IOANE 6:54-69

⁵⁴A lau hidiogu baine ania bona raragu baine inua tauna ese mauri hanaihanai baine abia, bona dina gabena ai lau ese baina hatorea isi.

⁵⁵Badina be lau hidiogu na aniani momokanina, bona lau raragu na inuinu ḡauna momokanina.

⁵⁶Hidiogu baine ania bona raragu baine inua tauna na lau lalogu ai baine noho, lau danu ia lalonai baina noho.

⁵⁷Tamada e maurimu, ia ese vada e siaigu bona Tamada dainai na maurimu na heto, baine anigu tauna danu lau daigu ai do baine mauri.

⁵⁸Guba amo eme diho anianina binai; dia senemui ese e aniava ḡauna heḡereḡerena, e aniava, to vada e mase. Ina aniani baine ania tauna na do baine mauri hanaihanai.

⁵⁹Ini hereva na dubu ai e gwaurai, Kaperanaum ai e hahedibava negana ai.

⁶⁰Ena hahediba hutuma e kamonai, bena eto, Una na hereva metauna; daika ese baine abia dae diba?

⁶¹Iesu na lalona vada e parara, ena hahediba na una hereva e maumauraia, bena e hereva henidia, eto, Ina hereva ese eme hahekwakwanaimui a?

⁶²O Taunimanima Natuna boma itaia, bema dae kau, e noholaia guna gabuna bema lou henia, ede bema heto?

⁶³Lauma ese mauri e havaraiamu; tau-anina na asi ena hahenamo. Lau ese na hamaorolaimui herevadia na lauma bona mauri;

⁶⁴to umui haida na asio abi daemu. Badina be matamana negana amo Iesu na dibana asie abidadama henia taudia be daidia, bona taona baine torea tauna be daika.

⁶⁵Ma eto, Taunabunai vada na hamaoromui, Tamagu basine duanaia tauna na lau dekegu basinema diba.

⁶⁶Una negana ai ena hahediba hutuma ese e rakatania, bona ia ida asie raka hebou lou.

⁶⁷Bena Iesu ese gwauta-raruosi e nanadaidia, eto, Umui danu ba raka oho a?

⁶⁸Simona Petro ese e haere henia, eto, Lohiabada e, ai be daika dekena baiala? Mauri hanaihanai herevadia na oiemu ai.

⁶⁹Ai na vada ame kamonai bona ame diba, oi na Dirava ena Helaḡa Tauna.