri wa au itadi meta au ginauridi.”

³⁹Ia arinai se heuio si ene, “Ai tamamai ede Aberahama.” Iesu i heribadi i ene, “Taba omi Aberahama nanatunayao, Aberahama ana hewau abo au abidi.

⁴⁰Eau riba mamohoina ea heribamiu ta, riba wa Eaubada arinai ea ataiei: na omi au oiriba, bena au unuigu, Aberahama nige ena laulau doha nei.

⁴¹Tamamiu ena laulau mo omi au abiwataidi.” Isi ia abo se heriba si ene, “Ai nige se hetubumai laulau baaea boeana eai; ai Tamamai esega mo, iaede Eaubada.”

⁴²Iesu i heribadi i ene, “Taba tamamiu Eaubada, abo au gadosisiegu; paana ede Eaubada arinai ea laoma ta, eaubom nige ea laoma, na ia i hetamariguma.

⁴³Aue saha egu riba nige au nuatui? Paana ede egu riba taba nige au ataiei.

⁴⁴Omi tamamiu diabolo enana, tamamiu ena baaea hinage abo au abiwataidi. Huia bagubaguna eai i laoma e ia tauaiaiunu, nige ie mia riba mamohoina boeana eai, paana ede nige riba mamohoina ia nuaboeana eai. Riba borabora ie ribaei, enana ie riba: paana ede ia tauboraborasom, eo borabora tamana.

⁴⁵Eau riba mamohoina ea heribamiu arinai nige au nuatuigu.

⁴⁶Eai arimiu eai i hegirugu i ene ea baaea? Taba eau riba mamohoina ea ribaei aue saha nige au nuatuigu?

⁴⁷Ia Eaubada enana Eaubada arinana i ataiei: omi nige au ataiei paana ede omi Eaubada enana nige’e.”

⁴⁸Iudea tataodi abo se ribalau ia arinai se heuio si ene, “Ai riba dudurai e nige’e, ai ene oa Samaria tauna, eo nuam eai demoni esau ie mia?”

⁴⁹Iesu i heuioidi i ene, “Nige demoni esau nuagu eai; Tamagu ea hedebasaei, eo omi au itadobidobiegu.

⁵⁰Nige ea laoma ea ribatausaeuioigu: esau mo ia hedebasaegu i eooi, eo ia tau‐heduhedudurai hinage.

⁵¹Mamohoi, mamohoi, ea heribamiu ta, ea ’ne, ena tau esau egu riba i sogohi, ia mate taba nige i ita.”

⁵²Iudea tataodi ia se heriba si ene, “E abo aie ita, diabolo esau nuam eai. Aberahama i mateo, eo peroveta tataodi hinage, eo oa u ene, ‘Ena tau esau egu riba i sogohi mate amnana taba nige i ataiei.’

⁵³Tamamai Aberahama i mateo, oa bena u saetawatawai wa? Eo peroveta se mateo hinage: oa eai, u ribapasipasiuioim?”

⁵⁴Iesu i heuioidi i ene, “Taba ea hedebasaeuioigu, ea hedebasaenapa mo: Tamagu iabom i hedebasaegu; iaede omi au ribaei, au ene emi Eaubada.

⁵⁵Omi ia nige au nuatui: eau ia ea nuatuiyao: taba ea ’ne ia nige ea nuatui, eau abo doha omi, tauborabora: na ia ea nuatuiyao, eo ena riba ea sogohi.

⁵⁶Tamamiu Aberahama asubenagu i henua bena i ita: eo i itayao, hinage ie kode.”

⁵⁷Iudea tataodi ia se heriba si ene, “Oa nige borimaim tatao‐labui‐se‐mate‐saudoudoi, hinage Aberahama u itayao wa?”

⁵⁸Iesu i heribadi i ene, “Mamohoi, mamohoi, ea heribamiu ta, ea ’ne, Aberahama sora, na Eau miagu.”

⁵⁹Arinai we’u se abidi, ia bena se lauwe’ui; na Iesu i tauyamui, ie pesa numa uura murimurina eai, boeadi eai ie lau e, i laugabaedi.