Ioane 3:16-30

¹⁶“Eaubada tanoubu i gadosisiedi doha ede ina, ia Natueseesegana i moseyao tau esa, tau esa ia i nuatui taba nige i mate, na abo i mauri nige nosina.

¹⁷Eaubada, Natuna nige i hetamariama tanoubu eai ta, bena tanoubu i hegiru: na ena nuatu mo bena tanoubu i tuahemauri.

¹⁸Tau esau ia i sunusunumaei nige se hegiru: ia nige i sunumaei se hegiru nonohaiyao paana ede Eaubada Natueseesegana esana nige i nuatui.

¹⁹Hegiruna wa, ia ede ina, marana i lagemao tanoubu eai ta, tatao masigiri gadohina se gadohi, marana wa nige se henua, paana ede edi laulau se baaea mo.

²⁰Tatao gamagaridi edi laulau se baaea marana se halanuinuiei, eo nige se laoma marana eai, edi laulau ata se hemasarahadi.

²¹Ena tau esau riba mamohoi laulauna i laulauedi, ia marana eai i laoma, ena laulau abo se masaraha, paana ede Eaubada maena.”

²²Ina ginauri ta muridi eai Iesu ena heaheata maenayao se lau Iudea oeana eai; nei eai maedi se mia, eo se hebahebapatiso.

²³Ioane hinage i hebapatiso Enona eai Salima hanahanauna eai, paana goila lailai nei eai; tatao se laolaoma arinai se hebapatisoidi.

²⁴Ioane sora numa masigiri eai nige se tutugudui.

²⁵Ioane ena heaheatayao headi maedi Iudea tauna esau edi heaa laulauna se haiawayagaraei.

²⁶Abo se laoma Ioane arinai se heriba, si ene, “Rabi e, lahinae tau wa maem Ioridana hari teha eai, ia u wasaduaiei wa, ia ede i bapatiso eo tatao gamagaridi se laoma ia arinai.”

²⁷Ioane i heribadi, i ene, “Nige tau esau ginauri i abigaibui, galewa eai mo se mosei abo i abi.

²⁸Omi au nuatui lahinae ea riba hemasarahaguo, ea ’ne, ‘Eau nige Keriso, eau se hetamarigu ia ea bagubagunaei.’

²⁹Ia sinetawasora ie abi ia ede tautawasora: tautawasora ena heriam i totoro, eo arinana i ataiei, ie kode ariri paana ede tautawasora arinana i ataiei: egu kode teina arinai se hemamohoiei.

³⁰Ia abo ie sae, eau abo ea dobidobi.”