Ioane 7:24-32

²⁴Ginauri adi ao mo aridi eai tabu au nonoiedi, nonoi duduraidi eai au nonoiedi.”

²⁵Ierusalema tataodi headi si ene, “Ina tau ta ia ede, e nige’e, isi se eooi bena se unui wa?

²⁶Au ita i riba masaraha, hinage nige riba esau se ribalau ia arinai. Tanuagada se italobaiyao ia mamohoi Keriso ede?

²⁷Ina tau ta ena aba laoma ta itayao: na Keriso i laoma, ena aba laoma nige tau esau ie ita.”

²⁸Iesu numa uura eai i lauheata abo i eogayoga i ene, “Au italobaiguo, egu aba laoma hinage au itayao, nige eaubom ea laoma, ia i hetamariguma ia mamohoina ede; ia au hekau.

²⁹Ia ea nuatuiyao paana ia arinai ea laoma, eo ia hinage i hetamariguma.”

³⁰Arinai ia bena se toai: taiede nige tau esau i abilau ia arinai, paana ena huia sora nige i lagema.

³¹Tatao gamagaridi ia se sunusunumaei, eo si ene, “Keriso i laoma ia heiheinoi gigibori gamagamagaridi i ginauridi, abo nige doha ina tau ta?”

³²Parisea se ataiei, ina ginauri ta Iesu arinai tatao se monunuei; Parisea eo kohena babadadi iala tataodi se hetamaridi ia bena se toai.