IOANE 6:53-71

⁵³Iesu ma ia haere, ia gwau, “Momokani, momokani umui lau hamaoroa, Taunimanima ena Natuna iena tauanina bema umui ania lasi, bona iena rarana danu bema umui inua lasi, mauri be umui emui lalona dekenai do ia noho lasi.

⁵⁴To lauegu tauanina do ia ania, bona lauegu rarana do ia inua tauna ese mauri hanaihanai do ia abia, bona dokona dina dekenai lau ese do lau hatorea isi.

⁵⁵Badina be lauegu tauanina be aniani momokani, bona lauegu rarana be inuinu gauna momokani.

⁵⁶Egu tauanina do ia ania, bona egu rarana do ia inua tauna be lauegu lalona dekenai do ia noho, lau danu iena lalona dekenai do lau noho.

⁵⁷Ia mauri Tamana ese lau ia siaia vadaeni, bona Tamana dainai lau mauri hegeregerena, lau do ia ania tauna danu do ia mauri lau dainai.

⁵⁸Guba dekena amo ia diho aniani be inai. Emui sene taudia ese idia ania gauna bamona lasi. Idia ania, to idia mase vadaeni. To inai aniani do ia ania tauna be do ia mauri hanaihanai.”

⁵⁹Inai hereva be dubu dekenai Iesu ia gwauraia, Kaperanauma dekenai ia hadibaia neganai.

⁶⁰Iesu ena diba tahua taudia momo ese inai hereva idia kamonai, vadaeni idia gwau, “Unai hereva be ia metau, daika ese do ia abia dae diba?”

⁶¹Tau ta ia hamaoroa lasi, to Iesu ia diba iena diba tahua taudia be unai hereva dekenai idia maumau, vadaeni ia hereva idia dekenai, ia gwau, “Inai hereva dekenai umui emui lalona ia metau, a?

⁶²To Taunimanima ena Natuna bema umui itaia, ia daekau, guna ia noho gabuna dekenai bema ia giroa lou, be edena bamona?

⁶³Lauma ese mauri ia havaraia, tauanina ese namo ta ia havaraia lasi. Lau ese umui lau hamaoroa herevadia be lauma bona mauri.

⁶⁴To umui haida be umui abidadama henia lasi.” Inai bamona ia hereva badina hamatamaia nega dekena amo Iesu be ia diba vadaeni idia abidadama henia lasi taudia be daika, bona ia do ia samania ia mase tauna danu Iesu ia diba vadaeni.

⁶⁵Ma ia gwau, “Unai dainai umui lau hamaoroa vadaeni, egu Tamana ese bema ia durua lasi tauna, be lau dekenai do ia mai diba lasi.”

⁶⁶Unai neganai iena diba tahua taudia momo ese Iesu idia rakatania, bona ia danu idia raka hebou lou lasi.

⁶⁷Vadaeni Iesu ese iena diba tahua taudia 12 dekenai ia nanadaia, ia gwau, “Umui danu do umui raka siri, a?”

⁶⁸Simona Petero ia haere ia dekenai, ia gwau, “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.

⁶⁹Ai be ai abidadama henia, bona ai diba vadaeni, oi be Dirava ena Helaga Tauna.”

⁷⁰Iesu ia gwau, “Lau be umui 12 lau abia hidi, ani? Gau tamona, umui ta be ia Satani vadaeni.”

⁷¹Ia ese Iuda, Simona Iskariote ena natuna ia gwauraia, badina ia ese Iesu do ia samania, ia mase. Ia danu idia 12 tauna ta.