IOANE 4:21-40

²¹Iesu eto, Egu hereva avabia dae: nega ta be maimu ina ororo ai bona Ierusalem ai danu Tamada basio toma henia diho.

²²Umui Samaria taumui ese o toma henia dihomu Diravana na asi dibamui; ai be a toma henia dihomu Diravana na dibamai. Badina be hahemauri na Iuda taumai emai amo.

²³A nega ta be maimu, harihari vada be kaumu, toma-diho taudia korikori ese Tamada bae toma henia diho lauma ai bona momokani ai, badina be Tamada ese unu bae toma henia diho toma taudia na e tahudiamu.

²⁴Dirava na Lauma; bona bae toma henia diho taudia ese lauma ai bona momokani ai bae toma henia diho.

²⁵Hahine na eto, Lau na dibagu Mesia, Keriso e gwauraiamu, do bainema; bona bainema negana ai ia ese ḡau iboudiai baine gwaurai hedinarai.

²⁶Iesu ese e hamaoroa, eto, Tauna bina lau, vada na hereva henimumu.

²⁷Una negana ai ena hahediba vada e lou, ia dekenai e kau, bena e hoa, badina be ia na hahine ta ida e hereva-herevamu. A ta ese se nanadaia “Dahaka o tahuamu?” eiava “Dahaka dainai ia ida o hereva-herevamu?”

²⁸Bena una hahule ese ena hodu e rakatania, hanua ela. Ia ese hanua taudia e hamaorodia, eto,

²⁹Aoma, tau ta a itaia, egu kara iboudiai ia ese e hamaorolaigu. Dahaka o tomamu, ia na Keriso eiava?

³⁰Bena idia na hanua amo e aru lasi, ia dekena ela.

³¹Una negana ai ena hahediba ese e hamaoroa, eto, Rabi e, avaniani.

³²A ia ese e hamaorodia, eto, Lau na mai agu, umui asi dibamui gauna.

³³Bena ena hahediba na sibodia e henanadai heheni, eto, Ta ese ana aniani vada e mailaia eiava?

³⁴A Iesu ese e hamaorodia, eto, Agu aniani binai: e siaigu Diravana ena ura baina karaia, iena ḡaukara baina haḡuḡurua.

³⁵Umui na mai emui hereva ta, ani, o tomamu “Hua hani baela bena uit iutuna negana baine gini dae”. A na hamaoromuimu, a gaga isi, uma ba ita, anidia vada e lo, iutuna negana heḡereḡerena.

³⁶lutuna tauna ese davana e abiamu, bena uma anina e habouamu, mauri hanaihanai ḡauna; taunabunai, ihadona tauna bona iutuna tauna bae moale hebou.

³⁷Badina be vaia e gwauraiamu herevana be momokani: ihadona tauna be idau, iutuna tauna danu idau.

³⁸Lau ese na siaimui, asio hekwarahilaia ḡauna na ba utua; haida be vada e hekwarahi, umui ese edia hekwarahi anina vada ome abia.

³⁹Samaria taudia hutuma una hanua lalonai ese Iesu e abiabiraia, una hahine ena hereva dainai: hahine na eto “Egu kara iboudiai ia ese e hamaorolaigu”.

⁴⁰Taunabunai, hari Samaria taudia na ia dekena ela, e noia, dekediai baine noho; bena dina rua unuseni ai e noho.