IOANE 6:1-14

¹Unai hereva murinai Iesu ia toreisi, Galilea ena gohu unai kahana dekenai ia giroa lou. Unai gohu ena ladana ta be Tiberia.

²Vadaeni taunimanima momo herea iena murina dekenai idia lao, badina be gorere hanamoa karadia ia karaia toana idia itaia dainai.

³Iesu be ororo dekenai ia daekau, unuseni iena diba tahua taudia danu ia helai diho.

⁴Iuda taudia edia Pasova aria dinana be ia kahirakahira.

⁵Iesu ese iena matana ia abia isi, taunimanima momo herea ia dekenai idia mai noho ia itaia, vadaeni Filipo dekenai ia hereva henia, ia gwau, “Ita be edeseni aniani gaudia do ita hoia, inai taunimanima do ita ubua totona?”

⁶Unai bamona ia hereva, Filipo ena lalona ia ura diba gwauraia, badina be ia diba dahaka do ia karaia.

⁷Filipo ese ia haere henia ia dekenai, ia gwau, “200 kina dekenai aniani gaudia do ita hoia, to do ia hegeregere lasi, sisina sisina sibona do idia ania.”

⁸Iena diba tahua tauna ta, ena ladana be Andrea, Simona Petero ena tadina, ese Iesu ia hereva henia, ia gwau,

⁹“Mero maragi ta be iniseni, ia be mai ena paraoa maragidia 5 bona gwarume maragi rua, to unai be edena bamona do ita karaia, taunimanima be momo herea?”

¹⁰Vadaeni Iesu ia gwau, “Taunimanima dekenai do umui hereva henia, do idia helai diho.” Unai gabu dekenai be rei momo ia noho. Vadaeni idia helai diho taudia be 5000 bamona.

¹¹Iesu ese inai aniani gaudia ia abia, ia hanamoa, vadaeni idia helai diho taudia ta ta ibounai dekenai ia henia. Gwarume danu unai bamona ia henia, taunimanima edia ura hegeregerena.

¹²Idia boga kunu, vadaeni Iesu ese iena diba tahua taudia dekenai ia hereva henia, ia gwau, “Aniani orena do umui haboua, kahana maragimaragi ta do ia boio lasi.”

¹³Unai dainai idia ese aniani orena idia haboua, vadaeni bosea 12 idia hahonua, unai paraoa maragi 5 sibona, taunimanima ese idia ania haorea lasi gaudia, idia rakatania dekena amo.

¹⁴Taunimanima be unai toa Iesu ese ia karaia gauna idia itaia, vadaeni idia gwau, “Momokani, tanobada dekenai do ia mai peroveta tauna be inai.”