IOANE 3:3-30

³Iesu ia haere henia, ia gwau, “Momokani, momokani lau hamaoroa oi dekenai, bema taunimanima ta be ia vara lou lasi, ia be Dirava ena Basileia do ia itaia diba lasi.”

⁴Vadaeni Nikodemo ese ia nanadaia, ia gwau, “Taunimanima be ia tau badana neganai, edena bamona do ia vara lou diba? Iena sinana ena bogana dekenai do ia vareai lou diba, vadaeni do ia vara lou, a?”

⁵Iesu ia haere, ia gwau, “Momokani, momokani lau hamaoroa oi dekenai, taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi.

⁶Tauanina dekena amo ia vara gauna be tauanina, Lauma Helaga dekena amo ia vara gauna be lauma.

⁷Lauegu hereva dekenai oi hoa lasi, lau gwau do oi vara lou.

⁸Lai be ena ura gabuna dekena amo ia toa, bona ena regena oi kamonai, to oi diba lasi edeseni dekena amo ia mai, bona edeseni ia lao. Lauma Helaga dekena amo idia vara taudia ibounai danu unai bamona.”

⁹Nikodemo ma ia gwau, “Inai gaudia be edena bamona do idia vara?”

¹⁰Iesu ma ia haere, ia gwau, “Oi be Israela taudia edia hadibaia tauna, to inai gaudia be oi diba lasi, a?

¹¹Momokani, momokani lau hamaoroa oi dekenai, ai be ai diba gauna ai herevalaia, bona ai itaia gauna ai gwauraia, to aiemai hereva be umui ta umui abia dae lasi.

¹²Tanobada gaudia lau herevalaia oi dekenai to oi abia dae lasi, to bema guba gaudia do lau herevalaia oi dekenai, be edena bamona do oi abia dae diba?

¹³Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai, iena noho gabuna be guba.”

¹⁴“Mose ese taunimanima idia noho lasi tano dekenai gaigai ia abia isi bamona, Taunimanima ena Natuna danu unai bamona do idia abia isi.

¹⁵Vadaeni do idia abidadama henia taudia ibounai ese mauri hanaihanai do idia abia.

¹⁶“Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.

¹⁷Badina be Dirava ese iena Natuna tanobada dekenai ia siaia mai, be tanobada ia kota henia totona ia mai lasi, to tanobada be ia dainai mauri do ia abia.

¹⁸“Dirava ena Natuna ia abidadama henia tauna be do ia kota henia lasi, to ia abidadama henia lasi tauna be ia kota henia vadaeni, badina be ia ese Dirava ena Natuna tamona sibona ia vara, ena ladana ia abidadama henia lasi dainai.

¹⁹Kota henia ena badina be inai, diari be tanobada dekenai ia mai vadaeni, to taunimanima ese dibura idia ura henia bada, diari be idia ura henia maragi, badina edia kara be ia dika.

²⁰Badina be kara dika taudia ibounai ese diari idia ura lasi, diari gabuna dekenai idia lao lasi, edia kara do idia hedinaraia garina.

²¹To kara momokani idia badinaia taudia ese diari dekenai idia lao, vadaeni diari ese ia hedinaraia, idia ese kara namodia idia karaia, Dirava idia kamonai henia dainai.”

²²Unai gaudia murinai, Iesu mai ena diba tahua taudia danu Iudea tano dekenai idia lao, unuseni ia be idia danu idia noho, bona ia bapatiso henia.

²³Ioane danu Aenona dekenai, Salima ena kahana dekenai, ia bapatiso henia, badina ranu be ia bada unai gabu dekenai. Taunimanima be unuseni idia lao, vadaeni ia bapatiso henia idia dekenai.

²⁴Unai be Ioane dibura ruma dekenai do idia koua lasi neganai.

²⁵Unai neganai Ioane ena diba tahua taudia be Iuda tauna ta danu goeva bona helaga dalana idia hepapahuahu.

²⁶Vadaeni, idia be Ioane dekenai idia lao, idia gwau, “Rabi e, Ioridane Sinavai unai kahana dekenai oi danu ia noho, bona oi ese oi herevalaia tauna be hari ia bapatiso karaia noho. Bona taunimanima ibounai ia dekenai idia lao noho.”

²⁷Ioane ia haere, ia gwau, “Bema Dirava ese ia henia lasi neganai, tau ta be gau ta do ia abia diba lasi.

²⁸Umui danu umui diba lau gwau lau be Keriso lasi, to iena vairana dekenai lau mai guna totona Dirava ese lau ia siaia vadaeni.

²⁹Headava matamata hahine be headava matamata tauna ese ia biagua. To headava matamata tauna ena turana be ia gini noho, ia kamonai noho, vadaeni headava matamata tauna ena gadona ia kamonai neganai ia moale bada. Unai dainai, lauegu moale be ia momokani vadaeni.

³⁰Ia be do ia bada lao, lau be do lau maragi lao.”