Ioane 20:8-26

⁸Heaheata esau wa, iaede i lagebaguna bousa eai wa, abo hinage i lulau eo ie ita, eo i awamamohoiei.

⁹Sora uriuri tabuna nige se nuatukomakomani, ia mate eai taba i torouioma.

¹⁰Tauheaheata wa abo se uio edi numa eai.

¹¹Na Maria i totoro bousa murimurina eai, i doudou; ma doudouna ie durudobi, i italau bousa alona eai.

¹²Aneru labui i itadi adi lulu se posiposi, se bawabigabiga Iesu edi aba torena eai wa, esau uruna eai, esau aena eai.

¹³Isi ia se heriba, si ene, “Sine e, saha u doui?” To i heribadi i ene, “Egu Guiau se laehesuarayao, eo ia edi aba torena nige ea ita.”

¹⁴Ie riba ina doha, abo i sinibui Iesu ie ita i totoro; nige i nuatui i ene Iesu.

¹⁵Iesu ia i heriba, i ene, “Sine e, saha u doui? Eai u eooi?” I ene bena oea tauitawataina, arinai enaba, “Taubada e, taba oa u laeudoiei em aba torena u heribagu, eau abo ea laehesuara.”

¹⁶Iesu ie riba i ene, “Maria e.” I torobui, i ene, “Raboni e!” heaheasonina ede, Tanuagagu e.

¹⁷Iesu ia i heriba, i ene, “Tabu u abiitagu; sora nige ea awasae Tamagu arinai: taiede u lau egu tataoyao aridi eai u ribaei, u ene, ea awasaelau Tamagu arinai, eo Tamamiu arinai; eo egu Eaubada arinai, eo emi Eaubada.”

¹⁸Maria Magadala abo i laoma heaheata i heribadi Guiau i itayao eo, wau riba wa hinage ia i heriba.

¹⁹Nei asubenana ne, e, i maimailahi, Sabati asubena bagubagunana eai, ena heaheatayao se oigogoesega numa eai, dobila hinage se gududi, paana ede Iudea tataodi se matausiedi, Iesu abo i lagema i totoro duaduaridi eai, i ribalau aridi eai i ene, “Nuamiu se taru.”

²⁰Ie riba ina doha, nimana eo lisilisina i heitadi. Ena heaheatayao Guiau se ita nuadi se kode.

²¹Iesu abo i heribauioidi, i ene, “Nuamiu se taru: doha Tamagu i hetamariguma, eau hinage ea hetamarimiu.”

²²Ie riba ina doha, abo i eahualau isi aridi eai, eo i ribalau aridi eai, i ene, “Earua Tabuna au abi.

²³Eai to eai ena baaea au nuatugabaedi, baaea wa aridi eai se nuatugabaedio; eai to eai ena baaea au ene se otawa, taiede se otawa.”

²⁴Na Toma, saudoudoi labui wa esau, esana Godegode, Iesu ena huia laoma eai wa, ia nige maedi.

²⁵Heaheata headi ia se heriba si ene, “Guiau ai itayao.” Ia abo i ene, “Ena nimana eai poasi gaidi nige ea itadi, eo ena nimagigigu nige ea tore poasi gaidi eai wa, eo ena nimagu nige ea torelaei lisilisina eai, taba nige ea awamamohoiei.”

²⁶Asubena haligigi‐haiona muridi eai ena heaheatayao numa alona eai se bawa Toma hinage maedi: dobila se gududio, Iesu i laoma isi duaduaridi eai i totoro, i ene, “Nuamiu se taru.”