IOANE 21:1-18

¹MIZMIZ 21 NOSIK 1-19 Nerut kerkerge, Iesu ko tababu batomeda taba memegleem maike Taiberia aukeperge, e able tonartonar batomeilu:

²Simona Peteru, Tomas (abi dabgelare Okak Aosmerle), Natanial (Canalam muige Galilige), Zebedaiora werem pa darali, a tabara neis ga daralei Iesui memeglelam ge okakise etami.

³Simona Peterude eudige yabi wader daratagerda, “Ka tabakiamulu larem.” Wige wader natkareta abi ikaidarda, “Mimi nabakware.” Wige adem daragemda a bakiauda narge batri, wige kemerkemer able ki ikadarda nole lar asaperkak.

⁴Nade ga lim deskeser, Iesuge wege ekweireder, ege memegle nole umerkak urder e Iesu ge tikweireder.

⁵Ege eudige yabi darabgerda, “Kara buai, aka wa nole lar esaperda ao”? Wige abi tiditagerda, “Nolekar.”

⁶Ege eudige yabi daratagerda, “Wa waba larasaperlu batawerdare narbit tag pekge narira; wa ya lar nardarare.” Wige larasaperlu batawereda wi umerkak ko wadigwarda ableglam auka mitkar lar ge nagriweretlare.

⁷Able memegle ya Iesude abim lag waikeli Simona Peteru detagri, “E Ople pedali!” Simona Peterude ge tabara wali adem igilu. Nade e asri Ople ge tadawer, e tababu waliu ko bamisri a eupamada gurim.

⁸Wader memegle narge tabakiauda weem larasaperlu tigwatlare emetu lar dabweiri; ableglam wi nole welam murizge urder.

⁹Nade wi wege baupamarti, wige erdarda lar urge ikairtedera bered ga nagriweretlare.

¹⁰Iesu ge akaida yabi daratagerda, “Wa wader lar taisare pe wawa tesaperda.”

¹¹Simona Peteru bakiamuda narge a takomeda lar asaperlu tigwater emetu large dabweiri. Ge nagriweretlare 153 au lar muige larasaperluge ge e nole bargeirda.

¹²Iesude yabi daratagerda, “Wa tabakiaure lewer arwem.” Able memegle ge gair geumge bakerer abi waitmerda, `Ma nete nali?' ableglam wi umele urder e Ople dali.

¹³Iesu bakiamuda yabim, bered etarukda a ikaida yabi nakwarda. A ga akaida yabi lar nakwarda able orwairorwair.

¹⁴Able kerkerge neis a netat gaber Iesu tababu batomeda taba memegleem nade ge eudlam ekiamda.

¹⁵Nade yaba lewer aro esemeda, Iesude Simona Peterui itmeri, “Simona, Zonera werem, nako ma karim mamor lag ikeli pe able legize karim lag ikereda?” Ege abi detagri, “Waw Ople, mama umele nali ka marim lag ikeli.” Iesu eudige akaida abi detagri, “Ma kara kebi mamoi naseserdawem.”

¹⁶Neis gaber Iesude ga ko eutmeri, “Simona, Zonera werem, nako ma karim lag ikeli?” Ege abi detagri, “Waw Ople, mama umele nali ka karim lag ikeli.” Iesude ga abi detagri, “Ma kara mamoe naseserdawem.”

¹⁷A neis a netat gaber Iesude ko abi itmeri, “Simona, Zonera werem, nako ma karim lag ikeli?” Peterura okasosok barki ableglam Iesude abi itmeri neis a netat gaber `Nako ma karim lag ikeli?' E Iesui detager, “Ople, mama umele nali gair lu; mama umele kaka marim lag ikeli!” Iesu ga akaida abi detagri, “Ma kara mamoe naseserdawem.”

¹⁸“Ka mari agekar mir natageli; nade mama kelarkelar wanali mai mabu ma mara wali waisgerikli a obakesli nagedim ma laglag obakiamuda; nade ma ya akai aule bai, mai mara ya tag itrimurker a wader legize ya mari wanazgiriklare a mari wanagaredlare able utebem ma nole lagkak obakiamuda.”