Ioane 4:15-48

¹⁵Sine wa i ribalau ia arinai i ene, “Taubada e, wau goila wa u leama, abo nige ea gadomagu, eo abo hinage nige ea laoma eda lohaloha eai goila ea ledu.”

¹⁶Iesu ia i heriba i ene, “U lau monem u eogaiama, au laoma inai.”

¹⁷Sine wa i ribalau ia arinai i ene, “Eau nige monegu.” Iesu i ribalau ia arinai i ene, “U riba dudurai u ene ‘Eau nige monegu.’

¹⁸Monemyao haligigi u abidio; esau wa maem aue mia ia nige monem, wau em riba wa i dudurai.”

¹⁹Sine wa i ribalau ia arinai i ene, “Taubada e, nuana oa peroveta.

²⁰Tubutubumaiyao ina oea tupina eai ta se tabaohu; omi au ene Ierusalema tatao edi aba tabaohu mamohoina ede.”

²¹Iesu i ribalau ia arinai i ene, “Sine e, mamohoi, huiana abo i lagema omi ina oea tupina eai ta, Tamana abo nige au tabaohui, eo Ierusalema eai nige’e.

²²Emi tabaohu omi nige au nuatui: ai ema tabaohu ai nuatuiyao, abihemauri Iudea tataodi aridi eai i laoma.

²³Huiana abo i lagema, hinage i lagemao, tautabaohu tataodi tahunuadi earua eai eo nuatu mamohoina eai Tamana se tabaohui: doha ede nei Tamana tautabaohuina i eooidi.

²⁴Eaubada Earuana ede: isi ia se tabaohui abo se tabaohui earua eai eo nuatu mamohoina eai.”

²⁵Sine wa i ribalau ia arinai i ene, “Ea nuatui Mesia abo i lagema, esana ede Keriso: ia i laoma ginauri gamagaridi abo i heribamai.”

²⁶Iesu ia i heriba i ene, “Eau ede, maem ta ribariba.”

²⁷Isi ma ribaribadi na ena heaheatayao se lagetawaidi, sine ne maena se ribariba se ita se tagugu, ede nige esau i ene, “Saha u eooi?” eo “Ue saha u ribalau sine ne arinai?”

²⁸Sine wa ena ledu i laugabaei, ie lau eanua eai, i ribalau tatao aridi eai,

²⁹i ene, “Au laoma tau esau au ita, egu laulau gamagaridi ea laulauedi wa ia i hemasarahadi arigu eai: ia Keriso e nige’e?”

³⁰Isi eanua se laugabaei se oigogo se lau ia arinai.

³¹Isi soradi, ena heaheata se ribaribadaoi, si ene, “Tanuagamai e, u aiai.”

³²Ia i ribalau isi aridi eai i ene, “Agu aiai nonohana, nige au nuatui.”

³³Arinai abo heaheata wa se heunaboisaha si ene, “Tau esau ana aiai i leama wa?”

³⁴Iesu i heribadi i ene, “Agu aiai ede ina, tauhetamariguma ena nuatu bena ea abi, eo ana paisoa ea ginauriheohi.

³⁵Omi nige au ene, nawalai hasi abo boreboreha huiana wa? Au ita ea heribamiu ta, Matamiu au tusaedi, oeadi ne au italaedi, masuri se pogalao.

³⁶Sitona tautomtomna se hemaisadi, aiai se peigogo mauri nige nosina arinai, lie tauumaina eo aiai tauabina isi abo taudi labui se kodelabulabui.

³⁷Arinai ede riba wa se ribaei riba mamohoina ede, ‘Esau i umauma, esau aiai i abiabi.’

³⁸Ea hetamarimiu aiaina bena au abi hari tatao adi paisoa wa se umaiyao, adi paisoa au helaudamai.”

³⁹Samaria tataodi gamagaridi nei eanua eai ne ia se ataiwatai sine wa ena riba eai, i ribahemasaraha wa, i ene, “Egu laulau gamagaridi ea laulauedi i ribahemasarahadi arigu eai.”

⁴⁰Samaria tataodi se lagema se ribagadogadora ia arinai bena i mia, arinai asubena labui aridi eai ie mia.

⁴¹Ia ena riba arinai abo gamagaridi se sunusunumaei.

⁴²Isi se ribalau sine wa arinai, si ene, “Ai abo ai sunumaei hedeomi oa nige em riba arinai, ia hinage ai itayao eo ai nuatuiyao ia Keriso, tanoubu Tauhemauri mamohoina ede.”

⁴³Asubena labui wa i miaedi abo i laugabaedi ie lau Galilaia.

⁴⁴Iesu i ribahemasaraha i ene, “Peroveta tauna nige se heasisiei ena eanua mamohoina eai.”

⁴⁵Ia abo ie lage Galilaia eai, Galilaia tataodi ia se taubigai, paana ede ginauri gamagaridi i hetubudi Ierusalema mataasina eai isi se itadio: isi hinage se lau mataasi eai wa.

⁴⁶Arinai abo Iesu ie uio Kana Galilaia eai, lahinae nei eai goila ena aba hemala waina wa. Wasawasa esau Kaperenauma eai natuna‐tau i asiebo.

⁴⁷Tau wa wasa i ataiei Iesu Iudea i laugabaei i laoma Galilaia eai, ie lau Iesu arinai i awanori bena i dobi ia natuna‐tau i hemauri: ia matena i hanahanau.

⁴⁸Iesu i ribalau ia arinai i ene, “Taba heiheinoidi eo gigiboridi nige au itadi taba nige au sunusunumaei.”