Ioane 6:44-65

⁴⁴Nige tau esau i laugaibuma mo arigu eai, Tamana tauhetamariguma mo ia i niuriyama; asubena murina eai hinage abo ea hetorouioi.

⁴⁵Peroveta edi buka eai se uri si ene, ‘Isi gamagaridi Eaubada abo i heatadi.’ Tatao gamagaridi, esau, esau se ataiei, eo Tamana i heatadi, se laoma arigu eai.

⁴⁶Nige tau esau Tamana ie ita, iabom mo Eaubada arinai i laoma, ia Tamana i itayao.

⁴⁷Mamohoi, mamohoi, ea heribamiu ta, ia i sunumaegu mauri nige nosina i abiyao.

⁴⁸Eau wa mauri aretona ede.

⁴⁹Tamamiuyao barabara eai manna se ai, eo se mateo.

⁵⁰Ina areto ta galewa eai i dobima, ena tau esau i ai taba nige i mate.

⁵¹Eau areto maumaurina galewa eai i dobima: taba tau esau ina areto ta i ai abo i mauri nige nosina: areto eau abo ea mosei ta bulumagu ede, ia ede abo ea mosei tanoubu edi aba mauri.”

⁵²Arinai Iudea tataodi isibom se haiawayagara, si ene, “Ina tau ta edohana, abo bulumana i leama ta ai wa?”

⁵³Iesu abo i ribalau isi aridi eai i ene, “Mamohoi, mamohoi, ea heribamiu ta, taba Tau Natuna bulumana nige au ai, eo osinana nige au nom, taba nige mauri nuaboeamiu eai.

⁵⁴Ia bulumagu i ai, eo osinagu i nom, i mauri nige nosina, asubena murina eai hinage abo ea hetorouioi.

⁵⁵Bulumagu aiai mamohoi ede, eo osinagu nomnom mamohoi ede.

⁵⁶Ia bulumagu i ai, eo osinagu i nom, nuaboeagu eai i mia, eo nuaboeana eai ea mia.

⁵⁷Doha Tamana maumaurina i hetamariguma, eo Tamana debana eai ea mauri; tau esau hinage bulumagu ta i ai, ia debagu eai abo i mauri.”

⁵⁸Ina areto ta galewa eai i dobima; nige doha tamamiuyao manna se ai wa, eo se mate; ina areto ta tauaina taba i mauri nige nosina.”

⁵⁹Ina ginauri ta sunago alona eai i ribaedi, Kaperenauma eai i lauheataedi.

⁶⁰Ena heaheata gamagari headi riba ta se ataiei si ene, “Riba ta i piripiri ariri; eai abo i ataiei?”

⁶¹Ena heaheata ina riba ta se monumonunuei Iesu i nuatulobaiyao, i ribalau isi aridi eai i ene, “Ina riba ta i healabesibesimiu wa?

⁶²Edoha emi nuanuatu Tau Natuna ena au ita i awaseuio ena aba mia bagubagunana eai?

⁶³Earuana ede i abihemaurimiu; buluma nige aniona: riba ea heribamiu ta earua ede, eo mauri ede.

⁶⁴Taiede omi headi nige au sunusunumaei.” Iesu ena huia lage eai i nuatuiyao eai to eai nige se sunusunumaei, eo eai hinage abo i mauri eo eai abo i morui ede.

⁶⁵Ia hinage i ene, “Paana ede ina ea heribamiu ta ea ’ne, nige tau esau i laugaibuma mo arigu eai, Tamana iabom mo i heatanonohaiyao.”