Ioane 2:13-23

¹³Iudea adi pasova i hanahanaumao, Iesu abo ie sae Ierusalema eai.

¹⁴Dubu tabuna alona eai bulumakau eo, mamoe eo, bunebune tauunedi i lobaidi: eo moni tauheduhedududi hinage se bawa.

¹⁵Ia maina gagiridi i abidi pidipidiri i audi abo numa tabuna alona eai i aiduiedi murimuri eai, eo mamoe, eo bulumakau hinage, eo moni‐tauheduhedududi edi moni i hegoigabaedi, eo edi hatahata i ahalabuidi.

¹⁶Bunebune tau uneunedi i heribadi i ene, “Teina ginauri au uioidi: Tamagu ena numa tabu bena au abi i hemala emi aba uneune.”

¹⁷Ena heaheatayao uriuri wa nuadi ie sae, doha si ene, “Em numa nuagigiborina nuagu ie gabu.”

¹⁸Iudea tataodi abo se ribalau ia arinai, si ene, “Heiheinoina saha u heitamai, ina laulau ta u laulauei?”

¹⁹Iesu i heuioidi, i ene, “Numa tabuna ta au lopagorigori, asubena haiona abo ea hetorouioi.”

²⁰Abo Iudea tataodi si ene, “Ina dubu tabuna ta borimai tatao‐labui‐si‐mate‐haligigiesega se ginaginauri: bena asubena haiona mo oa abo u hetoro wa?”

²¹Doha tauna ia ede numa tabunana i ribaei.

²²Huia murina eai, mate eai i torouio, riba wa i heribadi wa ena heaheatayao se henuaisini, eo uriuri tabuna se awamamohoiei, eo riba wa Iesu i ribaei.

²³Pasova mataasina huiana eai, Iesu ie lau Ierusalema, nei eai tatao gamagaridi ia esana se awamamohoiei, paana heiheinoi gamagaridi se itadi;