IOANE 19:16-34

¹⁶Vadaeni Pilato ese Iesu ia henia idia dekenai, do idia hasatauroa totona.

¹⁷Unai dainai Iesu idia abia, idia hakaua lao. Ia ese iena satauro ia huaia lao, gabu ta dekenai idia lao, ena ladana be Kwara Koukouna Gabuna, Heberu gado dekenai ena ladana be Gologota.

¹⁸Unuseni Iesu idia hasatauroa, bona tau rua danu, ta be kahana, ma ta be kahana dekenai, Iesu be idia edia huanai.

¹⁹Vadaeni Pilato ese revareva ia torea, satauro ena ataiai ia atoa. Ia torea hereva be inai: “Iesu, Nasareta tauna, Iuda taudia edia King.”

²⁰Iuda taudia momo ese unai revareva idia duahia, badina be Iesu idia hasatauroa gabuna bona hanua badana ena padana be ia daudau lasi, bona unai revareva be Heberu gado dekenai bona Roma gado dekenai bona Helene gado dekenai ia torea.

²¹Vadaeni Iuda taudia edia dubu biagudia ese Pilato idia hamaoroa, idia gwau, “Oi torea lasi ‘Iuda taudia edia King,’ to inai bamona oi torea, ‘Ia gwau, Lau be Iuda taudia edia King.’ ”

²²Pilato ia gwau, “Lau torea gauna be lau torea, vadaeni.”

²³Vadaeni tuari taudia, inai Iesu idia hasatauroa taudia, ese iena dabua idia abia, idia haria kahana 4 dekenai, vadaeni idia taudia 4 ta ta edia kahana idia abia. To iena dabua ta be turia hakapua lasi gauna, dabua badana tamona sibona.

²⁴Unai dainai, ta ta idia hereva henia, idia gwau, “Ita darea lasi, to laki gadara ita karaia, vadaeni do ita diba daika ese do ia abia.” Unai dekena amo Buka Helaga dekenai ia torea herevana ia momokani vadaeni, ia gwau, “Idia ese lauegu dabua idia haria karaia. Egu dabua be laki gadara dekena amo idia abia.” Inai tuari taudia be unai bamona idia karaia.

²⁵Satauro ena badibadinai Iesu ena sinana bona iena sinana maragina bona Maria, Klopa ena adavana, bona Maria, Magadala hahinena, idia gini noho.

²⁶Iesu ese iena sinana bona ia lalokau henia diba tahua tauna ia itaia, ia kahirakahira idia gini noho. Vadaeni iena sinana dekenai ia hereva henia, ia gwau, “Hahine e, oi itaia, oiemu natuna be unai.”

²⁷Unai diba tahua tauna dekenai danu ia hereva henia, ia gwau, “Oi itaia, oiemu sinana be unai.” Unai negana ia lao, unai diba tahua tauna ese Maria ia abia dae iena ruma dekenai.

²⁸Unai murinai, Iesu ia diba iena gaukara ibounai ia karaia haorea vadaeni, vadaeni Buka Helaga ena hereva hamomokania totona ia hereva, ia gwau, “Lau ranu mase.”

²⁹Hodu ta be unuseni, uaina ena mamina ia namo lasi dekenai ia honu. Vadaeni sipanisi idia udaia, unai uaina dekena amo idia hahonua, au latana ta dekenai idia kwatua, vadaeni idia abia isi Iesu ena uduna bibina dekenai.

³⁰Iesu ese uaina ena mamina ia namo lasi gauna ia abia, vadaeni ia gwau, “Ia ore vadaeni!” Vadaeni iena kwarana ia atoa diho, iena lauma ia henia daekau.

³¹Unai dina be Pasova aria karaia hegaegae dinana, ma kerukeru Sabati be idau, ia helaga momokani dinana ta. Unai dainai Iuda taudia idia ura lasi unai dina dekenai mase taudia idia noho satauro dekenai. Vadaeni Iuda taudia ese Pilato idia noia, unai mase taudia edia aena do ia makohia, bona edia tauanina do ia abia siri.

³²Unai dainai, tuari taudia idia lao, guna tauna ena aena idia makohia, ma tau iharuana ena aena danu, inai Iesu danu idia hasatauroa hebou taudia.

³³Vadaeni Iesu dekenai ma idia lao, to idia itaia ia be ia mase vadaeni, unai dainai iena aena be idia makohia lasi.

³⁴To tuari tauna ta ese Iesu ena ohena ia gwadaia io dekenai, vadaeni rara bona ranu idia diho.