Ioane 7:16-31

¹⁶É ina tàra pâ: «Ê pwina go ina tàwà, âna càcaa muru me gée gooò, â gée goo Pwiduée na é cùruo me.

¹⁷Ba wiàna nümawà na guwà pwa ê câbawâdé kà Pwiduée, â guwà mwa tâmogòori pâ, wiàna ê pwina go ina, âna me gée jaa Pwiduée, é, me gée gooò.

¹⁸Wà pwina é ina ê pwina é nye niimiri wàé, âna é mudàra pai pwa wèe ma picâdirié. Â wà pwina é imudàra ma é ipwamaina pwina é cùrué me, âna é *tàrù, ba é nye ina co pwina âjupâra.

¹⁹«Gona câé caa naa tàwà ê Naèà wà *Moosé? Â nye ticè pwi jè âboro cèna é pâra wiâra! Cina nümawà na guwà pòtàmwaraô?»

²⁰Â rà ina têe pâ: «Kaa! Pwa duée wâgoogà! Wàilàapà na mudàra ma pòtàmwaragà?»

²¹Â é tòpi tàra pâ: «Nye caapwi co ji muru na go pwa goro pàtàma Pwiduée na *tòotù pwicîri â guwà dau pò goo.

²²Êco na wâguwà mwara, âna guwà wakè na tòotù pwicîri, na guwà pwa *kamaî tà pwi nari èpo. Ba guwà ina pâ ê pwa kamaî, âna me gée goo wà Moosé. (Êco na càcaa me gée gooé, â wà tèpa jojoorojè béaa kêe, na rà pwa.)

²³Üu, guwà pwa kamaî na tòotù pwicîri, ba na câguwà caa êgòjai ê Naèà kà Moosé.  wâgo, âna go pwa ma tiàu awé maagé kà pwi jè âboro, na tòotù pwicîri.  cina guwà putàmu naa gooò?

²⁴Guwà cibwaa tèi wiâra ê pai côo kàwà. Wâdé na guwà tèi wiâra tàrù!»

²⁵Rà ina pàra âboro gée *Iérusaléma pâ: «Gona càcaa wà i pwi ia rà mudàra ma rà pòtàmwereê?

²⁶Guwà côo! Câé caa picârü, â rà nye tàgére pitùra ma pàra tàpé, â nye gére ticè na rà ina têe wà tèpa pitûâ! Gona pwiri rà côoinaê pâ wàé pwi *Mesia, pwi ukai na jè tapacîê?

²⁷Êco na, wà pwi Iésu bèeni, âna jè tâmogòori wâna na é me géewê. Â napwa wà pwi Mesia, âna nye ticè jè âboro cèna o tâmogòori wâna na ée me géewê.»

²⁸Ûna é bwaa gére pwa pupûra wà Iésu, naa na Wâra pwapwicîri, â é tomara too pâ: «Gona guwà nye niimiri kaa pâ guwà jèe tâmogòorio? Â guwà tâmogòori wâna na go me géewê? Bwa! Ba câgo caa me gée gooò. Â wà Pwi a cùruo me, âna pwina pâriê ma guwà tòpò naa gooé ê cèikî kàwà. Êco na guwà nye âji càcaa tâmogòorié.

²⁹Â wâgo, âna go nye tâmogòorié, ba go me jiié, â wàé na é cùruo me.»

³⁰Â wà tèpa âboro, âna rà imudàra cè naigé ma rà tâjùrué, êco na nye ticè pai pwa wèe. Ba bwaa càcaa pâji tèepaa ê pàara.

³¹Êco na rà jèe dau wâru gée goo tàpé na rà têreê, na rà cèikî naa gooé.  rà ina pâ: «Munaa wàé pwi Mesia. Ba nye dau wâru kaa pâ câmu kâra pàtàma Pwiduée na é pwa.  wiàna càcaa wàé pwi Mesia, â pwiri càcaa wàrapwiri.»