Text copied!
CopyCompare
Buk Baibel long tokples Motu - IOANE - IOANE 6

IOANE 6:14-63

Help us?
Click on verse(s) to share them!
14Taunimanima ese una toa ia ese e karaia vada e itaia, bena eto, Momokani, tanobada bainema perovetana binai.
15A Iesu dibana idia na baema, bae dabaia tao, edia hanua pavapavana ai bae halaoa eto; una dainai ia na sibona ororo ai ma eha dara dae lou.
16Adorahi ai, ena hahediba vada e hekei kone ai.
17Bena vanaḡi auta ai e gui, gohu amo bae heau hanai, Kaperanaum baela eto. Hanua e boi, a Iesu na do sela dekedia.
18Bena guba ta ese e lasidia tao dainai, gohu vada e hurehure.
19Maila toi eiava hani e bara, bena idia ese Iesu e itaia, gohu kopina amo vanaḡi e raka heniava; bena e gari.
20To Iesu eto, Ina na lau; asio gari.
21Bena idia lalodia e namo, vanaḡi ai e udaia; bena maoromaoro e lao heniava gabunai eha kau.
22Daba ai hutuma na gohu unukahana ai gigini, dibadia vanaḡi ta lasi, hari hahediba ese e laohaia ḡauna mo; bona dibadia Iesu na ena hahediba ida asie gui, a hahediba mo sibodia vada ela.
23A vanaḡi haida na Tiberia amo e heau hanai, hari Lohiabada ese Dirava e hanamoa bona aniani e henidia gabuna badina amo e toa.
24Taunabunai, aru taudia vada e diba Iesu ena hahediba ida na lasihidia, bena hari vanaḡi auhidaosi ai ma e gui, Kaperanaum ela, Iesu eha tahua.
25Idia ese gohu kahana ai e davaria, bena e nanadaia, eto, Rabi e, edena nega ai oma?
26Iesu ese e haere henidia; eto, Momokani vaitani na hamaoromuimu, umui ese lau o tahugumu, dia toa o ita dainai, to aniani ḡaudia o ani bogamui e kunu dainai.
27Basio ḡaukara e oremu anianina iabina, a baine mia ela bona mauri hanaihanai anianina iabina ba ḡaukara. Una na Taunimanima Natuna ese baine henimui; badina be Tamana Dirava ese toa ta ienai vada e karaia.
28Bena idia ese e nanadaia, eto, Ai ese ede baia kara toma, Dirava ena ḡaukara ikarana?
29Iesu ese e haere henidia, eto, Dirava ena ḡaukara binai: e siaia tauna na ba kamonai henia.
30Idia ese ma e nanadaia, eto, Toana be dahaka ba karaia, baia itaia, hena baia kamonai henimu? Oi dahaka bo karamu?
31Ai senemai ese mana e aniava tano ḡaḡaena ai, buka ai e torea heḡereḡerena, eto, Adia aniani na ia ese guba amo e henidia dobiva.
32Iesu ese e haere henidia, eto, Momokani vaitani na hamaoromuimu, dia Mose ese aniani na guba amo se henimui dobiva; a Tamagu ese aniani guba amo vada e henimui dobimu, aniani korikorina binai.
33Badina be Dirava ena aniani na guba amo vada eme diho, bona mauri na tanobada e heniamu.
34Bena idia ese e noia, eto, Lohiabada e, ina aniani na dina iboudiai ba henimai.
35Iesu eto, Mauri anianina lau binai: dekegu bainema tauna na basine hitolo, bona baine abidadama henigu tauna na basine ranu mase, lasi ona lasi vaitani.
36A na hamaoromui, ani, vada o itagumu to asio abigu daemu.
37Tamagu ese e henigumu taudia iboudiai na dekegu baema; bona dekegu bainema tauna na basina lulua oho, lasi ona lasi vaitani.
38Badina be guba amo vada name diho, dia lauegu ura ikarana, to e siaigu Diravana ena ura ikarana.
39Bona e siaigu Diravana ena ura binai: ibouboudiai ia ese vada e henigu na ta basina reaia, a baina hatoredia isi dina gabena ai.
40Badina be Tamagu ena ura binai: Natuna bae raraia tao bona bae abidadama henia taudia iboudiai ese mauri hanaihanai bae abia, bona lau ese dina gabena ai baina haloredia isi.
41Bena Iuda taudia ese ia e maumauraia, badina be ia eto “Lau na guba amo eme diho anianina”.
42Idia eto, Ina na dia Iesu Iosef a? Tamana sinana asi dibada a? Edeheto ia na e tomamu “Lau na guba amo vada name diho”?
43Iesu ese e haere henidia, eto, Ene na asio maumau toma.
44Tamagu, e siaigu Diravana, ese baine veria mai tauna mo sibona lau dekegu bainema diba; bena lau ese baina hatorea isi dina gabena ai.
45Peroveta bukana ai ini e torea toma, eto, Idia iboudiai na Dirava ese baine hadibadia. Tamagu e kamonai heniamu bona ena hahediba herevadia e abi daemu taudia iboudiai lau dekegu e maimu.
46To tau ta ese Tamada se itaia; Dirava ena amo vada ema launa sibona ese vada e itaia.
47Momokani vaitani na hamaoromuimu, kamonai tauna ese mauri hanaihanai eme abia.
48Mauri anianina lau binai.
49Tamamui ese mana e aniava tano ḡaḡaena ai, to vada e mase.
50Guba amo e dihomu anianina binai, ta ese baine ania, ia na basine mase.
51Lau na mauri anianina, guba amo name diho; ta ese ina aniani baine ania, ia na do baine mauri hanaihanai. Lau ese baina henia anianina na lau hidiogu, tanobada ese mauri baine abilaia.
52Bena Iuda taudia na e hepapahuahu, eto, Ina tau ese hidiona ede baine henida toma, bena baita ania?
53Iesu ma e haere, eto, Momokani vaitani na hamaoromuimu, Taunimanima Natuna hidiona basio ania bona rarana danu basio inua, mauri na lalomui ai basine mia.
54A lau hidiogu baine ania bona raragu baine inua tauna ese mauri hanaihanai baine abia, bona dina gabena ai lau ese baina hatorea isi.
55Badina be lau hidiogu na aniani momokanina, bona lau raragu na inuinu ḡauna momokanina.
56Hidiogu baine ania bona raragu baine inua tauna na lau lalogu ai baine noho, lau danu ia lalonai baina noho.
57Tamada e maurimu, ia ese vada e siaigu bona Tamada dainai na maurimu na heto, baine anigu tauna danu lau daigu ai do baine mauri.
58Guba amo eme diho anianina binai; dia senemui ese e aniava ḡauna heḡereḡerena, e aniava, to vada e mase. Ina aniani baine ania tauna na do baine mauri hanaihanai.
59Ini hereva na dubu ai e gwaurai, Kaperanaum ai e hahedibava negana ai.
60Ena hahediba hutuma e kamonai, bena eto, Una na hereva metauna; daika ese baine abia dae diba?
61Iesu na lalona vada e parara, ena hahediba na una hereva e maumauraia, bena e hereva henidia, eto, Ina hereva ese eme hahekwakwanaimui a?
62O Taunimanima Natuna boma itaia, bema dae kau, e noholaia guna gabuna bema lou henia, ede bema heto?
63Lauma ese mauri e havaraiamu; tau-anina na asi ena hahenamo. Lau ese na hamaorolaimui herevadia na lauma bona mauri;

Read IOANE 6IOANE 6
Compare IOANE 6:14-63IOANE 6:14-63