Ioane 21:13-25

¹³Iesu abo i laoma, falawa ie abi i mosei isi aridi eai, eo eama hinage doha.

¹⁴Ena mate eai i torouioma, teina ta abo ena taumasaraha hehaionana ena heaheatayao matadi eai.

¹⁵Se aiai lautom, Iesu abo i ribalau Simona Petero arinai i ene, “Simona, Ioane natuna e, oa u gadosisiaririegu, nige doha ina headi ta?” Petero i ene, “E Guiau, u nuatuiyao ea gadosisiem.” Ia i heriba i ene. “Egu arenio u suidi.”

¹⁶Ma labui hinage i heriba, i ene, “Simona, Ioane natuna e, u gadosisiegu wa?” Ie ribalau ia arinai i ene, “E Guiau, u nuatuiyao ea gadosisiem.” Ie ribalau ia arinai i ene, “Egu mamoe u suidi.”

¹⁷Ma haiona hinage i ribalau ia arinai, i ene, “Simona, Ioane natuna e, u gadosisiegu wa?” Petero abo nuana i baaea paana ma haiona Iesu i oimurini i ene, “U gadosisiegu wa?” Arinai abo ia i heriba i ene, “Guiau e, nuatudi gamagaridi u nuatuidio: u nuatuiyao ea gadosisiem.” Iesu ia i heriba, i ene, “Egu mamoe u suidi.

¹⁸Mamohoi, mamohoi, ea heribam ta, oa ma hewarim eai oabom u taididiniuioim, u laulau gaibu mo; sora u tautaubada abo nimam u helelelaedi esau abo i auauim, ia abo hinage i laem dobila wa nige u henua arinai.”

¹⁹Teina riba ta i ribaei, ia matena i ribahemasaraha, arinai Eaubada abo i hedebasaei. Riba wa i ribalautom, ia abo Petero i heriba, i ene, “U hemuriwataiguma.”

²⁰Petero i torobui heaheatana Iesu i gadosisiei wa ie ita i laulauwataidi; ia ede ia ie ota Iesu nuapouna eai edi huia aiai eai wa, eo hinage i ene, “Guiau e, eai abo i moruim?”

²¹Petero ia ie ita Iesu arinai ie riba i ene, “Guiau e, tau ta hinage abo edohana?”

²²Iesu ia i heriba, i ene, “Taba egu nuatu ea ’ne i mia i lau e ea uioma, oa u ene saha? Oa mo u hemuriwataigu.”

²³Teina riba ta abo ehadiyao se hetubu se laei, si ene, “Teina heaheata ta taba nige i mate:” taiede Iesu nige i ene, taba nige i mate; na i ene mo, “Taba egu nuatu ea ’ne i mia i lau e ea uioma, oa u ene saha?”

²⁴Wau heaheata wa ia ede teina ginauridi i ribahemasarahadi, eo i uridi hinage; ta nuatui hinage ia ie riba mamohoi.

²⁵Ginauri gamagaridi hinage Iesu i ginauridi, taba se uriheohidi nuana tanoubu ta abo abatorena nige gonoana, buka wa abo se gamagari ariri. Amen.