Ioane 4:5-38

⁵I lau e, i lagema eanua esau Samaria eai, esana ede Saeka, tano wa Iakobo i mosei natuna Iosepa arinai, hanahanauna eai.

⁶Iakobo ana goila huana nei eai. Iesu ena tautausi eai e tauna se beruberu, arinai i bawabigabiga goila hasarina eai. Huiana ne mahana haligigi‐esega.

⁷Samaria sinena esau i laoma goila ie ledu: Iesu i ribalau ia arinai i ene, “Goila u leama, ea nom.”

⁸(Ia ena heaheata se lauo eanua eai, aiai adi se uneune).

⁹Samaria sinena wa abo i ribalau ia arinai i ene, “Edoham, oa Iudea tauna, goila u aiboda arigu eai, eau Samaria sinena? Iudea tataodi eo Samaria tataodi se heiheisugara.”

¹⁰Iesu i ribalau ia arinai, i ene, “Eaubada ena ainauia taba u nuatui, eo eai i heribam me, i ene, ‘Goila u leama ea nom.’ oa abo u aiboda ia arinai eo goila maumaurina abo i leawa.”

¹¹Sine wa i ribalau ia arinai i ene, “Taubada e, em ledu nige aba hedawedobena, hua hinage i dobi ariri: wau goila maumaurina wa haedi aba abina ede?

¹²Bena tamamai Iakobo u saetawatawai wa, goila sarana wa ia tauleamana ede, arinai ia i nomnom; eo nanatunayao eo ena suisui hinage?”

¹³Iesu i ribalau ia arinai i ene, “Eai to eai ina goila ta taba ie nom abo i gadomaguuio.

¹⁴Eai to eai goila wa eau ea mosei ie nom taba nige i gadomagu, goila wa ea mosei ia arinai, nuaboeana eai abo i hemala goila huana i bunubunuasima mauri nige nosina arinai.”

¹⁵Sine wa i ribalau ia arinai i ene, “Taubada e, wau goila wa u leama, abo nige ea gadomagu, eo abo hinage nige ea laoma eda lohaloha eai goila ea ledu.”

¹⁶Iesu ia i heriba i ene, “U lau monem u eogaiama, au laoma inai.”

¹⁷Sine wa i ribalau ia arinai i ene, “Eau nige monegu.” Iesu i ribalau ia arinai i ene, “U riba dudurai u ene ‘Eau nige monegu.’

¹⁸Monemyao haligigi u abidio; esau wa maem aue mia ia nige monem, wau em riba wa i dudurai.”

¹⁹Sine wa i ribalau ia arinai i ene, “Taubada e, nuana oa peroveta.

²⁰Tubutubumaiyao ina oea tupina eai ta se tabaohu; omi au ene Ierusalema tatao edi aba tabaohu mamohoina ede.”

²¹Iesu i ribalau ia arinai i ene, “Sine e, mamohoi, huiana abo i lagema omi ina oea tupina eai ta, Tamana abo nige au tabaohui, eo Ierusalema eai nige’e.

²²Emi tabaohu omi nige au nuatui: ai ema tabaohu ai nuatuiyao, abihemauri Iudea tataodi aridi eai i laoma.

²³Huiana abo i lagema, hinage i lagemao, tautabaohu tataodi tahunuadi earua eai eo nuatu mamohoina eai Tamana se tabaohui: doha ede nei Tamana tautabaohuina i eooidi.

²⁴Eaubada Earuana ede: isi ia se tabaohui abo se tabaohui earua eai eo nuatu mamohoina eai.”

²⁵Sine wa i ribalau ia arinai i ene, “Ea nuatui Mesia abo i lagema, esana ede Keriso: ia i laoma ginauri gamagaridi abo i heribamai.”

²⁶Iesu ia i heriba i ene, “Eau ede, maem ta ribariba.”

²⁷Isi ma ribaribadi na ena heaheatayao se lagetawaidi, sine ne maena se ribariba se ita se tagugu, ede nige esau i ene, “Saha u eooi?” eo “Ue saha u ribalau sine ne arinai?”

²⁸Sine wa ena ledu i laugabaei, ie lau eanua eai, i ribalau tatao aridi eai,

²⁹i ene, “Au laoma tau esau au ita, egu laulau gamagaridi ea laulauedi wa ia i hemasarahadi arigu eai: ia Keriso e nige’e?”

³⁰Isi eanua se laugabaei se oigogo se lau ia arinai.

³¹Isi soradi, ena heaheata se ribaribadaoi, si ene, “Tanuagamai e, u aiai.”

³²Ia i ribalau isi aridi eai i ene, “Agu aiai nonohana, nige au nuatui.”

³³Arinai abo heaheata wa se heunaboisaha si ene, “Tau esau ana aiai i leama wa?”

³⁴Iesu i heribadi i ene, “Agu aiai ede ina, tauhetamariguma ena nuatu bena ea abi, eo ana paisoa ea ginauriheohi.

³⁵Omi nige au ene, nawalai hasi abo boreboreha huiana wa? Au ita ea heribamiu ta, Matamiu au tusaedi, oeadi ne au italaedi, masuri se pogalao.

³⁶Sitona tautomtomna se hemaisadi, aiai se peigogo mauri nige nosina arinai, lie tauumaina eo aiai tauabina isi abo taudi labui se kodelabulabui.

³⁷Arinai ede riba wa se ribaei riba mamohoina ede, ‘Esau i umauma, esau aiai i abiabi.’

³⁸Ea hetamarimiu aiaina bena au abi hari tatao adi paisoa wa se umaiyao, adi paisoa au helaudamai.”