IOANE 20:19-31

¹⁹Unai pura ena dina ginigunana hanuaboi neganai, diba tahua taudia be edia ruma iduarana idia koua auka vadaeni, Iuda taudia dekenai idia gari dainai. Vadaeni Iesu be ia lao, idia edia huanai ia gini, ia gwau, “Maino umui abia.”

²⁰Unai bamona ia hereva, vadaeni iena imana ruaosi bona iena ohena danu ia hedinaraia idia itaia. Unai dainai diba tahua taudia idia moale, Lohiabada idia itaia dainai.

²¹Iesu ma ia hereva henia lou idia dekenai, ia gwau, “Maino umui abia. Tamana ese lau ia siaia hegeregerena, lau danu umui do lau siaia.”

²²Unai bamona ia hereva, vadaeni uduna dekena amo ia hahodi henia idia dekenai, ia gwau, “Lauma Helaga umui abia.

²³Edia dika do umui gwauatao taudia edia dika be do idia gwauatao, to edia dika do umui gwauatao lasi taudia edia dika be do idia noho.”

²⁴Toma, idia 12 tauna ta, ena ladana ta Hekapa, be idia danu ia hebou lasi, Iesu idia dekenai ia hedinarai neganai.

²⁵Unai dainai, diba tahua taudia haida ese ia idia hamaoroa, idia gwau, “Ai be Lohiabada ai itaia vadaeni!” To ia gwau, “Iena imana dekenai ikoko edia bero bema lau itaia lasi, egu imana kwakikwakina be ikoko idia gwadaia gabuna dekenai bema lau atoa lasi, bona iena ohena dekenai bema egu imana lau atoa vareai lasi, lau be do lau hamomokania lasi.”

²⁶Dina 8 idia ore murinai Iesu ena diba tahua taudia be ruma lalonai ma idia hebou lou, Toma be idia danu. Iduara idia koua auka momokani, to Iesu be ia vareai lao, edia huana dekenai ma ia gini, ia gwau, “Maino umui abia.”

²⁷Vadaeni ia ese Toma dekenai ia hereva henia, ia gwau, “Oiemu imana kwakikwakina oi atoa mai, lauegu imana do oi dogoatao, bona oiemu imana danu lauegu ohena dekenai do oi atoa vareai. Vadaeni oiemu laloa daradara oi hadokoa, bona lau dekenai oi abidadama henia.”

²⁸Toma ese ia haere henia, ia gwau, “Egu Lohiabada! Egu Dirava!”

²⁹Iesu ia gwau, “Lau oi itaia dainai lau dekenai oi abidadama, ani? Lau idia itaia lasi, to idia abidadama lau dekenai taudia be namo do idia davaria!”

³⁰Toa momo herea Iesu ese ma ia karaia, iena diba tahua taudia edia vairana dekenai, to inai toa momo herea be inai buka lalonai idia torea haorea lasi.

³¹To inai idia torea gaudia edia badina korikori be, umui ese do umui abia dae Iesu be Keriso, Dirava ena Natuna, vadaeni do umui abidadama henia dainai, mauri do umui abia iena ladana dekenai.