IOANE 7:2-49

²Iuda taudia edia Kalaga Ariana be vairadiai e hure.

³Bena Iesu tadina ese e hereva henia, eto, Ina gabu ba rakatania, Iudea baola, bena o karamu ḡaudia na emu hahediba ese bae ita;

⁴badina be sibona ihahedinaraina urana e uramu tauna ese ḡau ta basine karaia hehuni. Ene ḡau o karamu daidiai sibomu tanobada ba hahedinarai henia.

⁵Badina be ia tadina ese danu asie abiabiraia.

⁶Bena Iesu ese e haere henidia, eto, Lauegu nega na dohore; a umui emui ai nega iboudiai na heḡereḡere.

⁷Tanobada na asine inai henimui diba, a lau hari e inai henigumu; badina be lau ese na hahemaoro heniamu, ena kara na didika dainai.

⁸Umui hari ba ha dara dae, ina aria baola; a lau be basina dara dae, badina be egu nega na do se kau.

⁹Ia ese unu e hereva henidia toma, bena Galilea ai do e nohova.

¹⁰Tadina mo eha dara dae, aria ela. Gabeai ia danu ma eha dara dae hehuni.

¹¹Bena una aria lalonai Iuda taudia ese e tahua, eto, Ia be edeseni a?

¹²Aru taudia ese e hepapahuahulaia bada. Haida eto, Ia na tau namona. Ma haida eto, Lasi, ia ese taunimanima e hakaudia kereremu.

¹³A ta ese se herevalaia hedinarai, Iuda taudia garidia e gariva dainai.

¹⁴Aria dinadia haida vada e ore, a haida be do mimia, Iesu Dubu Helaḡa ai e dae kau, e hahediba matama.

¹⁵Bena Iuda taudia e hoa, eto, Ina tau be hahediba herevadia ede e diba toma? Ia be hahediba gabuna ta sela.

¹⁶Iesu ese e haere henidia, eto, Egu hahediba herevadia na dia lauegu, to e siaigu Diravana ena.

¹⁷Tau ta ese Dirava ena ura karana ikarana baine ura, ia ese egu hahediba herevadia baine dibadia, Dirava ena amo ema, eiava sibogu egu amo.

¹⁸Sibona ena ura herevadia e gwauraimu tauna na sibona ihanamona dalana e tahuamu, a e siaigu Diravana ihanamona dalana e tahuamu tauna be momokani tauna, ia lalona ai kara gageva-gageva na lasi.

¹⁹Mose ese taravatu se henimui a? Matona, umui be tal-avatu asio badinamu. Dahaika dainai lau ialagu dalana o tahuamu.

²⁰Aru taudia na e haere, eto, Oi na e kavamu a? Daika e uramu baine alamu?

²¹Iesu eto, Lau na kara tamona mo na karaia, bena iboumui ai o hoa.

²²A laloa. Mose ese peritome taravatuna vada e henimui; ḡau tamona dia Mose ese una kara se matamaia, a seneda gunadia hari. Taunabunai, umui ese Dina Helaḡa ai memero o peritomediamu.

²³Dina Helaḡa ai mero ta ba peritomea, Mose ena taravatu ba tataia utu na garina, o edeheto lau be ma o badu henigumu, Dina Helaḡa ai tau ta na hamauria dainai.

²⁴Ḡau oromadia amo basio hahemaoro, a ba hahemaoro ḡoevaḡoeva.

²⁵Bena Ierusalem taudia haida eto, Bae alaia e tomu tauna binai eiava!

²⁶A ia be iniseni ai e haroromu bona hereva ta asie gwaurai heniamu. Hanua lohiadia lalodia vada eme parara ia na Keriso dahaka?

²⁷Ḡau tamona, ina tau be ede amo ema ita na dibada, a Keriso bainema negana ai tau ta basine diba ia na ede amo.

²⁸Bena Iesu na Dubu Helaḡa ai ma e hahediba, e lolo, eto, Umui na dibamui lau, ede amo nama danu dibamui; a sibogu egu ura dainai asinama. A e siaigu Diravana na momokani; umui na asi dibamui ia,

²⁹a lau be dibagu ia, badina be iena amo nama, bona ia ese e siaigu.

³⁰Bena idia ese bae dabaia tao eto, to ta tauna ai se dau kau, badina be ena nega do se kau.

³¹A aru taudia hutuma ese e abiabiraia. Idia eto, Keriso bainema negana ai, ia ese toa ikaradia ai ina tau baine hereaia a?

³²Farisea taudia e kamonai, aru taudia ese Iesu unu e herevalaia toma gwauna, hahelaḡa taudia bona Farisea taudia ese edia hesiai taudia e siaidia, ia bae dabaia tao.

³³Bena Iesu eto, Nega sisina lau na dekemui ai do baina noho, bena e siaigu Diravana dekena bainala.

³⁴Bena ba tahugu, to basio davarigu; baina ha noho gabuna danu umui na basiola diba.

³⁵Bena Iuda taudia sibodia e henanadai heheni, eto, Ia na ede be laomu, bena ita ese basita davaria e tomu? Iuda taudia Helene taudia bogaragidiai vada e karoho taudia dekedia bainela, Helene taudia baine hadibadia, eiava?

³⁶Ina be dahaka hereva ia ese e gwauraiamu, e tomu “Ba tahugu, to basio davarigu” bona “Baina ha noho gabuna danu umui na basiola diba”

³⁷Aria dokona dinana be dina badana. Una dina ai Iesu e gini tore, e lolo, eto, Ranu-mase tauna na dekegu ainema, ranu baine inua.

³⁸Buka Helaḡa ai e torea heḡereḡerena, Lau baine abiabiraigu tauna lalona amo mauri ranuna baine aru lasi, sinavai na heto.

³⁹Ia ese Lauma unu e herevalaia toma, e abiabiraia taudia ese bae abia eto. Badina be Lauma na do se heni, Iesu ese hairaina do se abia dainai.

⁴⁰Aru taudia haida ese ini hereva e kamonai, bena eto, Peroveta tauna binai.

⁴¹Ma haida eto, Ina na Keriso. Ma haida eto, Keriso na Galilea amo bainema a?

⁴²Buka ai e torea, ani, Keriso na David garana amo baine vara, Betelehem, David ena hanua, lalonai.

⁴³Taunabunai, aru taudia na e haheparara ia dainai.

⁴⁴Haida ese bae dabaia tao eto, to ta na tauna ai se dau kau.

⁴⁵Hesiai taudia na e lou lao, bena hahelaḡa taudia bona Farisea taudia ese e nanadaidia, eto, Badina be dahaka asio hakaua mai?

⁴⁶Hesiai taudia e haere, eto, Matamana negana amo tau ta se herevava ina tau e herevamu heḡereḡerena.

⁴⁷Farisea taudia eto, A, umui danu vada e koimui a?

⁴⁸Readia hanua lohiadia ta eiava Farisea taudia ta ese vada e abiabiraia a?

⁴⁹Ini aru taudia na taravatu asi dibadia; idia na vada eme baia.