Iliga꞉felo꞉ 7:35-57

³⁵A꞉la꞉fo꞉ko꞉lo꞉ Sitifen eyo꞉ to nolo꞉ a꞉kudu sio꞉, “Moses ko꞉lo꞉ o꞉gdo꞉ Godelo꞉ Isibdo꞉ iliga꞉fa꞉nigab a꞉no꞉, tamin amilo꞉ Isolael kaluka꞉isaleya꞉lo꞉ e gola ba꞉dakiyo꞉, emo꞉wo꞉ a꞉la꞉sio꞉, ‘Nio꞉ gi bo꞉fo꞉liki mo꞉walila꞉bika꞉ a꞉la꞉bo꞉, abe saefa꞉yo꞉?’ a꞉la꞉do꞉ sa꞉labikilo꞉ aneyo꞉ o꞉m. A꞉la꞉fo꞉ko꞉lo꞉ Godeya꞉yo꞉ ma꞉mul kalu ilo꞉wa a꞉la꞉ta꞉ga꞉ Mosesdo꞉ amilo꞉ fa꞉la꞉dowo꞉ a꞉ma꞉liki, Moses eyo꞉ Isolael kaluka꞉isaleyo꞉ sili dofo꞉liki bo꞉fo꞉melea꞉ki, iliga꞉fo꞉.

³⁶A꞉la꞉fo꞉ko꞉lo꞉ Moses eyo꞉ Isibdo꞉ seno꞉ e sililia꞉ga꞉ handaloma꞉nikiyo꞉, eyo꞉ molo ha꞉na꞉no꞉wo꞉ modo꞉ dimido꞉. Isib hen amio꞉ a꞉la꞉ta꞉ga꞉ ho꞉n genelo꞉ amio꞉lo꞉, a꞉la꞉ta꞉ga꞉ Isolael kaluka꞉isaleyo꞉ dona do꞉la꞉fo꞉ fa꞉la꞉da꞉in kalalili hen usa sia꞉likiyo꞉lo꞉, e tililia꞉ ha꞉naliki, molo ha꞉na꞉no꞉wo꞉ dimido꞉.

³⁷“Moses a꞉ma꞉yo꞉ Isolael kaluka꞉isalemo꞉wo꞉ a꞉la꞉sio꞉, ‘Godeya꞉yo꞉ ne ko꞉lo꞉ gimo꞉lo꞉ iliga꞉fo꞉ aumbo꞉, dinali sa꞉lan kalu nowo꞉, gi us a꞉na a꞉la꞉ta꞉ga꞉ iliga꞉fa꞉ib.’

³⁸Isolael kaluka꞉isaleyo꞉ kalalili hena siliki kegea꞉len amio꞉ Moseso꞉ i o꞉lia꞉ elen. A꞉la꞉ta꞉ga꞉ ni ma꞉mui Isolael i o꞉lia꞉ elen amio꞉, e misio꞉ Sainai fa꞉la꞉dowamio꞉, ma꞉mul kalu e o꞉lia꞉ tola꞉. A꞉la꞉fo꞉ko꞉lo꞉ eyo꞉ to mela꞉no꞉lo꞉ a꞉lab a꞉no꞉ da꞉da꞉sa꞉ga꞉, nimo꞉ malolo꞉ mena꞉ki di.

³⁹“Ko꞉sega nili ma꞉mu iya꞉yo꞉ Mosesa꞉ towo꞉ mo꞉kuduhanaki, iliyo꞉ Moses e gola ba꞉da꞉sa꞉ga꞉, asulo꞉ inido꞉wo꞉ a꞉ma꞉la꞉ Isib ane.

⁴⁰A꞉la꞉fo꞉ko꞉lo꞉ iliyo꞉ A꞉lonbo꞉wo꞉ a꞉la꞉sio꞉, ‘Moses nililo꞉ Isib a꞉la꞉ta꞉ga꞉ tililia꞉mio꞉ we, e amio꞉ o꞉b fa꞉la꞉dowabele babalab ko꞉lo꞉ giyo꞉ gode nolo꞉ nilo꞉ tililia꞉ga꞉lo꞉ taminfo꞉ ha꞉na꞉no꞉wo꞉ dimida꞉bi’ a꞉la꞉sio꞉.

⁴¹Ho꞉len a꞉namio꞉ iliyo꞉ madali godeyo꞉, kao inso꞉ o꞉ngo꞉ a꞉na dimida꞉sa꞉ga꞉ ta꞉fo꞉liki, iliyo꞉ o꞉mo꞉ boba somiaki gulugulula꞉len. Iliyo꞉ ini dagiya꞉lo꞉ dimido꞉ gode a꞉no꞉ wabudakiyo꞉, ma꞉no꞉wo꞉ naki sagalo꞉ alan dowo꞉.

