IOANE 19:25-41

²⁵Satauro ena badibadinai Iesu ena sinana bona iena sinana maragina bona Maria, Klopa ena adavana, bona Maria, Magadala hahinena, idia gini noho.

²⁶Iesu ese iena sinana bona ia lalokau henia diba tahua tauna ia itaia, ia kahirakahira idia gini noho. Vadaeni iena sinana dekenai ia hereva henia, ia gwau, “Hahine e, oi itaia, oiemu natuna be unai.”

²⁷Unai diba tahua tauna dekenai danu ia hereva henia, ia gwau, “Oi itaia, oiemu sinana be unai.” Unai negana ia lao, unai diba tahua tauna ese Maria ia abia dae iena ruma dekenai.

²⁸Unai murinai, Iesu ia diba iena gaukara ibounai ia karaia haorea vadaeni, vadaeni Buka Helaga ena hereva hamomokania totona ia hereva, ia gwau, “Lau ranu mase.”

²⁹Hodu ta be unuseni, uaina ena mamina ia namo lasi dekenai ia honu. Vadaeni sipanisi idia udaia, unai uaina dekena amo idia hahonua, au latana ta dekenai idia kwatua, vadaeni idia abia isi Iesu ena uduna bibina dekenai.

³⁰Iesu ese uaina ena mamina ia namo lasi gauna ia abia, vadaeni ia gwau, “Ia ore vadaeni!” Vadaeni iena kwarana ia atoa diho, iena lauma ia henia daekau.

³¹Unai dina be Pasova aria karaia hegaegae dinana, ma kerukeru Sabati be idau, ia helaga momokani dinana ta. Unai dainai Iuda taudia idia ura lasi unai dina dekenai mase taudia idia noho satauro dekenai. Vadaeni Iuda taudia ese Pilato idia noia, unai mase taudia edia aena do ia makohia, bona edia tauanina do ia abia siri.

³²Unai dainai, tuari taudia idia lao, guna tauna ena aena idia makohia, ma tau iharuana ena aena danu, inai Iesu danu idia hasatauroa hebou taudia.

³³Vadaeni Iesu dekenai ma idia lao, to idia itaia ia be ia mase vadaeni, unai dainai iena aena be idia makohia lasi.

³⁴To tuari tauna ta ese Iesu ena ohena ia gwadaia io dekenai, vadaeni rara bona ranu idia diho.

³⁵Inai kara ia itaia tauna ese ia gwauraia hedinarai, bona iena hereva be momokani. Ia be ia diba iena hereva be momokani, unai dainai umui danu do umui abidadama henia diba.

³⁶Badina be unai kara ia vara, Buka Helaga ena hereva hamomokania totona, ia gwau, “Ena turiana ta idia makohia lasi.”

³⁷Ma ta danu, Buka Helaga ia gwau, “Idia gwadaia tauna be taunimanima ese edia matana dekenai do idia itaia.”

³⁸Unai kara ia ore murinai, Iosepa, Arimatea tauna, ese Pilato ia noia, Iesu ena tauanina do ia abia siri. Iosepa be Iesu ena diba tahua tauna ta, to Iuda taudia dekenai ia gari dainai, iena abidadama ia hunia. Pilato ese maoro ia henia, vadaeni Iosepa ia lao, Iesu ena tauanina ia abia siri.

³⁹Nikodemo danu, gunaguna neganai Iesu dekenai ia lao hanuaboi lalonai tauna ia mai. Ia ese muro bona aloe edia muramura idia mikisi gauna ia abia lao, edia metau kilogaram 50 bamona.

⁴⁰Vadaeni idia ese Iesu ena tauanina idia abia, dabua aukana mai muramura danu dekenai idia kumia, Iuda taudia edia mase guria karana hegeregerena.

⁴¹Iesu idia hasatauroa gabuna dekenai be uma gabu ta, bona unai uma gabu lalonai be guria gabuna matamata ta, ena lalonai mase tauna ta do idia atoa lasi.