Inam-amag 10:4-25

⁴Nanmomolagat si egyat na yan kanana, “Sinoy ibagam, Apo?” Pag kanan din anghel, “Nenemnemen Diyos sik-a, tan dindinnge na din karkararag mo ya ammo na di iyaat mo ay mamadbadang sin nankabibiteg.

⁵Bomaa ka ngarud si emey ed Joppa ay en mangayag en Simon ay nabdayan si Pedro.

⁶Mantee sin benget di baybay sin beey en Simon ay man-ob-obla si lalat.”

⁷Idi nadipos din anghel, inayagan Cornelius di dowa ay baa na ya esa ay soldado ay kabadbadang na ay manaydayaw abe en Diyos.

⁸Dinad-at na en daida din am-in ay napasamak, et pag nan ibaa ed Joppa.

⁹Sin kabigatana sin alas dosi, wada da sin danan ay omas-asag-en ed Joppa dowan aben si Pedro et inmey sin nasingpa ay atep di beey da ay en mankararag.

¹⁰Dinmagaang et mangan koma, ngem idi sagsaganaen da di pinangan, waday inpailan Diyos en sisya ay kaman iitaw.

¹¹Din inila na et nabokatan ed langit, yan wada di maoy-oy-oy sin kad-ana ay kaman dakdake ay lopot ay naitatakyad sin opat ay soli na.

¹²Din linaona et am-in ay boyan di aanimal, mankodkodap ya mantaytayaw, ay maiparit ay kanen di Judio.

¹³Yan dinnge na di kali ay nangwani, “Pedro, ibangon mo ta pomalti kas isidam.”

¹⁴“Sigaak met, Apo,” kanana, “tan maga polos di insidsidak ay paniyewen mi ay Judio.”

¹⁵Kanan kasin din mankalkali, “Din inbagan Diyos en siged ay makan et adim paniyewen.”

¹⁶Namitlo ay inila ya dinnge na di, asi naipataoli din lopot ed langit.

¹⁷Nemnemnemen pay Pedro mo sino ngin di laydena ay kalien, sinmawang din inbaan Cornelius yan dinamag da din kad-an di beey Simon. Somawang da pay sin segpan,

¹⁸pag dan pooten mo siya sa di beey ay panteean Simon ay nabdayan si Pedro.

¹⁹Si Pedro et nemnemnemena pay laeng di kaiologan din inpailan Diyos en sisya, isonga kanan din Ispiriton Diyos en sisya, “Wada di tolo ay ipogaw ay mangan-anap en sik-a.

²⁰Bomaba ka, yan adi ka mandowadowa ay makeey en daida, tan sak-en dedan di nangibaa en daida.”

²¹Siya et di binmaba si Pedro yan kanana sin tolo ay sana, “Sak-en din an-anapen yo. Sino ngin di panggep yo ay inmalis na?”

²²“Si Kapitan Cornelius et inbaa nas dakami ay en mangayag en sik-a, tan inbagan di anghel Diyos en sisya ay ipaayag daka ta dengngena di ibagam. Si Cornelius et siged ay ipogaw ay manaydayaw en Diyos. Din iib-am abe ay Judio et tangtangaden das sisya,” kanan da ay sinombat.

²³Pag pasgepen Pedro ta man-iyan das di. Sin napat-aana, nakeey da Pedro ya di odom ay namati ay taga-Joppa en daida.

²⁴Idi sinmawang da pay ed Cesarea sin maikadwa ay agew, wadas da Cornelius ay manseseed, pati din inayagana ay aag-i ya gagayyem na.

²⁵Sengsenggep pay si Pedro, en inabat Cornelius yan nanyakog-ong ay nandokmog sin sangoanana ay mandayaw en sisya.