⁴²Iliyo꞉ a꞉la꞉dimidabikiyo꞉, Godeya꞉yo꞉ iyo꞉ gola ba꞉da꞉sa꞉ga꞉, iyo꞉ ofo꞉, tamino꞉ eleyo꞉ a꞉no꞉ ko꞉lo꞉ wabuluma꞉ki ta꞉fo꞉. Dinali sa꞉lan kaluwa꞉ bugo꞉ amio꞉ a꞉la꞉sa꞉sa꞉lo꞉, “‘Isolael kaluka꞉isale gio꞉, kalalili hen amio꞉ dona do꞉la꞉fo꞉ fa꞉la꞉da꞉in a꞉namio꞉ no꞉wo꞉ sa꞉nda꞉sa꞉ga꞉lo꞉ so꞉kugulu mian a꞉no꞉ dimi. Ko꞉sega giliyo꞉ ne wabudakiyo꞉, hendelelo꞉ mo꞉dimi.

⁴³Gio꞉ gulugululan helebeso꞉g a dia꞉likilo꞉ sia꞉len a꞉no꞉ madali gode Molog eno꞉ a꞉la꞉ta꞉ga꞉ madali gode tamin ko꞉lo꞉ wabudab a꞉no꞉ Lafan eno꞉. Gini dagiya꞉ madali gode a꞉no꞉ dimida꞉sa꞉, o꞉mo꞉wo꞉ wabulu sio꞉. A꞉la꞉fo꞉ko꞉lo꞉ Niyo꞉ gini hende amio꞉ a꞉ma꞉la꞉yo꞉ mo꞉mena꞉ki, Babalon heno꞉ tiginita꞉ga꞉ ko꞉na꞉ ta꞉foma꞉ki ta꞉fa꞉no꞉.’ Dinali sa꞉lan kaluwa꞉yo꞉ a꞉la꞉sa꞉sa꞉lo꞉.

⁴⁴“Nili ma꞉muwa꞉yo꞉ helebeso꞉g a a꞉no꞉ Godeyo꞉ a꞉labka꞉ a꞉la꞉widakiyo꞉, kalalili hen a꞉namio꞉ dia꞉liki sia꞉len. Helebeso꞉g a a꞉no꞉ dia꞉no꞉wo꞉, Godeya꞉yo꞉ Mosesbo꞉ wido꞉ ko꞉lo꞉ iyo꞉ a꞉la꞉dimido꞉.

⁴⁵Tif amio꞉ ni ma꞉mu i a꞉ma꞉ ene so꞉wayo꞉ helebeso꞉g a a꞉no꞉ dimi ko꞉lo꞉ iyo꞉ dia꞉li ha꞉na꞉sa꞉ga꞉yo꞉, Yosua e tililia꞉ ha꞉nakiyo꞉, iyo꞉ Godeya꞉ halaido꞉ o꞉lia꞉ma꞉yo꞉, ha꞉la꞉ kalu hen a꞉namilo꞉ sano꞉ o꞉luga꞉felesa꞉ga꞉yo꞉, helebeso꞉g a a꞉no꞉ a꞉na dialifa꞉. A꞉la꞉ta꞉ga꞉ a a꞉no꞉ hen a꞉na a꞉la꞉ta꞉ga꞉lo꞉ dowa꞉mio꞉wo꞉, Isolael misa꞉ Debidi ho꞉len a꞉na edo꞉.

⁴⁶Godeya꞉yo꞉ Debidi e sagale alifa꞉ ko꞉lo꞉ Debidi eyo꞉ a ho꞉gi nowo꞉ Yekoba꞉ Gode mesea꞉ki dia꞉niki, Godemo꞉wo꞉ dabu ba꞉ba꞉.

⁴⁷Ko꞉sega Godeya꞉ a a꞉no꞉ inso꞉ Solomona꞉ di.

⁴⁸“Ko꞉sega Gode Iwalulo꞉ A꞉labo꞉ E henfelo꞉ kaluwa꞉lo꞉ a dimido꞉ usamio꞉ mo꞉san. Dinali sa꞉lan kaluwa꞉yo꞉, Godeya꞉ towo꞉ sa꞉lakiyo꞉ a꞉la꞉sio꞉,

⁴⁹“‘Hebenelo꞉ halo nelo꞉ mesa꞉no꞉ i fofodo꞉wo꞉ o꞉m, a꞉la꞉ta꞉ga꞉ henfelo꞉ we Ni gido꞉fo꞉lo꞉ wa꞉lo꞉fo꞉mela꞉no꞉wo꞉ o꞉m. A꞉la꞉fo꞉ko꞉lo꞉ a Nilo꞉ mesa꞉no꞉ o꞉li o꞉ngo꞉wo꞉ gio꞉ waga dia꞉no꞉wo꞉? Nelo꞉ mesa꞉no꞉wo꞉ ayo꞉ mada mo꞉dialifa꞉ib.

