Ioane 6:1-25

¹Ina ginauri ta muridi eai Iesu abo i awasi Galilaia gabogabona eai, gabogabo wa esana ede Tiberia.

²Moutuana lailai ia se hemuriwatai, paana ede heiheinoi gigiboridi i ginauridi tauasiasiebo aridi eai, se itadio.

³Iesu i dalasae oea esau deba pogana eai maena heaheatayao se bawa.

⁴Pasova, Iudea adi mataasi esau, i hanahanau.

⁵Iesu abo matana i tusaei, moutuana lailai i itadi se laolaoma ia arinai, to i ribalau Pilipo arinai, i ene, “Haedi falawa aba uneunena isi abo se aiai?”

⁶Ia nei doha ena ribariba Pilipo i lauita ena nuatu bena i italobai, iabom ena laulau bena i abi i nuatuiyao.

⁷Pilipo i ribalau ia arinai i ene, “Denari handere labui arinai taba falawa ta uneune taba nige ta hegonoahidi abo se heonabegana mo.”

⁸Heaheata esau Anederea, Simona Petero ena tau, i ribalau ia arinai i ene,

⁹“Gama esau inai, barley falawana haligigi i abidi, eo eama gagiridi labui, abo ta sahaidi, tatao se gamagari ariri?”

¹⁰Iesu i ene, “Tatao au hebawabigabigadi.” Lei lailai nei dimo eai ne. Tatao abo se bawabigabiga, isi nuana tausani haligigi.

¹¹Iesu falawa i abidi, i lautoi nonohai, abo i mosei heaheata aridi eai, heaheata hinage abo se soi wau tatao se bawabigabiga wa aridi eai; wau eama wa hinage doha, gonogonoadi.

¹²Se ai e bogadi se sese, Iesu abo i ribalau ena heaheata aridi eai, i ene, “Aiai otahaidi wa au peigogoi tabu begana au gabaei.”

¹³Arinai abo se peigogoidi, barley falawana haligigi wa, otahaidi bosa saudoudoi‐labui se hemonaudi, tatao se aiai e, aitoredi wa se toredi.

¹⁴Teina tatao ta heiheinoi gigibori wa Iesu i ginauri se ita, si ene, “Mamohoi, Peroveta se ribaei wa ia ede ina: i lagemao tanoubu eai ta.”

¹⁵Iesu i italobaidio isi edi adidiri eai mo ia bena se toai, abo se hedebasaei edi wasawasa, ia abo i lausuara, ie lau oea tupina esau eai, iabom.

¹⁶I maimailahi ena heaheata se dobi gabogabo eai.

¹⁷Waga esau eai se gerusae, gabogabo se tataawasi se lau Kaperenauma tehana eai. I masigirigudui, Iesu sora nige i laoma aridi eai.

¹⁸Mana lailai abo ie toa, arinai gabogabo i wowori.

¹⁹Isi abo se eare e, doha maila haiona e hasi abotai abo Iesu se ita, gabogabo potana eai i laulau: i hanahanauidi abo se matausi.

²⁰Ie ribalau isi aridi eai i ene, “Eau ede, tabu au matausi.”

²¹Ma nualolodi ia se abi waga eai; arinai waga wa ie duna edi aba lau wa geregerena eai.

²²Mara‐ie‐tom moutuadi wa se totoro hari sana awasi eai, se ita nige waga esau metai, esega mo ede arinai heaheatayao wa se geru, hinage se ita Iesu maedi nige se lau waga eai, isibom mo se lau:

²³(Taiede waga headi Tiberia eai se laoma se duna falawa edi aba aina eai wa, Guiau i lautoi wa murina eai).

²⁴Moutuadi wa Iesu nei eai nige se ita, eo ena heaheatayao hinage nige se itadi, isi hinage edi waga eai se geru, se laoma Kaperenauma, Iesu se eooi.

²⁵Abo se lobai hari sana awasi eai, ia se heriba, si ene, “Rabi e, huia esana u laoma inai?”