IOANE 20:3-21

³Unai dainai Petero bona inai diba tahua tauna ta idia toreisi, guria gabuna dekenai idia heau lao.

⁴Ruaosi idia heau hebou, vadaeni inai diba tahua tauna ta ese Petero ia heau hanaia, ia ese guria gabuna dekenai ia ginidae guna.

⁵Vadaeni ia ese ia itaia lalona dekenai, dabua aukana ia itaia unuseni, to guria gabuna dekenai ia raka vareai lasi.

⁶Simona Petero ese iena murina dekenai ia lao, maoromaoro guria gabuna lalona dekenai ia raka vareai. Vadaeni ia ese dabua aukadia ia itaia, unuseni idia noho,

⁷bona taoele danu, Iesu ena kwarana idia kumia gauna, be dabua aukadia danu idia atoa hebou lasi, to idia lokua, ma sibona ena gabu dekenai ia noho.

⁸Vadaeni guria gabuna dekenai ia ginidae guna diba tahua tauna danu be ia raka vareai, ia ese ia itaia, bona ia hamomokania.

⁹Badina unai neganai idia be Buka Helaga ena hereva idia do diba lasi, ia gwau Keriso be mase dekena amo do ia toreisi lou.

¹⁰Vadaeni inai diba tahua taudia be edia ruma dekenai idia giroa lou.

¹¹Maria be guria gabuna ena murimuri dekenai mai tai danu ia gini noho. Ia tai noho neganai, kwarana ia atoa diho guria gabuna lalonai ia itaia.

¹²Vadaeni ia ese aneru rua mai dabua kurokuro danu ia itaia, Iesu ena tauanina idia atoa gabuna dekenai. Ta be iena aena gabunai, ma ta be iena kwarana gabunai, idia helai noho.

¹³Idia hereva Maria dekenai, idia gwau, “Hahine e, dahaka dainai oi tai?” Ia haere idia dekenai, ia gwau, “Egu Lohiabada be idia abia siri vadaeni, idia atoa gabuna be lau diba lasi.”

¹⁴Unai bamona Maria ia hereva, vadaeni iena vairana ia giroa, Iesu be ia gini noho neganai ia itaia, to ia diba lasi unai be Iesu.

¹⁵Iesu ese ia nanadaia, ia gwau, “Hahine e, dahaka dainai oi tai? Daika oi tahua?” Maria ia laloa ia be uma gabu naria tauna ta, vadaeni ia gwau, “Tau badana e, bema inai be oi ese idau gabu ta dekenai oi abia lao be mani gabuna oi hamaoroa lau dekenai, vadaeni do lau lao abia.”

¹⁶Iesu ia gwau, “Maria e!” Maria ese iena vairana ia giroa, ia gwau, “Rabouni!” Unai hereva ena anina be “Hadibaia Tauna.”

¹⁷Iesu ese ia hamaoroa, ia gwau, “Lauegu tauanina oi dogoatao lasi, badina be Tamana dekenai lau do daekau lasi. To lauegu varavara taudia dekenai oi lao, idia do oi hamaoroa egu Tamana bona emui Tamana, egu Dirava bona emui Dirava dekenai do lau daekau.

¹⁸Vadaeni Maria, Magadala hahinena, be ia lao, diba tahua taudia dekenai ia hamaoroa, ia gwau, “Lohiabada be lau itaia vadaeni!” Vadaeni ia dekenai Iesu ia hereva henia herevadia be ia hamaoroa idia dekenai.

¹⁹Unai pura ena dina ginigunana hanuaboi neganai, diba tahua taudia be edia ruma iduarana idia koua auka vadaeni, Iuda taudia dekenai idia gari dainai. Vadaeni Iesu be ia lao, idia edia huanai ia gini, ia gwau, “Maino umui abia.”

²⁰Unai bamona ia hereva, vadaeni iena imana ruaosi bona iena ohena danu ia hedinaraia idia itaia. Unai dainai diba tahua taudia idia moale, Lohiabada idia itaia dainai.

²¹Iesu ma ia hereva henia lou idia dekenai, ia gwau, “Maino umui abia. Tamana ese lau ia siaia hegeregerena, lau danu umui do lau siaia.”