⁵⁰Mo꞉wo꞉ kelego꞉ we No꞉no꞉n tambo dimido꞉.’ Godeya꞉ a꞉la꞉sio꞉.”

⁵¹Sitifen eyo꞉ to kudu sa꞉la꞉kiyo꞉ a꞉la꞉sio꞉, “Asulo꞉ gililo꞉wo꞉ halaido꞉ dowa꞉sa꞉ga꞉, ka꞉la꞉no꞉ kali ko꞉lo꞉ gio꞉ ha꞉la꞉ kaluwo꞉ o꞉ngo꞉ dowo꞉. Godeya꞉ Mamaya꞉lo꞉ gimo꞉lo꞉ sa꞉lab a꞉no꞉, giliyo꞉ gola ba꞉da꞉sen. Giliyo꞉ ge ma꞉mu ima꞉lo꞉ man dimida꞉sen aumb dimida꞉lab.

⁵²Gi ma꞉mu iyo꞉ Godeya꞉lo꞉ dinali sa꞉lan kaluwo꞉ tambo mo꞉beaki, imo꞉wo꞉ hida꞉yo꞉wo꞉ dimia꞉sen. A꞉la꞉ta꞉ga꞉ tamin amio꞉ dinali sa꞉lan kalu nolba꞉yo꞉ widakiyo꞉, Godeya꞉ Ene Digalo꞉ Kaluwo꞉ mia꞉ib a꞉la꞉do꞉ sio꞉ i a꞉no꞉lo꞉, iliyo꞉ sana sowa꞉sen. A꞉la꞉go꞉ko꞉lo꞉ o꞉go꞉ kalu a꞉no꞉ mio꞉ ko꞉lo꞉ giliyo꞉ E tele dowa꞉sa꞉ga꞉, sana sowo꞉.

⁵³Godeya꞉ ma꞉mula꞉ kaluwa꞉yo꞉ Ene eleyo꞉ gininbo꞉wo꞉ dimi ko꞉sega giliyo꞉ mo꞉kudu ane.” Sitifen eyo꞉ towo꞉ a꞉la꞉wido꞉.

⁵⁴A꞉la꞉fo꞉ko꞉lo꞉ Yu misa꞉ kaluwa꞉yo꞉ Sitifena꞉ to a꞉no꞉ da꞉da꞉ga꞉yo꞉, mada beso꞉ galita꞉ga꞉, emo꞉wo꞉ kulufa꞉yo꞉wo꞉ alan dowo꞉.

⁵⁵Ko꞉sega Sitifen e Godeya꞉ Mamayo꞉ e amio꞉ wa꞉lifo꞉ ko꞉lo꞉, eyo꞉ Hebene alolo ba꞉ba꞉ amio꞉, Godeya꞉ Ene halaido꞉ malilo꞉wo꞉ ba꞉da꞉ga꞉yo꞉, Ya꞉suwo꞉ Godeya꞉ ene dagi ililiba kagayabi ba꞉ba꞉.

⁵⁶A꞉la꞉ta꞉ga꞉ eyo꞉ a꞉la꞉sio꞉, “Gio꞉ bo꞉ba! Ne Hebeneyo꞉ kolaitabiki ba꞉ba꞉ amio꞉, Kalule Dowo꞉ E Godeya꞉ ene dagi ililiba kagayabiki bo꞉do꞉l.”

⁵⁷Iyo꞉ to꞉ a꞉no꞉ da꞉dakiyo꞉, ka꞉la꞉no꞉ ka꞉la꞉sa꞉ga꞉, e halalelaki, iyo꞉ tambo elo꞉wa nai ha꞉na꞉ga꞉, e ta꞉lia꞉sa꞉ga꞉, amisa꞉n ha꞉laya susululia꞉ga꞉, uwa꞉ agodo꞉. Iliyo꞉ a꞉la꞉dimidabikiyo꞉, Sitifen elo꞉ mo꞉dimido꞉lo꞉ dikili sio꞉ kalu a꞉ma꞉yo꞉ helebeso꞉go꞉ wa꞉l amilo꞉ ko꞉lo꞉wo꞉ ho꞉go꞉fela꞉sa꞉ga꞉, kalu so꞉wa So꞉l a꞉ma꞉ gido꞉fo꞉ aniba difa꞉.