IOANE 3:4-23

⁴Bena Nikodemo ese e nanadaia, eto, Taunimanima na tau-badana negana ai ede baine vara lou toma? Sinana bogana ai ma baine vareai lou, ma baine vara lou a?

⁵Iesu e haere, eto, Momokani vaitani na hamaoromumu, taunimanima na ranu amo bona Lauma ena amo basinema vara, ia na Dirava ena basileia lalonai basinema raka vareai diba.

⁶Tau-anina ena amo e varamu ḡauna be tau-anina; Lauma ena amo e varamu ḡauna be lauma.

⁷Egu hereva basio hoalaia, nato “Ba vara lou”.

⁸Lai be ena ura gabuna amo e toamu, bona reḡena o kamonaimu, to asi dibamu ede amo e maimu bona ede e laomu. Lauma ena amo e varamu taudia iboudiai danu unuheheto.

⁹Nikodemo ma eto, Ini ḡau be ede bae vara toma?

¹⁰Iesu ma e haere, eto, Oi na Israel taudia edia hahediba tauna, to ini ḡau na asi dibamu a?

¹¹Momokani vaitani na hamaoromumu, ai na dibamai ḡaudia a herevalaimu, bona a ita ḡaudia a gwauraimu, to emai hereva na asio abi daemu.

¹²Lau ese tanobada ḡaudia na herevalai henimumu to asio abi daemu, o guba ḡaudia baina herevalai henimu be ede bavabi dae toma?

¹³Tau ta guba ai se dae kau, guba amo e diho tauna mo sibona: Taunimanima Natuna bunai, iena noho gabuna na guba ai.

¹⁴Mose ese gaigai tano ḡaḡaena ai e piua isi heḡereḡerena, Taunimanima Natuna danu unu bae piua isi toma;

¹⁵bena bae abidadama henia taudia iboudiai ese mauri hanaihanai bae abia.

¹⁶Badina be Dirava ese tanobada ini e lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.

¹⁷Badina be Dirava ese Natuna tanobada e siaia mai na dia tanobada ihahemaoro-henina totona, to tanobada hari ia bagunai do baine mauri.

¹⁸E abidadama heniamu tauna na se hahemaoro heniamu, to se abidadama heniamu tauna na vada e hahemaoro henia vaitani, badina be ia ese Dirava Natuna vara-edeana ladana na se abidadama heniamu dainai.

¹⁹Hahemaoro badina binai: diari na tanobada ai vada eme vara, a taunimanima ese dibura e ura henia badamu, diari e ura henia maraḡimu; badina be edia kara na didika.

²⁰Badina be kara dika taudia iboudiai ese diari e inai heniamu, diari asie lao heniamu, edia kara bae hedinarai na garina.

²¹A kara momokani ibadinana tauna ese diari e lao heniamu, bena Dirava lalonai e karamu karadia na bae hedinarai.

²²Unu ḡau muridiai, Iesu mai ena hahediba ida Iudea tanona ela; unuseni ai ia na idia ida e nohova bona e bapatisova.

²³Ioane danu Aenon ai, Salim kahana ai, e bapatisova, badina be ranu na bada unuseni ai. Taunimanima na unu e laova, bena e bapatisodiava.