IOANE 20:17-31

¹⁷Iesu ese e tamanua, eto, Taugu ai do basio dau kau; badina be Tamada dekena do asina dae kau. A varavaragu hari dekedia aola, ba hamaorodia, do aina dae kau Tamagu bona Tamamui, egu Dirava bona emui Dirava, dekena ai.

¹⁸Bena Maria, hane Magdala, na ela, hahediba e hamaorodia, eto, Lohiabada na itaia. Bena Iesu ese e herevalai henia herevadia na e hamaorodia.

¹⁹Una pura dina gini-gunana hanuaboina ai, hahediba ese edia ruma iduarana vada e koua ahu, Iuda taudia garidia. Bena Iesu na ela, idia bogaragidiai e gini, eto, Maino avabia.

²⁰Unu e gwau toma, bena imana ruaosi bona ohena danu e haheitalaidia. Taunabunai hahediba e moale, Lohiabada e itaia dainai.

²¹Iesu ese ma e hereva henidia, eto, Maino avabia. Tamada ese e siaigu heḡereḡerena ai, lau ese danu umui baina siaimui.

²²Unu e gwau toma, bena e hahoho henidia, eto, Lauma Helaḡa avabia.

²³Edia dika ba gwau tao taudia iboudiai na edia dika bae hegwau tao; a edia dika basio gwau tao taudia iboudiai na edia dika do bae mia.

²⁴Toma, gwauta-rarua taudia ta, e nemaia Hekapa, idia ida asie hebou, Iesu dekedia ela hanuaboina ai.

²⁵Taunabunai, hahediba oredia ese e hamaoroa, eto, Ai ese Lohiabada vada ame itaia. A Toma eto, Bema ikoko kiparadia ia imana ai basina itamu, imagu kwaki-kwakina na ikoko gabudia ai basina atoa kaumu, bona imagu na ia ohena ai basina toia vareaimu neganai, lau ese basina abia daemu.

²⁶Dina taurahani e ore, bena ena hahediba na ruma lalonai ma e hebou lou, Toma danu idia ida. Ena be iduara e koua ahu, to Iesu na ela, bogaragidiai ma e gini, eto, Maino avabia.

²⁷Bena ia ese Toma e hereva henia, eto, Imamu kwaki-kwakina na a toia mai, lau imagu ba daua toho; bona imamu danu ohegu ai ba toia vareai. Bena basio daradara; bavabiabiraigu.

²⁸Toma ese e haere henia eto, Egu Lohiabada! Egu Dirava!

²⁹Iesu eto, Vada ome itagu dainai o abiabiraigumu. Ena be asie itagu to e abiabiraigumu taudia be nanamo.

³⁰Toa diaḡau Iesu ese ma e kara, ena hahediba vairadiai; a idia na ina buka lalonai asie tore ḡuḡuru.

³¹A ini hidaosi mo vada e tore, umui ese bavabia dae Iesu na Keriso, Dirava Natuna totona; bena bavabiabiraia, mauri bavabia ia ladana ai.