IOANE 19:12-38

¹²Unu amo Pilato ese ia iruha-negena dalana e tahua tohova. A Iuda taudia na e lolo, eto, Ena tau bo ruhaia negemu, oi na dia Kaisara turana. Bema tau ta e gwaumu ia sibona na hanua ta pavapavana, ia ese Kaisara e inai heniamu.

¹³Pilato ese una hereva e kamonai, bena ia ese Iesu ma e hakaua lasi. Bena ia na hahemaoro gabuna ai e helai diho: una gabu ladana be “Nadi dehena”; Heberu gadodia ai ladana be “Gabata”.

¹⁴Una na Lagau-hanai Ariana e abia heḡaeḡae dinana; negana be dina tubua. Pilato ese Iuda taudia e hereva henidia, eto, A itaia, emui pavapava binai.

¹⁵Bena idia na e lolo, eto, Avabia oho! Avabia oho! Ba hasatauroa! Pilato ese e nanadaidia, eto, Emui pavapava baina hasatauroa a? Hahelaḡa taudia na eto, Asi emai pavapava ta, Kaisara mo sibona.

¹⁶Bena Iesu vada e henidia, bae hasatauroa. Bena idia ese e abia, e hakaua lao.

¹⁷Iesu ese ena satauro e huaia lao, ḡabu ta ela, ladana na “Kwara koukouna gabuna”; Heberu gadodia ai ladana na “Kwara koukouna gabuna”, Heberu gadodia ai ladana na “Golgota”.

¹⁸Unuseni ai idia ese e hasatauroa; bona tatau rarua danu, ta kahana ai ma ta kahana ai, Iesu na ihuadia ai.

¹⁹Bena Pilato ese revareva e torea, satauro dorina ai e kapaia kau. E torea revarevana binai: IESU, TAU NASARET; IUDA TAUDIA EDIA PAVAPAVA.

²⁰Iuda taudia hutuma ex una revareva e duahia, badina be Iesu e hasatauroa gabuna bona hanua badana padadia na dia daudau; bona una revareva na Heberu gadodia ai bona Roma gadodia ai bona Helene gadodia ai e torea.

²¹Bena Iuda taudia edia hahelaḡa taudia badadia ese Pilato e hamaoroa, eto, Basio torea “Iuda taudia edia pavapava”; ini hari ba torea toma, “Ia eto, Lau na Iuda taudia edia pavapava”.

²²Pilato eto, Na torea ḡauna be vada na torea vaitani.

²³Bena tuari taudia, hari Iesu e hasatauroa taudia, ese ena dabua e abi, e dare siri hani, bena hahaniosi ta ta ese ahudia e abi. A ena hahedoki na se turia ḡauna, idoinai vada e hatua.

²⁴Taunabunai, sibodia e hereva heheni, eto, Basita darea, a mari hari baita karaia, bena baita diba daika ese baine abia. Unu amo Buka Helaḡa ai e torea herevana vada e momokalli; eto, Idia ese egu dabua e hari, Egu hahedoki na mari amo e abia. Hari tuari taudia na unu e kara toma.

²⁵Satauro badibadinai Iesu sinana bona sinana lahaina bona Maria, Klopa adavana, bona Maria, hane Magdala, gigini.

²⁶Bena Iesu ese sinana bona e lalokau henia hahedibana na unuseni ginidia ai e itadia. Bena sinana e hereva henia, eto, Hahine e, a itaia, natumu benai.

²⁷Hahediba danu e hereva henia, eto, A itaia, sinamu benai. Una negana ela, una hahediba ese ena ruma ai e abia dae.

²⁸Una murinai, Iesu na vada dibana ḡau iboudiai vada e haḡuḡuru, bena Buka Helaḡa herevana ihamomokanilaina e hereva, eto, Ranu vada eme masegu.

²⁹Hodu auta unuseni ai, vine ranuna iditana ai e honu. Bena puta na una vine ranuna iditana lalonai e urua utu, au ai e hiria kau, bena e duduia dae uduna ai.

³⁰Iesu ese vine ranuna iditana e abia, bena eto, Vada e ore. Bena kwarana e gelo diho, laumana e heni dae.

³¹Una dina be Lagau-hanai Ariana iabi-heḡaeḡaena dinana, bena Dina Helaḡa ai mase taudia na satauro ai bae mia na garina, badina be una Dina Helaḡa tamona na helaḡa bada, Iuda taudia ese Pilato e noia, e hasataurodia taudia aedia bae hakwaidudia bona bae abidia oho.

³²Taunabunai, tuari taudia na ela, tau gunana aena e hakwaidu, ma iharuana aena danu, hari Iesu ida e hasataurodia hebou taudia.

³³Bena Iesu ma e lao henia, to e itaia vada e mase vaitani, taunabunai ia aena asie hakwaidu.

³⁴A tuari tauna ta ese Iesu ohena e toḡea, bena rara bona ranu e lohilohi dobi.

³⁵E itaia tauna ese vada eme gwauraia hedinarai, bona ena hereva na momokani. Ia na dibana ena hereva na momokani; una dainai vada bavabia dae.

³⁶Badina be una kara e vara, buka herevana ihamomokanilaina, eto, Turiana ta asie hakwaidua.

³⁷Ma ta danu, eto, Idia ese bae toḡea tauna na bae raraia.

³⁸Unu ḡau muridiai, Iosef, Arimatea tauna, Iesu enai e hahediba hehuni Iuda taudia garidia tauna ta, ese Pilato e noia, Iesu tauna baine abia oho. Pilato e gwau maoro; bena Iosef ela, tauna e abia oho.