IOANE 5:7-23

⁷Gorere tauna ese e haere henia, eto, Lohiabada e, ranu e halohilohiamu negadia ai, lau na asi iato-dobigu; gohu na raka heniamu ai ta e gunamu.

⁸Iesu ese e haduaia, eto, A tore isi, emu geda a lokua, a raka.

⁹Bena tauna e goada haraḡa-haraḡa, e tore isi, ena geda e lokua, e raka matama. Una dina be Dina Helaḡa.

¹⁰Taunabunai, Iuda taudia ese hari e hamauria tauna e gwau henia, eto, Ina na Dina Helaḡa; emu geda o abia loaloamu na mai taravatuna.

¹¹Ia e haere, eto, E hamaurigu tauna ese e haduagu, eto “Emu geda a lokua, a raka”.

¹²Bena idia ese e nanadaia, eto, Daika ese e hamaoromu, eto “Emu geda a lokua, a raka”?

¹³A e hamauria tauna na asi dibana daika ese e hamauria; badina be Iesu vada e raka oho, bona taunimanima hutuma una gabu ai e hebouva.

¹⁴Gabeamo Iesu ese una tau e davaria Dubu Helaḡa lalonai, bena e sisiba henia, eto, E, oi na vada ome mauri; basio kara dika lou, dika bada-hereana ta ese baine butumu tao na garina.

¹⁵Bena hari tau na ela, Iuda taudia e hamaorodia, e hamauria tauna na Iesu.

¹⁶Una dainai Iuda taudia ese Iesu e daḡedaḡe henia, badina be ia na Dina Helaḡa ai unu e kara toma.

¹⁷Iesu ese e haere henidia, eto, Tamagu na e ḡaukaramu ema bona hari; lau danu na ḡaukaramu.

¹⁸Una hereva dainai Iuda taudia ese iala-masena urana e urava, badina be Dina Helaḡa e hadikaia; bona dia una mo, ia danu ma e tomava Dirava be ia Tamana korikori, ia bona Dirava na heheḡereḡere.

¹⁹Taunabunai, Iesu ese e haere henidia, eto, Momokani vaitani na hamaoromuimu, Natuna na sibona ḡau ta ikarana asi dibana, a Tamana ena kara baine ita karadia mo baine kara. Tamana e karamu ḡaudia idoidiai Natuna danu baine kara.

²⁰Badina be Tamana ese Natuna e lalokau heniamu, bona ena kara iboudiai e hahedinarai heniamu: bona ini e hereamu karadia danu baine hahedinarai henia, ba hoa helaoreana.

²¹Badina be Tamana ese mase taudia e hatoredia isunu bona e hamauridiamu heḡereḡerena Natuna ese danu taunimanima vada e hamauridiamu, ena ura heḡereḡerena ai.

²²Tamana ese tau ta se hahemaoro heniamu; a hahemaoro siahuna idoinai Natuna vada e henia:

²³taunabunai taunimanima iboudiai ese Natuna bae matauraia, Tamana e matauraiamu heḡereḡerena. Natuna se matauraiamu tauna ese Tamana, Natuna e siaia Diravana, danu se matauraiamu.